ޕީޕަލްސް ނޭޝަަނަލް ކޮންގްރެސްގެ ދާއިރާތަކުގެ އިންތިޚާބުގެ އިންތިޒާމުތައް ހަމަޖެއްސެމުގެ މަސައްކަތްތައް ކުރިއަށްދާ ގޮތް ޕާޓީގެ ލީޑާޝިޕުގެ ބޭފުޅުން ބައްލަވައިލައްވައިފިއެވެ. 

އެގޮތުން ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އަދި ޕާޓީގެ ޕާލިމަންޓްރީ ގުރޫޕުގެ ލީޑަރު ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާޙުވަނީ ޕާޓީގެ ދާއިރާތަަކުގެ ރައީސުންނާ ބައްދަލުކުރައްވަފައެވެ. 

އަދި އެ ބޭފުޅުންވަނީ ޕާޓީގެ އިންތިޚާބީ ކޮމިޓީގެ މެންބަރުންނާއި، އިންތިޚާބުގެ މަސައްކަތްތަކުގައި ހަރަކާތްތެރިވެވަޑައިގަންނަވާ އޮފިޝަލުންނާ ބައްދަލުކުރައްވާފައެވެ. 

ޖުލައި މަހުގެ 11 ވަނަ ދުވަހު ދާއިރާތަކުގެ އިންތިޚާބު އޮންނައިރު، އެ އިންތިޚާބަށް ކުރިމަތިލުމުގެ ފުރުސަތު ބަންދުވާނީ ޖޫން 30 ވަނަ ދުވަހުގެ ނިޔަލަށެވެ. 

ދާއިރާތަކުގެ އިންތިޚާބާ ގުޅޭ އެންމެ ފަހުގެ މަސައްކަތްތައް ޕާޓީގެ ލީޑާޝިޕުން ބައްލަވާލައްވައިފި 

ކޮންގްރެސް ޕާޓީގެ ދާއިރާތަކުގެ އިންތިހާބު އަންނަ މަހުގެ 11 ގައި ބާއްވަން ނިންމައި އެކަން އިއުލާނުކޮށްފިއެވެ. 

މިއަދު އެ ޕާޓީން ބޭއްވި ނޫސްވެރިންގެ ބައްދަލުވުމުގައި ވަނީ ކޮންގްރެސް ޕާޓީގެ މަތީ މަޖިލިސް އަންނަ ސެޕްޓެމްބަރުމަހުގެ 15 އިން 18 އަށް ބާއްވަން ނިންމިކަންވެސް އިއުލާނުކޮށްފައެވެ. 

މިއަދުގެ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް އަދި އެ މަޖިލީހުގައި ފޮނަދޫ ދާއިރާ ތަމްސީލުކުރައްވާ އެ ޕާޓީގެ މެމްބަރު އަބްދުއްރަހީމް އަބްދުﷲ ވިދާޅުވީ ންގްރެސް ޕާޓީގެ މަތީ މަޖިލީހުގެ ކަންކަން ރާވައި އިންތިޒާމުކުރުމަށްޓަކައި 13 މެމްބަރުންގެ މައްޗަށް އެކުލެވޭ ޓާސްކްފޯހެއް އެކުލަވާލާފައިވާކަމަށެވެ. 

ކޮންގްރެސް ޕާޓީގެ މަތީ މަޖިލިސް ބޭއްވުމަށްޓަކައި އޭގެ ކުރިން ޕާޓީގެ ދާއިރާތަކުގެ އިންތިހާބު ބާއްވާނެކަމަށާއި، ދާއިރާތަކުގެ އިންތިހާބު އަންނަމަހުގެ 11 ގައި ބާއްވަން ނިންމާފައިވާކަމަށް އަބްދުއްރަހީމް ވިދާޅުވިއެވެ. 

"އެ އިންތިހާބު އިއުލާނުކުރާ ދުވަސް މިއަދަކީ. މި މި ހުޅުވާލަނީ ޕާޓީގެ ދާއިރާގެ ރައީސުން، ދާއިރާގެ ނައިބު ރައީސުން، އަންހެނުންގެ ހަރަކާތުގެ ރައީސުން، ޒުވާނުންގެ ހަރަކާތުގެ ރައީސުން، ސްޓިއަރިން ކޮމިޓީގެ ރައީސުން، މި އިންތިހާބަށް މިއަދު މި ހުޅުވާލަނީ، މިއަދުން ފެށިގެން މި މަހުގެ  30 ވަނަ ދުވަހުގެ ނިޔަލަށް އޮންނާނެ ކުރިމަތިލުމުގެ ފުރުސަތު، މިކަމަށް ހާއްސަ ޕޯޓަލެއްވެސް މިއަދު އެބަ އިފްތިތާހުކުރަން،". އަބްދުއްރަހީމް ވިދާޅުވިއެވެ. 

މި މަގާމުތަކަށް ޝައުގުވެރިވާ މެމްބަރުން އެކަމަށް އެދި ހުށަހަޅާނީ މި ޕޯޓަލް މެދުވެރިކޮށްކަމަށް ވިދާޅުވިއެވެ.

އަބްދުއްރަހީމް ވިދާޅުވީ މި މަގާމުތަކަށް ވާދަކުރެވޭނީ މިއަދާ ހަމައަށް ކޮންގްރެސް ޕާޓީގައި ދަފްތަރުވެފައި ތިބި މެމްބަރުންނަށްކަމަށެވެ. އަދި މި އިންތިހާބުގައި ވޯޓުލެވޭނީވެސް މިއަދާ ހަމައަށް ޕާޓީގެ ދަފްތަރުގައި ރަޖިސްޓްރީވެފައިވާ މީހުންނަށް ކަމަށް އަބްދުއްރަހީމް ވިދާޅުވިއެވެ.

"މި އިންތިހާބު އޮންނާނީ 11 ޖުލައި 2026 ވާ ހޮނިހިރު ދުވަހު، މިއަދު މި ހުޅުވާލީ އިންތިހާބަށް، 30 ވަނަ ދުވަހުގެ ނިޔަލަށް މުއްދަތު ހަމަވާނީ، މުއްދަތު ހަމަވުމާއެކީގައި ޖުލައި 1 ވަނަ ދުވަހު އަޅުގަނޑުމެން ވަގުތީ ވޯޓާސް ލިސްޓް އިއުލާނުކުރާނަން، އެއަށްފަހު ތިން ދުވަހުގެ މުއްދަތެއް އަޅުގަނޑުމެން ދޭންނަ ޝަކުވާ ހުށަހަޅަން، ދީފައި ދެން ޖުލައި މަހުގެ 4 ވަނަ ދުވަހު ދާއިމީ ލިސްޓު އާއްމުކުރާނަން،". އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ދާއިރާގެ ރައީސުން އިންތިހާބުކުރާނީ ކޮންގްރެސް ޕާޓީ ތަމްސީލުކުރާ ރައްޔިތުންގެ މަޖިލީހުގެ މެމްބަރަކު ނެތް ދާއިރާތަކަށްކަމަށެވެ. ރައްޔިތުންގެ މަޖިލީހުގެ މެމްބަރުން ތިއްބެވި ދާއިރާތަކުގެ ރައީސުންނަކީ އެ މެމްބަރުންކަަމަށް ވިދާޅުވިއެވެ. 

މީގެ އިތުރަށް ކޮންގްރެސް ޕާޓީގެ ގަވާއިދު ބުނާގޮތުން ރައްޔިތުންގެ މަޖިލީހުގެ މެމްބަރެއްކަމަށްވިޔަސް ޕާޓީގެ އަސާސީ ގަވާއިދާ ހިލާފުވެފައިވާ މެމްބަރުންނާއި އަދި އެ މެމްބަރަކު ކުރަމުންދާ ކަމެއްގެ ސަބަބުން ޕާޓީއަށް ގެއްލުންވާނަމަ އެފަދަ މެމްބަރުން ދާއިރާގެ ރައީސްކަމުން ވަކިކުރުމުގެ ބާރު ޕާޓީގެ ލީޑާޝިޕަށް ލިބިގެންވާކަމަށް ބަޔާންވެފައިވާކަމަށެވެ.

އެފަދަ ހާލަތެއް މެދުވެރިވެގެން މެމްބަރަކު މަގާމުން ވަކިކޮށްފައިވާނަމަ އެދާއިރާއަކަށް ވެސް ރައީސުން އިންތިހާބުކުރާނެކަމަށް އަބްދުއްރަހީމް ވިދާޅުވިއެވެ.

ޕީއެންސީގެ ދާއިރާ އަދި ސްޓިއަރިން ކޮމިޓީގެ އިންތިހާބަށް ކުރިމަތިލުމުގެ ފުރުސަތު ހުޅުވާލައިފި 

ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)އަކީ އެންމެ ކުރު މުއްދަތެއްގައި ރައްޔިތުންގެ އެންމެ ބޮޑު ތާއީދާއި އިތުބާރު ހާސިލުކުރި ޕާޓީކަން ފާހަގަކުރައްވަމުން އެ ޕާޓީގެ ފިކުރަކީ ނުގުނޑާނެ ވަރުގަދަަ ފިކުރެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ދ.މީދޫގެ ކައުންސިލުގެ ރައީސްގެ މަގާމަށް ބޭފުޅަކު އިންތިހާބުކުރުމަށް ކުރިއަށްގެންދިޔަ އިތުރުބުރުގެ ވޯޓުން ޕީއެންސީއަށް ލިބުނު ކާމިޔާބު ފާހަގަކުރުމަށް އެ ރަށުގައި ބޭއްވި ޖަލްސާގައި ވާހަކަދައްކަވަމުން ރައީސްވަނީ އެ އިންތިހާބު ކާމިޔާބުކުރުމުގައި މަސައްކަތްކޮށްދެއްވި ހުރިހާ ބޭފުޅުންނަށާއި، ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީއަށް ލިބުނު ރަނގަޅު ނަތީޖާ ހޯދައިދިނުމަށް މަސައްކަތްކުރެއްވި ހުރިހާ ބޭފުޅުންނަށް ޝުކުރު އަދާކުރައްވާފައެވެ. 

އިތުރަށް އެމަނިކުފާނު ވިދާޅުވީ ޕީއެންސީއަކީ އެ ޕާޓީ އުފެދުނުތާ ކުޑަ ދުވަސްކޮޅެއްގެ ތެރޭގައި ދިވެހި ގިނަ ރައްޔިތުންގެ ތާއީދާއި އިތުބާރު ލިބިފައިވާ ޕާޓީއެއް ކަމަށެވެ. އެގޮތުން އެ ޕާޓީ ވުޖޫދުވުމަށްފަހު ބޭއްވި ގިނަ އިންތިހާބުތައް ކާމިޔާބުކުރީ ޕީއެންސީންކަން ފާހަގަކުރައްވަމުން، އެ އިންތިހާބުތަކުގައި ޕީއެންސީއަށް އިތުބާރުކޮށް ވޯޓުލީ ހުރިހާ ރައްޔިތުންނަށް އެމަނިކުފާނު ޝުކުރު އަދާކުރެއްވިއެވެ. 

ރައީސް ވިދާޅުވި ގޮތުގައި ޕީއެންސީގެ ފިކުރަކީ އިސްލާމްދީން ހިމާޔަތްކުރުމާއެކު، ދިވެހިރާއްޖޭގައި އަމާންކަމާއި ސުލްހަވެރިކަން ނަގަހައްޓައި ރާއްޖެއަށް ބޭނުންވާ ކުރިއެރުމާއި ތަރައްގީ ހޯދައިދިނުމުުގެ މަސައްކަތުގައި ސާބިތުވެ އޮންނަ ފިކުރެވެ. އެއީ ދެގޮތެއްނުވާ ގުނޑުމެއް ނާންނަ ފިކުރެއްގެ ގޮތުގައި އެމަނިކުފާނު ސިފަކުރެއްވިއެވެ. 

"ކުރިއަށްމިދަނީ އަދި ކުރިއަށް އޮތް ތަނުގައި ދާނީވެސް މި ފިކުރުގެ މަތީގައި. މާތްވެގެންވާ އިސްލާމްދީންް މަތިވެރިކޮށް އެ ދީނަށް ނަސްރުދިނުމުގެ ސިޔާސަތު އަމަލީ ގޮތުން ތަންފީޒުކުރުމާއެކު، މިގައުމުގައި ހަމަޖެހުން ގާއިމުކޮށް، ތަރައްގީ ހާސިލުކޮށްދީ، ހުރިހާ ސިފައެއްގައި ހުރިހާ މާނައެއްގައި ރައްކާތެރިކަން ކަށަވަރުކޮށްދިނުމުގެ ސިޔާސަތު ތަންފީޒުކުރުމުގައި،" ރައީސް ވިދާޅުވިއެވެ. 

އެމަނިކުފާނު ވިދާޅުވި ގޮތުގައި ފާއިތުވި މުއްދަތުގައި ސަރުކާރުން ކުރި މަސައްކަަތަކީ، އަދި ޕީއެންސީގެ ފަރާތުން ރައްޔިތުންނަށް ފެނުނުކަމަކީވެސް އެ ސިޔާސަތުތައް ތަންފީޒުކުރުމެވެ. ހަމަޖެހުމާއި ތަރައްގީއާއި ރައްކާތެރިކަން ހާސިލުކޮށްދިނުމުގެ އަމާޒަށް ދަތުރުކުރުމުގައި ސަރުކާރުން ބޮޑެތި ކާމިޔާބުތަކެއް ހާސިލުކޮށްފައިވާކަން ފާހަގަކުރެއްވިއެވެ. 

ގައުމާމެދު ވިސްނުމުގެ ގޮތުން މާޒީގައި ކަންކަންް ހިނގާފައި ހުރި ގޮތް ހަނދާންކުރަންޖެހޭކަން ފާހަގަކުރައްވަމުން ރައީސް ވިދާޅުވީ ނިމުނު ސަރުކާރުގައި ފެނުނީ ދިވެހިރާއްޖޭގެ ކަނޑުގެ ސަރަހައްދުން ބޮޑު ބައެއް، ގާނޫނުއަސާސީއާއި ގާނޫނުތަކާ ހިލާފަށް ރައްޔިތުންގެ މަޖިލީހުގެ ބަހެއް ނެތި، ދޫކޮށްލި މަންޒަރު ކަމަށެވެ. އަދި މި ސަރުކާރުގެ ބިނާކުރުމުގެ ސިޔާސަތުގެ ދަށުން އެ ސަރަހައްދު ދޫކޮށްލި ސިޓީ އަނބުރާ ގެނެސް، އެއިރު ވިއްކައިލި ނުވަތަ ދޫކޮށްލި ކަނޑުގެ ސަރަހައްދަކީ ރާއްޖޭގެ ގާނޫނުތަކުގެ ތެރެއިން މި ގައުމުގެ ސަރަަހައްދެެއްކަމަށް ކަނޑައަަޅާފައިވާނެ ކަމަށް ވިދާޅުވިއެވެ. 

"އެހެންނަމަވެސް އިންޓަނޭޝަނަލް މިންގަނޑުތައް ހުންނަ ގޮތުން އަޅުގަނޑުމެން ގާނޫނީ ގޮތުން ކުރަންޖެހޭ މަސައްކަތްތައް ކުރަންޖެހޭ. އެ މަސައްކަތް އެބަހިނގާ. ރަސްމީކޮށް އެބައި ސަރުކާރުން މިދަނީ ރަސްމީކޮށް ހިމެނުމަށް ކުރަންޖެހޭ މަސައްކަތްކުރަމުން. ހަރަދު ބޮޑު މަސައްކަތެއް، ގައުމުގެ ހައްގުގައި ކުރަންޖެހޭ ކަމެއް،" ރައީސް ވިދާޅުވިއެވެ. 

ރައީސް ވިދާޅުވި ގޮތުގައި ކުރީ ސަރުކާރުން އެ ސަރަހައްދު ދޫކޮށްލީ ގާނޫނީ ވަކީލުންނަށް އެތައް ފައިސާއެއް ދީގެން ގިނަ ހަރަދުތަކެއް ކޮށްގެންނެވެ. 

އިތުރަށް ރައީސް ވިދާޅުވީ އެމަނިކުފާނުގެ ހާރިޖީ ސިޔާސަތަކީ ދިވެހިން އިސްކުރުމުގެ ސިޔާސަތެއްކަމަށާއި ނަމަވެސް ކުރިން ކަން އޮތީ އެހެންނޫން ކަމަށެވެ. އެއިރު ރާއްޖޭގެ ހާރިޖީ ސިޔާސަތު އޮތީ ވަކި ގައުމަކުން ބޭނުންވުމުން ހުރިހާ ކަމެއް ކުރެވޭ ގޮތަށްކަމަށާއި، އެގޮތުން ވަކި ގައުމަކުން ބޭނުންވީމަ އެކުވެރި ގައުމުތަކާ އޮންނަ ގުޅުން ކަނޑައިލާ، ބައިނަލްއަގުވާމީ ޖަމްއިއްޔާ ޖަމާއަތްތަކުން ރާއްޖެ ވަކިވަމުންދިޔަކަން ރައީސް ފާހަގަކުރެއްވިއެވެ. 

"އެހެންނަމަވެސް އަޅުގަނޑުމެން އިސްކުރަނީ ދިވެހިންނަށް ކޮބައިތޯ އެންމެ ފައިދާހުރި ގޮތަކީ، މިގައުމަށް އެންމެ ފައިދާވާނެ ގޮތަކީ ކޮބައިތޯ ބަލައި އެގޮތުގައި ކުރިއަށްދާ ސިޔާސަތު. އެހެންވީމާ އަޅުގަނޑުމެންނަކާ ރުޅި ގައުމެއް ނޯންނާނެ. މިދެންނެވި ސިޔާސަތުގެ ދަށުން، ދިވެހި ރައްޔިތުންގެ ތަރައްގީއަށް އެހީތެރިވާނަމަ އެ ގައުމަކާ ގާތް ގުޅުން އޮންނާނެ،" ރައީސް ވިދާޅުވިއެވެ. 

މި ސަރުކާރުގައި ހާރިޖީ ގުޅުން ނޯންނާނީ އިސްރާއީލާއެކުކަން ފާހަގަކުރައްވަމުން ރައީސް ވިދާޅުވެދެއްވީ ކުރީގެ ވެރިކަމެއްގައި އިސްރާއީލާ ގުޅުން ގާއިމުކުރަން މަސައްކަތްކޮށް، އެގައުމުން ލޮލުގެ ޑޮކްޓަރުން ގެނެސް، އިސްރާއީލާއި ރާއްޖެއާ ދެމެދުގައި ވައިގެ ދަތުރުފަތުރު ފަށަންް ވިސްނި ގޮތެވެ. އަދި އެ ސަރުކާރުގެ ވިސްނުމާ އަޅައިކިޔުއްވަމުން ރައީސް ވިދާޅުވީ މި ސަރުކާރަކީ އިސްރާއީލު ޕާސްޕޯޓުގައި ރާއްޖެއަށް އެތެރެނުވެވޭނެ ކަމަށް ކަނޑައެޅި ސަރުކާރު ކަމަށެވެ. 

މި ސަރުކާރުގެ މަދަކީ އިސްލާމްދީނަށް ނަސްރު ދިނުންކަން ފާހަގަކުރައްވަމުން ރައީސް ވިދާޅުވީ، ކުޑަކުދިންނާ ހަމައިން ފެށިގެން ދޮށީ އުމުރުގެ މީހުންނާ އެންމެނާ ގުޅިގެން ތަންފީޒުކުރާ ކޮންމެ ސިޔާސަތެއްގެ އަސާސަކީވެސް އިސްލަމްދީންކަމަށް ރައީސް ވިދާޅުވިއެވެ. 

ޕީއެންސީގެ ފިކުރަކީ އިސްލާމްދީނަށް ނަސްދުރުދީ ހަމަޖެހުން ގާއިމުކޮށް ތަރައްގީކުރާ ފިކުރު: ރައީސް 

މި ސަރުކާރުން މިހާރު ފަށާފައި ހުރި މަޝްރޫއުތަކާއި އަދި އަލަށް ފަށަން ހުރި މަޝްރޫއުތަކާއެކު ޖުމްލަ 2،645 މަޝްރޫއެއް ހިންގުމަށްޓަކައި އެ މަޝްރޫއުތައް ކުރިއަށްގެންދާނެ ގޮތުގެ ޕްލޭން އެކުލަވައިލާ ތަންފިޒުކުރާނެ ގޮތް ކަނޑައަޅައި ނިމިފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މިފަދައިން ވިދާޅުވީ ދ.މީދޫގައި މިރޭ ކުރިއަށްގެންދިޔަ ޕީއެންސީގެ ޖަލްސާގައި ދެއްކެވި ވާހަކަފުޅުގައެވެ. މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ތެލުގެ އަގު ބޮޑުވުމާއި އަދި އިމާރާތްކުރުމުގެ މަސައްކަތަށް ބޭނުންވާ ސާމާނު ހޯދުމާއި ރާއްޖެ ގެނައުމުގައި ވަރަށް ގިނަ ގޮންޖެހުންތައް ކުރިމަތިވިކަން ފާހަގަކުރައްވައި ރައީސް ވިދާޅުވީ އެ ގޮންޖެހުން ސަރުކާރަށާއި އަމިއްލަ ވިޔަފާރިތަކަށްވެސް ކުރިމަތިވި ކަމަށެވެ. 

އެމަނިކުފާނު ވިދާޅުވި ގޮތުގައި އެ ގޮންޖެހުންތަކުން އަރައިގަތުމަށް ސަރުކާރުން ކުރި މަސައްކަތްތަކުގެ ނަތީޖާއެއްގެ ގޮތުން އެ މައްސަލަތައް މިހާރު ދަނީ ހައްލުކުރެވެމުންނެވެ. އަދި ކުރިއަށް އޮތް ދުވަސްތަކުގައި ސަރުކާރުގެ މަސައްކަތްތަކުގެ ދުވެލި ހަލުއިކުރެވިގެންދާނެކަމުގެ ޔަގީންކަން އެމަނިކުފާނު ދެއްވިއެވެ. 

"އަަޅުގަނޑުމެން މިހަފުތާ ތެރޭގައި މިއަދު އެންމެ ފަހުން ކެބިނެޓުގައި މަޝްވަރާކޮށް ހުރިހާ މަޝްރޫއެއްގެ ތަރުތީބު ކަނޑައަޅައި ނިންމާފައި. އާދެ، މިހާރު ސޮއިކުރެވިފައި ހުރި މަޝްރޫއުތަކާއި، މިއަހަރު އަލަށް ސޮއިކުރަން ހުރި މަޝްރޫއުތަކާއި، އަދި މި އަންނަ އަހަރު އަޅުގަނޑުގެ ވައުދުތައް ފުއްދުމަށް ދެން ސޮއިކުރަން ހުރި މަޝްރޫއުތައް އެއްކޮށްލާއިރު، 2،645 މަޝްރޫއެއް ހިމެނޭ. މި 2،645 މަޝްރޫއު ގެންދާނެ ގޮތް އަޅުގަނޑުމެން މިހާރުވަނީ ޕްލޭންކޮށްފައި،" ރައީސް ވިދާޅުވިއެވެ. 

އެމަނިކުފާނު ވިދާޅުވި ގޮތުގައި އެ ޕްލޭނުގައި ހިމެނެނީ މަޝްރޫއުތައް ނިންމުމުގައި އިސްކަންދޭނީ ކޮން ބާވަތެއްގެ މަޝްރޫއުތަކަކަށްކަމާއި، ކޮންމެ މަހަކަށް ނިންމުމަށް އަމާޒުކުރާނެ މަޝްރޫއުތަކާއި މަޝްރޫއުތަކަށް ހަރަދުކުރުމާއެކު، އަދާކުރަންޖެހޭ ދަރަނިތައް ބަރާބަރަށް އަދާކުރަމުން ދައުލަތަށް ލިބޭ އާމްދަނީ ބެލެހެއްޓޭނެ ގޮތްތަކެކެވެ. 

ރައީސް ވިދާޅުވީ ސަރުކާރުން ކަނޑައަޅާ ތަވާލާ އެއްގޮތަށް މަޝްރޫއުތަކުގެ މަސައްކަތްކުރިއަށްގެންދާނީ އެއްވެސް މަޝްރޫއެއް އެކީ ނުހުއްޓޭނެކަން ކަށަވަރުކުރެވޭ ގޮތަށެވެ. އަދި އެމަނިކުފާނު ރަށްރަށަށް ވެވަޑައިގެންފައިވާ ހުރިހާ ވައުދުފުޅުތަކެއް ހަގީގަތަކަށް ހެދުމަށް މަސައްކަތްކުރެވިގެންދާނެ ކަމށް ވިދާޅުވިއެވެ. 

ރައީސް ވިދާޅުވީ މި ސަރުކާރުން ކަންކަން ކުރަމުންދަނީ ޕްލޭނެއްގެ ތެރެއިންކަމަށާއި، އެ ޕްލޭނުގައި ތަރައްގީގެ މަޝްރޫއުތައް ކުރިއަށްގެންދިއުމާއެކު، ބަޖެޓުތަކުގެ ޑެފިސިޓުވެސް ދެމެހެއްޓެނެވި މިންގަނޑުތަކެއްގެ ތެރޭގައި ހިފަހެއްޓުން ކަމަށެވެ. 

ދަރަނި އަދާކުރަމުން ހުއްޓުމެއް ނެތި ތަރައްގީގެ މަޝްރޫއުތައް ހިންގާނެ ޕްލޭނު އެބައޮތް: ރައީސް 

ފާއިތުވި އަހަރުތަކުގައި ކުރީގެ ސަރުކާރުތަކުން ނަގާފައިވާ ދަރަންޏާއި އެ ދަރަނި އަދާކުރުމަށް ސަރުކާރުން ކުރި ހަރަދުތަކާއި މުސްތަގުބަލުގައި ދައްކަން ހުރި ދަރަނީގެ ހިސާބުތައް ހާމަކުރައްވައި، މި ސަރުކާރު ވެރިކަމަށް އައިއިރު ގައުމު ވައްޓާލާފައި އޮތް ދަރަނީގެ އަނދަވަޅުގެ ފުންކަން ވަރަށް ތަފުސީލުކޮށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެދެއްވައިފިއެވެ. 

ދ.މީދޫގެ ކައުންސިލުގެ ރައީސްގެ މަގާމަށް ބޭފުޅަކު އިންތިހާބުކުރުމަށް ކުރިއަށްގެންދިޔަ އިތުރުބުރުގެ ވޯޓުން ޕީއެންސީއަށް ލިބުނު ކާމިޔާބު ފާހަގަކުރުމަށް އެ ރަށުގައި ބޭއްވި ޖަލްސާގައި ވާހަކަދައްކަވަމުން ރައީސްވަނީ މި ސަރުކާރުން ބޭރުގެ ދަރަނި އަދާކުރުމަށް ހަރަދުކުރި ފައިސާގެ އަދަދުތަކާއި ކުރީ ސަރުކާރުތަކުގައި ދަރަނި އަދާކުރުމަށް ހޭދަކުރި އަދަދުތައް ވިދާޅުވެދެއްވާފައެވެ. 

ރައީސް ވިދާޅުވި ގޮތުގައި މި ސަރުކާރުން ފާއިތުވި ދެ އަހަރާއި ބައިގެ ތެރޭގައި ބޭރުގެ ދަރަނި އަދާކުރުމަށް ޖުމްލަ 1.2 ބިލިއަން އެމެރިކާ ޑޮލަރު ހަރަދުކުރިއެވެ. 2018 ވަނަ އަހަރު ގާއިމުކުރެވުނު އެމްޑީޕީގެ ވެރިކަމުގެ ފުރަތަމަ ދެ އަހަރާއި ބައިގެ ތެރޭގައި ބޭރުގެ ދަރަނި ދެއްކުމަށް ހަރަދުކުރީ 428.68 މިލިއަން ޑޮލަރެވެ. އަދި ރައީސް އަބްދުﷲ ޔާމީނުގެ ވެރިކަމުގެ ފުރަތަމަ ދެ އަހަރައި ބައިގެ ތެރޭ ބޭރުގެ ދަރަނި އަދާކުރުމަށް ހަރަދުކުރީ 191.25 މިލިއަން ޑޮލަރެވެ. 

އެމްޑީޕީގެ ވެރިކަމުގެ ފަސް އަހަރު ތެރޭ ބޭރުގެ ދަރަނި އަދާކުރުމަށް ހަރަދުކޮށްފައިވަނީ 953.93 މިލިއަން ޑޮލަރެވެ. އަދި ރައީސް ޔާމީނުގެ ވެރިކަމުގައި 2013 އިން 2018 އަށް ބޭރުގެ ދަރަނި އަދާކުރުމަށް ހަރަދުވީ 418.17 މިލިއަން ޑޮލަރެވެ. 

"މިދިޔަ ދެ ސަރުކާރުގެ ފަސް އަހަރުގައި ދެއްކި އަދަދުވެސް އަޅުގަނޑުމެންނަށްވުރެ މަދުކަން ޗާޓުން ފެނޭ.،" ރައީސް ވިދާޅުވިއެވެ. 

ރައީސްވަނީ މި ސަރުކާރުން އަދާކުރި 1.29 ބިލިއަން ޑޮލަރުގެ ދަރަންޏަކީ ކޮން ސަރުކާރަކުން އުފަންކުރި ދަރަނިކަން ހާމަކުރައްވާފައެވެ. އެ ފައިސާގެ ތެރެއިން 2023 ވަނަ އަހަރުން ފެށިގެން 2026 ގެ ނިޔަލަށް އަލަށް އުފަންވި ދަރަންޏަކީ 4.9 މިލިއަން ޑޮލަރެވެ. 

މި ސަރުކާރުން ދައްކައި ހަލާސްކުރި ދަރަނީގެ ތެރެއިން އެންމެ ބޮޑު އިންސައްތައަކީ 2018 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް އެއިރު އޮތް އެމްޑީޕީ ސަރުކާރުގައި އުފެއްދި ދަރަންޏެވެ. އެއީ 891.2 މިލިއަން ޑޮލަރެވެ. 2013 އާއި 2018 އާ ދެމެދުގެ ސަރުކާރުން އުފެއްދި 195.7 މިލިއަން ޑޮލަރުގެ ދަރަނި މި ސަރުކާރުން ދައްކައި ހަލާސްކުރިއެވެ. 

އަދި 2008 އިން 2013 އާ ދެމެދުގައި އެއިރުގެ ދެ ސަރުކާރުން އުފެއްދި ދަރަނީގެ ތެރެއިން 62.5 މިލިއަން ޑޮލަރު މި ސަރުކާރުން ދައްކައި ހަލާސްކުރިއިރު، 2008 ގެ ކުރިން އެއިރުގެ ސަރުކާރުން ނަގާފައިވާ ދަރަނީގެ ތެރެއިން 38.1 މިލިއަން ޑޮލަރު މި ސަރުކާރުން ދައްކައި ހަލާސްކުރިއެވެ. 

"އެހެންވީމާ މީގެ ކުރީގެ ސަރުކާރުތަކުން ކުރީގެ ހުރިހާ ރައީސުން ނަގާފައި ހުރި ދަރަނިތައް އަޅުގަނޑުމެން ދައްކާފައި މިހުރީ.،" ރައީސް ވިދާޅުވިއެވެ. 

މި ސަރުކާރުން ދެއްކި ދަރަނީގެ އިތުރަށް އެކި ސަރުކާރުތަކުން އުފައްދާފައިވާ ދަރަނީގެ ތެރެއިން ކުރިއަށް އޮތް ތަނުގައި ދައްކަން ހުރި ދަރަނީގެ ތަފުސީލުތައްވެސް ރައީސް ހާމަކުރެއްވިއެވެ. މި ސަރުކާރުން ނެގި ދަރަނީގެ ތެރެއިން ކުރިއަށް އޮތް އަހަރުތަކުގައި ދައްކަންޖެހޭ ދަރަނީގެ ގޮތުގައި އޮތީ 219.7 މިލިއަން ޑޮލަރެވެ. 

ނަމަވެސް 2018 އިން 2023 އަށް އެމްޑީޕީގެ ސަރުކާރުން ނަގާފައިވާ ދަރަނީގެ ތެރެއިން ކުރިއަށް އޮތް ތަނުގައި ދައްކަންޖެހޭ 1.14 ބިލިއަން ޑޮލަރުގެ ދަރަނި އޮތްއިރު 2013އާއި 2018 އާ ދެމެދުގައި ނަގާފައިވާ ދަރަނީގެ ތެރެއިން 710.4 މިލިއަން ޑޮލަރު ދައްކަން އޮތްއިރު، 2008 އިން 2013އާ ދެމެދުގައި ނަގާފައި އޮތް ދަރަނީގެ ތެރެއިން 150.4 މިލިއަން ޑޮލަރު ދައްކަންް އެބައޮތެވެ. އަދި 2008ގެ ކުރިން ނަގާފައިވާ ދަރަނީގެ ތެރެއިން 106.3 މިލިއަން ޑޮލަރު ކުރިއަށް އޮތް މުއްދަތުގައި ދައްކަންޖެހިފައި އެބައޮތެވެ. 

"މިއީ ރައްޔިތުންގެ ބޮލުގައި އެޅިފައިހުރި މިދިޔަ ހުރިހާ ރައީސުން ނަންގަވާފައި ހުރި ދަރަނިތައް. އަޅުގަނޑުމެން އިހައްދުވަހު 1.29 ބިލިއަން ޑޮލަރު ދެއްކީމައި އަދިވެސް ދައްކަން ހުރި ވަރު. އެހެންވީމާ މިއީ ކަންކަން ހުރި ހިސާބު. އަނދަވަޅުގެ ފުންމިން. މި އަނދަވަޅުން ނަގަން އަޅުގަނޑުމެން މަސައްކަތް މިކުރަނީ، ގައުމު އިސްކޮށްގެން.،" ރައީސް ވިދާޅުވިއެވެ. 

ރައީސް އިތުރަށް ފާހަގަކުރެއްވީ އެމަނިކުފާނު ވެރިކަމާ ހަވާލުވެވަޑައިގަތްއިރު ގައުމީ އުފެއްދުންތެރިކަމުގެ ނިސްބަގުން 123.6 އިންސައްތާގައި ހުރި ދަރަނި މި ސަރުކާރުން މިހާރު ގައުމީ އުފެއްދުންތެރިކަމުގެ ނިސްބަތުން 121.2 ނިސްބަތަށް ތިރިކޮށްފައިވާ ކަމެވެ. 

ދަރަނީގެ ހިސާބުތަކުން ރައީސް ވިދާޅުވެދެއްވީ ކުރީ ސަރުކާރުން ގައުމު ވައްޓާލާފައި އޮތް އަނދަވަޅުގެ ފުންކަން 

ނިމިދިޔަ ލޯކަލް ކައުންސިލު އިލެކްޝަނުގައި އިންތިހާބަށްފަހު ވޯޓު ގުނުމުގައި ދިމާވި މައްސަލަތަކާ ގުޅިގެން ވޯޓު ބާތިލުކުރި ދ.މީދޫ ކައުންސިލު ރައީސްގެ ގޮނޑީގެ އިތުރުބުރުގެ އިންތިހާބު ޕީއެންސީގެ ފަރާތުން އެ ގޮނޑިއަށް ވާދަކުރެއްވި ސުހާ އިބްރާހީމް ކާމިޔާބުކުރައްވައިފިއެވެ. 

މި އިންތިހާބުގައި ސުހާއާ ވާދަކުރެއްވީ މޯލްޑިވްސް ޑިމޮކްރެޓިކް އެލައިންސްގެ ކެންޑިޑޭޓު މުހައްމަދު ޝާހިދެވެ. ހެނދުނު 8:00 ގައި ފެށި އިންތިހާބުގައި 1،049 މީހަކަށް ވޯޓުލުމުގެ ހައްގު ލިބިފައިވެއެވެ. މީދޫގައި ދެ ފޮށި އަދި މާލޭގައި ފޮށްޓެއް ބަހައްޓާފައިވެއެވެ. 

އިންތިހާބުގެ ނަތީޖާ ދައްކާ ގޮތުން ސުހާއަށް 529 ވޯޓު ލިބިވަޑައިގަތެވެ. ޝާހިދަށް ލިބިވަޑައިގެންފައިވަނީ 449 ވޯޓެވެ. 

މި އިންތިހާބު ބާއްވަންޖެހުނީ މީގެ ކުރިން ބޭއްވި އިންތިހާބުގައި ޝާހިދަށް 392 ވޯޓު އަދި ސުހާއަށް 393 ވޯޓު ލިބިވަޑައިގެންފައިވަނިކޮށް އެމްޑީއޭއިން އެދިގެން އަލުން ވޯޓު ގުނިއިރު ސުހާއަށް ލިބުނު ދެވޯޓު ބާތިލުކަމަަށް ކަނޑައެޅުމާ ގުޅިގެން ޕީއެންސީއަށް ހުށަހެޅި މައްސަލައެއްގައި ހައިކޯޓުން ނިންމި ނިންމުމަކާ ގުޅިގެންނެވެ. 

ހައިކޯޓުން ނިންމާފައިވަނީ ބާތިލުކަމަަށް ކަނޑައެޅި ދެ ވޯޓުގެ ތެރެއިން އެއް ވޯޓަކީ ސައްހަ ވޯޓެއް ކަމަށެވެ. ކޯޓުގެ އެ ނިންމުމާއެކު ދެ ކެންޑިޑޭޓުންގެ ވޯޓު އެއްވަރުވެ ދެ ބޭފުޅުންނަށްވެސް ލިބިވަޑައިގަތީ 392 ވޯޓެވެ. އެއާއެކު އަލުން ވޯޓު ނެގުމަށް ނިންމީއެވެ. 

މިއަަދުގެ އިންތިހާބު ސުހާ ކާމިޔާބުކުރެއްވިއިރު މީގެ ކުރިން ބުރުގައި އެ ރަށު ކައުންސިލުގެ މެންބރުކަމަށް ހޮވިވަޑައިގެންފައިވާ ހުސައިން ރަޝީދާއި، ކައުންސިލުގައި އަންހެނުންނަށް ހާއްސަކުރި ގޮނޑި ކާމިޔާބުކުރެއްވި މިސްކާ އަބްދުއް ރަހްމާނަކީވެސް ޕީއެންސީއަށް ނިސްބަތްވެވަޑައިގަންނަވާ ދެ ބޭފުޅުންނެވެ. އެހެންކަމުން މީދޫ ކައުންސިލުގެ ހުރިހާ ގޮނޑިއެއްވެސް މިހާރު ކާމިޔާބުވެފައިވަނީ ޕީއެންސީއަށެވެ. 

ދ.މީދޫ ކައުންސިލު ރައީސް އިންތިހާބުކުރުމުގެ އިތުރުބުރު ޕީއެންސީގެ ކެންޑިޑޭޓު ކާމިޔާބުކުރައްވައިފި 

ރައްޔިތުންގެ މަޖިލީހުގެ މެންބަރުންގެ ގޮތުގައި ކޮންމެ ފިކުރެއްގެ މެންބަރަކު ހުއްޓަސް ޕީޕަލްސް ނޭޝަނަލް ކޮންގްރެސް (ޕީއެންސީ) އިން އަބަދުވެސް މަސައްކަތްކުރާނީ ރައްޔިތުންގެ ފައިދާއާއި ރާއްޖޭގެ ކުރިއެރުމަށް ކަމަށް ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ. 

ރޭ ޕީއެންސީގެ މައި ޖަގަހައިގައި އޮތް ޖަލްސާގައި ރާފިޢު މިފަދައިން ވިދާޅުވީ، މިދިޔަ ހޮނިހިރު ދުވަހު ނިމުނު ހިތަދޫ އުތުރު ދާއިރާގެ ބައި-އިލެކްޝަނާ ގުޅޭގޮތުން ވާހަކަފުޅުދައްކަވަމުންނެވެ. 

ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީގެ ފަރާތުން ކެމްޕޭން މެނޭޖަރެއްގެ ދައުރު އަދާކުރެއްވީ ވަޒީރު ރާފިޢު އެވެ. އިންތިޚާބު ޕީއެންސީއަށް ގެއްލުނީ އެންމެ 62 ވޯޓުގެ ތަފާތުންނެވެ. ވަޒީރު ވިދާޅުވީ، ހިތަދޫގައި ބެހެއްޓި ވޯޓުފޮށިތަކުން ކުރި ލިބުމަކީ، ކުރިއަށްދާން ކޮށުނު މަގެއް ކަމަށެވެ.

"އަޅުގަނޑުމެންގެ މިނިސްޓްރީން މަސައްކަތްކުރަނީ ރައްޔިތުންނާ ގާތުން ރައްޔިތުންނަށް ފައިދާ ލިބޭނޭ ގޮތަށް. އެއީ ޒުވާނުންގެ ބާރުވެރިކަމުގައި ވިޔަސް. ﷲ އިރާދަކުރެއްވިއްޔާ ކޮންމެ މެންބަރެއް ހުއްޓަސް މި ސަރުކާރުން އަޅުގަނޑުމެން މަސައްކަތްކުރާނީ ރައްޔިތުންނާ ގާތުން، މަސައްކަތް ކުރާނީ ރައްޔިތުންގެ ފައިދާއަށް އަޅުގަނޑުމެން މަސައްކަތްކުރާނީ. ރާއްޖޭގެ ކުރިއެރުމަށް އަޅުގަނޑުމެން މަސައްކަތްކުރާނީ" ރާފިޢު ވިދާޅުވިއެވެ. 

ވަޒީރު ވިދާޅުވީ އިލެކްޝަނުގެ ކުޑަ ދުވަސްކޮޅުގެ ތެރޭގައި ކުރި ބުރަސް މަސައްކަތުން ހާމަވަނީ، ޕީއެންސީގެ ތެރޭގައި އޮތް އެއްބައިވަންތަކަމާއި އަހުވަންތަކަން ކަމަށެވެ. ހިތަދޫ އުތުރު ދާއިރާއަށް ބަލާއިރު ހަމައެކަނި ކުޅިވަރުގެ ދާއިރާއިންވެސް މަސައްކަތްތައް ނިންމާ ރައްޔިތުންނާ ހަވާލުކުރެވޭނެކަން ޔަގީންވެފައިވާކަމަށް ރާފިޢު ވިދާޅުވިއެވެ. 

"މި ދާއިރާއަށް އަޅުގަނޑުމެންނަށް ވަރަށް ގިނަ މަސައްކަތްތަކެއް ކުރެވިއްޖެ ރައްޔިތުންގެ އެދޭ އެދުންތައް ފުއްދައިދިނުމަށްޓަކައި. ހަމައެކަނި ކުޅިވަރުގެ ދާއިރާއަށް ބަލާލިޔަސް، އެއީ ދުޅަހެޔޮކަމަށްޓަކައި އައުޓްޓޯ ޖިމެއް ހެދުންކަމުގައި ވިޔަސް ފުޓްސަލް ދަނޑު ގާއިމުކުރުމުގައި ވިޔަސް، ކުޑަދުވަސްކޮޅެއްގެ ތެރޭގައި އަޅުގަނޑުމެން މިގޮތަށް މަސައްކަތްކޮށްފިއްޔާ އެކަން ނިންމާ ރައްޔިތުންނަށް އެކަމުގެ މަންފާ ލިބޭނެކަން އަޅުގަނޑުމެންނަށް މި އިލެކްޝަންގައި ހާމަވެގެން ހިނގައްޖެ" ރާފިޢު ވިދާޅުވިއެވެ. 

ރާފިޢު ވަނީ ކެމްޕޭނުގައި މަސައްކަތްކުރެއްވިއިރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތުން ލިބިވަޑައިގަތް އެއްބާރުލުން ފާހަގަކުރައްވައި އެމަނިކުފާނަށް ޝުކުރުއަދާކުރައްވައިފައެވެ. އަދި، ޕީއެންސީގެ ލީޑަރޝިޕްގެ ބޭފުޅުންނާއި ކެމްޕޭން ޓީމުތަކުގެ މަސައްކަތް ފާހަގަކުރައްވައި ރާފިޢު ޝުކުރުއަދާކުރެއްވިއެވެ. 

މަަޖިލީހުގައި ހުރި މެންބަރުގެ ޕާޓީއަށް ނުބަލައި ރައްޔިތުންގެ ފައިދާއަށް މަސައްކަތްކުރާނެ: ވަޒީރު ރާފިއު 

ކޮންގްރެސް ޕާޓީގައި ތިއްބެވީ ގައުމަށް ވަފާތެރިންކަމަށާއި، މަގާމުތަކުގައި އެ ޕާޓީ ތަމްސީލުކުރައްވާ މެމްބަރުންނަކީ ފެންވަރު މަތިވެގެން އުޅެން ބޭނުންވާ ބައެއް ނޫންކަމަށް ރައްޔިތުންގެ މަޖިލީހުގެ ނައިބު ރައީސް އަދި އޭދަފުށީ ދާއިރާގެ މެމްބަރު އަހުމަދު ސަލީމް ރޭ ވިދާޅުވެއްޖެއެވެ.

ކޮންގްރެސް ޕާޓީގެ ހަރުގޭގައި ރޭ ބޭއްވި ޖަލްސާގައި ސަލީމް ވިދާޅުވީ މަޖިލީހުގެ ނައިބު ރައީސްކަމުގެ މަގާމު ބޭނުންފުޅު ނުވާ ކަމަށާއި އެ މަގާމާ ހަވާލުވެވަޑައިގަތީ ޕާޓީގެ ހާލަތާއި މަސްލަހަތާއި އެކުވެރިކަމާއި ޕާޓީގެ ގުޅުން ބަދަހިކޮށް ވަރުގަދަ ކުރުމުގެ ބޭނުމުގައި ކަމަށެވެ.

އަދި އަމިއްލަ މަސްލަތަކަށްވުރެ ގައުމީ މަސްލަހަތު މާ މުހިންމުކަމަށް ސަލީމް ވިދާޅުވިއެވެ. ރައްޔިތުންގެ މަޖިލީހުގެ ނައިބު ރައީސްގެ ހައިސިއްޔަތުން ދައުލަތުން ކާރާއި ސެކިއުރިޓީ ހަމަޖައްސައިދިނުމަށް ނޭދޭ ކަމަށް ވެސް ސަލީމް ރޭގެ ޖަލްސާގައި ވިދާޅުވިއެވެ. 

"އަޅުގަނޑު ބުނިން ހަވާލެއް ނުވާނަމޭ. އަޅުގަނޑު މިހާރު ވެސް ދާގޮތަށް މީހެއްގެ ސައިކަލް ފަހަތުގައޭ ދާނީ. އެހެންވީމަ އަޅުގަނޑަކީ މާ މަތީ ފެންވަރުގައި އުޅެން ބޭނުންވާ މީހެއް ނޫން. ދެން އެންގީ ސެކިއުރިޓީ ކޮންމެހެން ވެސް ހޯދަން ޖެހޭ އެއްޗެއް ކަމަށް. އަޅުގަނޑު ދަންނަވައިފިން އަޅުގަނޑުގެ ސެކިއުރިޓީ ހެއްދެވި ފަރާތާ ހަވާލުކޮށްފީމޭ. އިތުރަކަށް ސެކިއުރިޓީއެއް ބޭނުމެއް ނޫނޭ،". ސަލީމް ވިދާޅުވިއެވެ.

މިފަހުން ސިއްހީ ހާލު ހުރިގޮތުން ގިނަ ވަގުތު މަސައްކަތްޕުޅުގައި ނޫޅުއްވޭތީ ގާބިލު އެހެން ބޭފުޅަކަށް މަގާމު ދެއްވުމުގެ ގޮތުން ސަރުކާރުގެ މާލީ ވަޒީރުކަމުގެ މަގާމުން މޫސާ ޒަމީރު އިސްތިއުފާ ދެއްވުމުން ވެސް އެކަން އެނގޭ ކަމަށް ސަލީމް ވިދާޅުވިއެވެ. ސަލީމް ވިދާޅުވީ ޕީއެންސީގައި ތިއްބެވީ ގައުމަށް އިހްލާސްތެރި، ވަފާތެރި ބޭފުޅުންކަމަށެވެ. 

"އޭގެ މާނައަކީ އަޅުގަނޑުމެންގެ ތެރާގައި ތިއްބެވި ހުރިހާ ބޭފުޅުންނަކީވެސް އެފަދަ ބޭފުޅުންނޭ، ގައުމަށް އިހުލާސްތެރި، ވަފާތެރި ބޭފުޅުންނޭ. މާ ފެންވަރު މަތިވެގެން އުޅެން ބޭނުންވާ ބައެއް ނޫނޭ،". ސަލީމް ވިދާޅުވިއެވެ.

ރައްޔިތުންގެ މަޖިލީހުގެ ނައިބުރައީސްކަމަށް ސަލީމް އައްޔަނުކުރެއްވީ މި މަހުގެ ފުރަތަމަ ދުވަހު 62 މެމްބަރުންގެ ވޯޓާ އެކުގައެވެ. 

ޕީއެންސީގައި ތިބީ ގައުމަށް ވަފާތެރި ދިވެހި ދަރިން: ސަލީމު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ޤައުމު އިސްކުރުމުގައި ނަމޫނާ ދައްކަވަމުންގެންދަވާ ބޭފުޅެއް ކަމަށް ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯ، އަބްދުﷲ ނާޒިމް އިބްރާހީމް ވިދާޅުވެއްޖެއެވެ. 

ކުރިން ހެލްތު މިނިސްޓަރުކަން ކުރެއްވި ނާޒިމް މިފަދައިން ވިދާޅުވީ ރޭ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބޭއްވި ޕާޓީގެ ޖަލްސާގައި ވާހަަކަފުޅުދައްކަވަމުންނެވެ. 

ނާޒިމް ވިދާޅުވީ، ޕީއެންސީން އަބަދުވެސް އިސްކުރާނީ ޤައުމު ކަމަށާއި، ޤައުމަށް ދިމާވި ޙާލަތްތަކުގައި މެންބަރުން ތިބީ އަބަދުވެސް ޤައުމު އިސްކޮށްގެން ކަމަށެވެ. 

"އަޅުގަނޑުމެންނަކީ އަޅުވެތިކަމާ ދެކޮޅަށް އަޑުއުފުލި މީހުން. އަޅުގަނޑުމެންނަކީ މި ޤައުމު ދަރަނިވެރިވަމުން ދާތީވެ އެކަމާ ދެކޮޅަށް ވަކާލާތު ކުރި މީހުން، އަޅުގަނޑުމެންނަކީ މި ޤައުމުގެ ކަނޑުން ބައެއް ވިއްކާލުމާ ދެކޮޅަށް ޖިހާދުކުރި ވެސް މީހުން. އެކަން ކުރުމުގެ ފުރުސަތު އަޅުގަނޑުމެންނަށް ލިބުނީ ކާމިޔާބީގައިވެސް އަޅުގަނޑުމެން ޤައުމު އިސްކުރީތީ ނާކާމިޔާބީގައިވެސް އަޅުގަނޑުމެން ޤައުމު އިސްކުރީތީ." ނާޒިމް ވިދާޅުވިއެވެ. 

ރައީސުލްޖުމްހޫރިއްޔާ ޑރ. މުޢިއްޒު ޤައުމާ ޙަވާލުވެވަޑައިގެންނެވިއިރު އޮތް ޙާލަތު ނާޒިމް ތަފްސީލުކޮށްދެއްވިއެވެ. ނާޒިމް ވިދާޅުވީ އޭރު ޞިއްޙީ ވަޒީރު އޮފީހަށް ވަޑައިގެންނެވިއިރު އޮތީ ވެންޓިލޭޓަރުތަކުގެ ވައްކަމުގެ ބޮޑު މައްސަލައެއް ކަމަށެވެ. މަސްވެރިކަމާ ބެހޭ ވަޒީރު އެ ވުޒާރާއާ ޙަވާލުވެވަޑައިގެންނެވިއިރު މަސްވެރިންނަށް ނުދީ އެތައް މިލިއަން ފައިސާއެއް އޮތްކަން ވަޒީރު ފާހަގަކުރެއްވިއެވެ. އެއާއެކު މަސްވެރި އާއިލާތައް ތިބީ ބިކަވެފައިކަން ނާޒިމް ފާހަގަކުރެއްވިއެވެ. މާލީ ވަޒީރު އޮފީހަށް ވަޑައިގެންނެވިއިރު ޤައުމު އޮތް ދަރަނީގެ ހާލަތާއި ބިލްތަކަށް ހުރީ ފައިސާ ނުދެއްކިކަމަށް ވަޒީރު ވިދާޅުވިއެވެ. 

މިއަދު ވިސްނަންވީ އޭރު އޮތް ހާލަތާއި މިހާރު ހާލަތު ކަމަށް ވަޒީރު ވިދާޅުވިއެވެ. އެ ހާލަތުން އަރައިގަނެ ޤައުމު ބަދަލުކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށް ނާޒިމް ވިދާޅުވިއެވެ. މިދިޔަ ދުވަސްތަކުގައި ކާމިޔާބީއާއި ނާކާމިޔާބީގެ ރަހަ ޕީއެންސީން ދެކުނީ ޤައުމު އިސްކުރާ ޙާލުގައި ކަމަށާއި، އެކަން ރައީސުލްޖުމްހޫރިއްޔާ ނަމޫނާ ދައްކަވާކަން ނާޒިމްގެ ވާހަކަފުޅުގައި ފާހަގަކުރެއްވިއެވެ. 

"އަޅުގަނޑުމެން މި ދެ ރަހަ (ކާމިޔާބީއާއި ނާކާމިޔާބީގެ) ދެކުނީ ވެސް ޓީމެއްގައި ގޮތުގައި އަޅުގަނޑުމެން އެންމެން ކުރި ބުރަ މަސައްކަތުން. އެކަތިގަނޑެއްގެ ގޮތުގައި ކުރި މަސައްކަތުން. ސަބަބަކީ އަޅުގަނޑުމެންނަކީ އަބަދުވެސް ޤައުމު އިސްކުރާ ބަޔަކަށްވާތީ. އަޅުގަނޑުމެންގެ މިއަދުގެ ރައީސް، ރައީސް ޑރ. މުޙައްމަދު މުޢިއްޒަކީ އެކަމުގަ ނަމޫނާ ދައްކަވަމުންގެންދަވާ ސިޔާސީ ލީޑަރެއް" ނާޒިމް ވިދާޅުވިއެވެ. 

ނާޒިމް ވިދާޅުވީ އަސާސީ ތަރައްޤީގެ އެންމެހާ ކަންކަމަކީ ކޮންމެ ޤައުމެއްގައިވެސް އަބަދުވެސް ދެމުންގެންދާ ޚިދުމަތެއް ކަމަށެވެ. އެކަންކަން ކުރަންޖެހެނީ ޓައިމްލައިން ހަދައިގެން ތަރުތީބެއްގެ މަތީން ކަމަށާއި، މި ސަރުކާރުން އެކަން އެގޮތަށް ކުރަމުންގެންދާކަން ފާހަގަކުރެއްވިއެވެ. 

ޕީއެންސީން ބޭއްވި ޖަލްސާ ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް އެވެ. އެމަނިކުފާނުގެ އަރިހުގައި ރައްޔިތުންގެ މަޖިލީހުގެ ނައިބު ރައީސް އަޙްމަދު ސަލީމާއި ޕީޖީ ލީޑަރު އިބްރާހީމް ފަލާހުގެ އިތުރުން ވަޒީރުންނާއި، ރައްޔިތުންގެ މަޖިލީހުގެ މެންބަރުންނާއި ޕާޓީގެ އިސްބޭފުޅުން ވަޑައިގެންނެވިއެވެ. އަދި ގިނަ އަދަދެއްގެ ޕީއެންސީގެ ސަޕޯޓަރުން ޖަލްސާގައި ބައިވެރިވިއެވެ. 

ޤައުމު އިސްކުރެއްވުމުގައި ރައީސް ޑރ.މުޢިއްޒު ދައްކަވަަނީ ފުރިހަމަ ނަމޫނާއެއް: ނާޒިމް 

މާލީ ވަޒީރުކަމުން އިސްތިއުފާދެއްވި ނަމަަވެސް މިއަދުވެސް އޭނާ ހުންނެވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒާއެކު ޕީޕަލްސް ނޭޝަނަލް ކޮންގްރެސްގެ ހިދުމަތުގައިކަމަށް ކުރީގެ މާލީ ކަންކަމާއި އާއްމު ވިޔަފާރިތަކާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ. 

މަގާމުން އިސްތިއުފާދެއްވިފަހުން އާއްމު ތަނެއްގައި ފުރަތަމަ ފަހަރަށް ވާހަކަދައްކަވަމުން ޕީއެންސީން މިރޭ ބޭއްވި އެ ޕާޓީގެ ހަރުގެ ޖަލްސާގައި ޒަމީރު ވިދާޅުވީ މީގެ ކުރިން 2018 ވަނަ އަހަރުގެ ރިޔާސީ އިންތިހާބަށްފަހު ޕާޓީއާ ދުރަށް ވަޑައިގެންނެވި ކަމަށެވެ. ސަބަބެއްކަމަށް ޒަމީރު ވިދާޅުވީ އައު ޒުވާން ބޭފުޅުންނަށް ޕާޓީގެ ކަންކަމުގައި އުޅުއްވުމުގެ ފުރުސަތު ދެއްވަން ބޭނުންފުޅުވުމެވެ. 

ޒަމީރު ވިދާޅުވީ ރާއްޖޭގައި މިއޮތީ މައިގަނޑު ދެފިކުރުކަަމަށާއި، ޕާޓީތަކާއި ލީޑަރުން ބަދަލުވި ނަމަވެސް އެ ފިކުރަކީ އެއް ފިކުރެއްކަަމަށެވެ. އަބަދުވެސް ދެމިހުންނެވީ އަދި ކުރިއަށް އޮތް ތަނުގައިވެސް ދެމިހުންނަވާނީ މިއަދު ރައީސް ޑރ.މުޢިއްޒާއި ޕީއެންސީ ތަމްސީލުކުރާ ގައުމީ ވަތަނީ ފިކުރުގެ މަތީގައި ކަމަށް ވިދާޅުވިއެވެ. 

އެފިކުރަށް އެކި ލީޑަރުންގެ ޒައާމަތުގައި އެކި މިންވަރުގެ ކުރިއެރުން ލިބުނު ނަމަވެސް ރައީސް ޑރ.މުއިއްޒުގެ ލީޑާޝިޕުގައި ލިބުނު ކާމިޔާބުތަކަަކީ ފާހަގަކުރަންޖެހޭ ކަންތައްތަކެއްކަމަށް ވިދާޅުވެ، ޒަމީރު ފާހަގަކުރެއްވީ މީގެ ކުރިން ހުރިހާ ލީޑަރުންވެސް ގެންގުޅުއްވީ އެހެން ގައުމެއް ފަަސްްޓު ނުވަތަ އެންމެ ކުރިއަށްނެރޭ ސިޔާސަތެއް ކަމަށެވެ.‌ ނަމަވެސް މިހާރު ރައީސް ޑރ.މުޢިއްޒުގެ ޒައާމަތުގައި އެންމެ ކުރިއަށް ރާއްޖެ ނެރުއްވައި މޯލްޑިވްސް ފަސްޓް ޕޮލިސީއެއް ތަަންފީޒުކުރައްވަން ފައްޓަވާފައިވާ ކަމަށް ވިދާޅުވިއެވެ. 

"އަޅުގަނޑު ދަންނަވަން ބޭނުންވަނީ އަޅުގަނޑު މިހުރީ އެފިކުރުގައޭ. އިސްލާމްދީނަށް ހޯދައިދެއްވާ ކުރިއެރުމާއި، ގައުމިއްޔަތަށް ހޯދައިދެއްވާ ކުރިއެރުމާއި، އަދި ރައްޔިތުންގެ ކެރިފޯރުންތެރިކަމަށް ހޯދައިދެއްވައި ކުރިއެރުންތައް ފާހަގަކޮށް އެމަނިކުފާނާ އެކުގައޭ މިހުރީ،" ޒަމީރު ވިދާޅުވިއެވެ. 

މަަގާމު ދޫކުރެއްވި ސަބަބު ބަޔާންކުރައްވަމުން ޒަމީރު ވިދާޅުވީ ފާއިތުވި 12 މަހެއްހައި ދުވަހަކީ ހަނގުރާމައިގެ ވަގުތެއް ކަމަށާއި، މާލީ ވަޒީރު ކޮންމެ ދުވަހަކު ކުރައްވަަންޖެހޭ ކަމަކީ ބޮޑެތި މަސައްކަތްތަކެއްކަމަށާއި، ސިއްހީ ހާލަތު ތަންދޭ ގޮތުން އެޒިންމާ އަދާނުކުރެއްވޭ ފަދަ ސިއްހީ ހާލަަތެއް އޮތުމުން އެއްފަރާތަށް ޖެހިވަޑައިގަތުމަކީ އެންމެ ރަނގަޅު ގޮތްކަމަށް ގަބޫލުކުރައްވާތީ ކަމަަށެވެ. 

"މިކަހަލަ ހާލަތެއްގައި އަޅުގަނޑު އެތަން ހިސާރުކޮށްގެން އަޅުގަނޑަށް ގިނަ ދުވަހު ނުހުރެވޭ ކަހަލަ ދިމާލަަކަށް ސިއްހީ ހާލަތު ހުރި ގޮތުން ދާންޖެހޭއިރުވެސް އަޅުގަނޑު ހަމަ އޭގައި ބައްދައިގެން ހުންނާނަކަށްނުވާނެ ދެއްތޯ؟،" ޒަމީރު ވިދާޅުވިއެވެ. 

ގަދަކޮށް ރައީސް ޑރ.މުޢިއްޒާއެކު ހުންނެވިކަމަށާއި ޕާޓީއާއި ފިކުރު ކުރިއެރުވުމަށްޓަކައި ރައީސްް ހަވާލުކުރައްވާ ކޮންމެ ޒިންމާއެއް އަދާކުރެއްވުމަށް ތައްޔާރަށް ހުންނެވިކަމުގެ ޔަގީންކަން ޕާޓީގެ އާއްމު މެންބަރުންނަށް ޒަމީރު ދެއްވިއެވެ. 

ރައީސް ޑރ.މުޢިއްޒާއެކު ޕީއެންސީގެ ފިކުރަށް ހިދުމަތްކުރެެއްވުމުގައި ދެމިހުންނަވާނެ ކަމުގެ ޔަގީންކަން ޒަމީރު ދެއްވައިފި

ޕީޕަލްސް ނޭޝަނަލް ކޮންގްރެސް (ޕީއެންސީ)ގެ އިސްވެރިންގެ މައްޗަށް އެކުލެވޭ ޓީމުތަކެއް ރާއްޖޭގެ ހުރިހާ ރަށަކަށް ދަތުރުކުރައްވަން ޕާޓީގެ އިންތިޒާމު ކޮމިޓީން ނިންމަވައިފިއެވެ. 

ޕާޓީގެ ލީޑާޝިޕުގައި ހިމެނިވަޑައިގަންނަވާ ޕާޓީގެ ނައިބުރައީސް އަދި ޕާލިމަންްޓްރީ ގުރޫޕުގެ ސީނިއާ ޑެޕިއުޓީ ލީޑަރ ބާރަށު ދާއިރާގެ ރައްޔިތުންގެ މަޖިލީހުގެ މެންބަރު އިބްރާހީމް ޝުޖާއުއާއި ޕާޓީގެ ނައިބުރައީސް އާދަމް ޝަރީފު އުމަރާއި ޕާޓީގެ ޕާލިމަންޓްރީ ގުރޫޕުގެ ޑެޕިއުޓީ ލީޑަރު ހުޅުދޫ ދާއިރާގެ މެންބަރު މުހައްމަދު ޝާހިދު ކޮމިޓީގައި ހިމެނިވަޑައިގަންނަވައެވެ. 

އެބޭފުޅުންގެ އިތުރަށް ފުނަދޫ ދާއިރާގެ މެންބަރު މުހައްމަދު މަމްދޫހާއި ހޮޅުދޫ ދާއިރާގެ މެންބަރު އަބްދުއްސައްތާރުވެސް މި ކޮމިޓީގައި ހިމެނިވަޑައިގަންނަވައެވެ. 

ޕީއެންސީން އަންނަނީ އަންނަ އޮކްޓޯބަރު މަހުގައި އެ ޕާޓީގެ ކޮންގްރެސް ބޭއްވުމަށް ތައްޔާރުވަމުންނެވެ. ޕާޓީގެ އިސްވެރިންގެ ޓީމުތަކުން ރާއްޖޭގެ ހުރިހާ ރަށަކަށް ކުރައްވާ ދަތުރުފުޅުގެ ބޭނުމަކީ ރަށްރަށުގައި ތިއްބެވި ޕާޓީގެ މެންބަރުންނާ ބައްދަލުކުރައްވައި ޕާޓީގެ ކަންކަމާ ގުޅޭ ގޮތުން މަޝްވަރާކުރެއްވުމެވެ. 

ކޮންގްރެސް ޕާޓީގެ މަތީ މަޖިލިސް ބޭއްވުމަށް ތައްޔާރުވުމުގެ ގޮތުން ރަށްރަށުގައި ޕާޓީގެ ސްޓިއަރިން ކޮމިޓީތައް އަލުން އެކުލަވައިލައި، ޕާޓީގެ ގޮފިތަކުގެ ރައީސުން އިންތިހާބުކުރުމުގެ މަސައްކަތް ހަލުއި ދުވެލީގައި ކުރިއަށްދެއެވެ. 

ޕީއެންސީގެ އިސްޓީމުތަކެއް ހުރިހާ ރަށަކަށް ދަތުރުކުރަން ނިންމަވައިފި 

ކުޑަކުދިންނާއި ފުރާވަރުގެ ކުދިންގެ ދުޅަހެޔޮކަން ކަށަވަރުކުރުމުގެ ގޮތުން އުމުރުން 16 އަހަރުގެ ކުދިންނަށް މީސްމީޑިޔާ ބައެއް މަންސަތައް ބޭނުންނުކުރެވޭ ގޮތަށް މަނާކުރުމަށް ގަސްތުކުރައްވާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ރައީސް އޮފީހުގައި ކުރިއަށްގެންދެވި ނޫސްވެރިންގެ ބައްދަލުވުމުގައި ރައީސް ވިދާޅުވީ ޒުވާންކުދިން މީސްމީޑިޔާގެ އެކި މަންސަތަކުގައި ނޭދެވޭ ކަންކަމުގެ ތެރެއަށް ވަނުމުގެ މައްސަލައަކީ ބަވަނަވެފައިވާ މުޅި ދުނިޔެ ތަހައްމަލުކުރަމުންދާ މައްސަލައެއް ކަމަށެވެ. އަދި އެ މައްސަލަ ރާއްޖެއަށްވެސް ކުރިމަތިވެފައިވާ ކަމަށެވެ. 

މިސާލެއްގެ ގޮތުން ސައިބާ ބުލީން ނުވަތަ އޮންލައިންކޮށް ބުލީކުރުމަކީ ވަރަށް ނުރައްކާތެރިކަމެއްކަމަށާއި، ކުޑަކުދިން ގްރޫމްކުރުމުގެ އިތުރަށް މީސްމީޑިޔާ މަންސަތަކުގެ ޒަރީއާއިން ކުޑަކުދިންނާ ހަމައަށް ނުރައްކާތެރި އެކި ޒާތުގެ ކޮންޓެންޓުތަކަށް ވާސިލުވުމަށް މަގުފަހިވާކަން ރައީސްގެ ވާހަކަފުޅުގައި ފާހަގަކުރެއްވިއެވެ. 

"އެހެންވީމާ އަޅުގަނޑުމެން މިއީ އިސްލާމީ މުޖުތަމައަކަށްވާއިރުގައި، މިހާ ކްލޯސް ނިޓެޑް ކުޑަ މުޖުތަމައަކަށްވާއިރުގައި އަޅުގަނޑުމެންގެ ޒުވާންކުދިން ތުއްތުކުދިން މިކަންކަމުން ސަލާމަތްކުރުމަށް މަސައްކަތްތަކެއް ކުރުމަކީ ސަރުކާރުގެ ޒިންމާއެއް، ރައްޔިތުންނާ ގުޅިގެން ފިޔަވަޅެއް އަޅަންޖެހޭ މުހިއްމު ކަމެއް ކަމުގައި ދެކެން. ކުރިއަށް އޮތް ތަނުގައި ކަމާ ބެހޭ ފަރާތްތަކާ، މިދެންނެވީ ސިވިލް ސޮސައިޓީ ކަމާ ގުޅޭ ޖަމްއިއްޔާ ޖަމާއަތްތަކާ މަޝްވަރާކޮށް އާއްމު ރައްޔިތުންގެ ހިޔާލާއި މަޝްވަރާއާއެކު ކަމާ ގުޅޭ ގާނޫނުތަކާ އަޅަންޖެހޭ ފިޔަވަޅުތަކެއް، ސޯޝަލް މީޑިޔާގެ ބައެއް އެޕްތައް އުމުރުން 16 އަހަރުން ދަށުގެ ކުދިންނަށް ބޭނުންނުކުރެވޭ ގޮތަށް ހަމަޖައްސަން ފިޔަވަޅުތަކެއް އަޅަން ގަސްތުކުރަން،" ރައީސް ވިދާޅުވިއެވެ. 

އެމަނިކުފާނު ވިދާޅުވި ގޮތުގައި އެކަމުގައި އޮސްޓްރޭލިއާއިން އަޅާފައިވާ ފިޔަވަޅުތަކަކީ ނަމޫނާއެއް ކަމުގައި ދެކެވަޑައިގަންނަވައެވެ. ރައީސް ވިދާޅުވީ  އޮސްޓްރޭލިއާއިން އެކަމުގައި އަޅާފައިވާ ފިޔަވަޅުތަކުގެ އަލީގައި ގާނޫނަަށް ގެންނަންޖެހޭ ބަދަލުތަކާއި، ސޯޝަލް މީޑިޔާ ކުންފުނިތަކާ މުއާމަލާތްކުރުމުގައި އޮސްޓްރޭލިއާއިން ތައާރަފުކުރި މިންގަނޑުތައް ރާއްޖެއަށް ތައާރަފުކުރެވޭނެ ގޮތްތަކެއް ހޯދުމުގެ މަސައްކަތްތައް ކުރިއަށްގެންދަވަން ނިންމަވާފައިވާނެ ކަމަށެވެ. 

ރައީސް ވިދާޅުވީ ކުރިއަށް އޮތް މަސްތަކުގެ ތެރޭގައި އެކަމުގައި ކުރަންޖެހޭ މަސައްކަތްތައް ކުރައްވައި، މި އަހަރު ނިމުމުގެ ކުރިން އެ ފިޔަވަޅު ތަންފީޒުކުރެވޭ މަރުހަލާއަށް ގެންދެވުމަކީ އެމަނިކުފާނުގެ އަމާޒު ކަމަށެވެ. 

މި ނިންމުމަކީ އެއްވެސް ހާލެއްގައި ޑިޖިޓަލައިޒޭޝަނާ ދުރަށް ދިއުން ނޫންކަމަށާއި، ޑިޖިޓަލް މަންސަތަކުން މައުލޫމާތު ހޯދުން ފަދަ ކަންކަމަށް އެއްވެސް ހުރަހެއް ނޭޅޭނެހެން މި ފިޔަވަޅު ތަންފީޒުކުރާނީ ޒުވާނުންނާއި ކުޑަކުދިން ނުރައްކާތެރި ކޮންޓެންޓުތަކުން ސަލާމަތްކުރުމަށް ކަމުގައި ރައީސް ވިދާޅުވިއެވެ. 

ޚަބަރު

ދާއިރާތަކުގެ އިންތިޚާބާ ގުޅޭ އެންމެ ފަހުގެ މަސައްކަތްތައް ޕާޓީގެ ލީޑާޝިޕުން ބައްލަވާލައްވައިފި

ޕީއެންސީގެ ދާއިރާ އަދި ސްޓިއަރިން ކޮމިޓީގެ އިންތިހާބަށް ކުރިމަތިލުމުގެ ފުރުސަތު ހުޅުވާލައިފި

ޕީއެންސީގެ ފިކުރަކީ އިސްލާމްދީނަށް ނަސްދުރުދީ ހަމަޖެހުން ގާއިމުކޮށް ތަރައްގީކުރާ ފިކުރު: ރައީސް

ދަރަނި އަދާކުރަމުން ހުއްޓުމެއް ނެތި ތަރައްގީގެ މަޝްރޫއުތައް ހިންގާނެ ޕްލޭނު އެބައޮތް: ރައީސް

ދާއިރާތަކުގެ އިންތިޚާބާ ގުޅޭ އެންމެ ފަހުގެ މަސައްކަތްތައް ޕާޓީގެ ލީޑާޝިޕުން ބައްލަވާލައްވައިފި

ޕީއެންސީގެ ދާއިރާ އަދި ސްޓިއަރިން ކޮމިޓީގެ އިންތިހާބަށް ކުރިމަތިލުމުގެ ފުރުސަތު ހުޅުވާލައިފި

ޕީއެންސީގެ ފިކުރަކީ އިސްލާމްދީނަށް ނަސްދުރުދީ ހަމަޖެހުން ގާއިމުކޮށް ތަރައްގީކުރާ ފިކުރު: ރައީސް

ދަރަނި އަދާކުރަމުން ހުއްޓުމެއް ނެތި ތަރައްގީގެ މަޝްރޫއުތައް ހިންގާނެ ޕްލޭނު އެބައޮތް: ރައީސް

ދަރަނީގެ ހިސާބުތަކުން ރައީސް ވިދާޅުވެދެއްވީ ކުރީ ސަރުކާރުން ގައުމު ވައްޓާލާފައި އޮތް އަނދަވަޅުގެ ފުންކަން

ދ.މީދޫ ކައުންސިލު ރައީސް އިންތިހާބުކުރުމުގެ އިތުރުބުރު ޕީއެންސީގެ ކެންޑިޑޭޓު ކާމިޔާބުކުރައްވައިފި

މަަޖިލީހުގައި ހުރި މެންބަރުގެ ޕާޓީއަށް ނުބަލައި ރައްޔިތުންގެ ފައިދާއަށް މަސައްކަތްކުރާނެ: ވަޒީރު ރާފިއު

ޕީއެންސީގައި ތިބީ ގައުމަށް ވަފާތެރި ދިވެހި ދަރިން: ސަލީމު

ޤައުމު އިސްކުރެއްވުމުގައި ރައީސް ޑރ.މުޢިއްޒު ދައްކަވަަނީ ފުރިހަމަ ނަމޫނާއެއް: ނާޒިމް

ރައީސް ޑރ.މުޢިއްޒާއެކު ޕީއެންސީގެ ފިކުރަށް ހިދުމަތްކުރެެއްވުމުގައި ދެމިހުންނަވާނެ ކަމުގެ ޔަގީންކަން ޒަމީރު ދެއްވައިފި

ޕީއެންސީގެ އިސްޓީމުތަކެއް ހުރިހާ ރަށަކަށް ދަތުރުކުރަން ނިންމަވައިފި

ސޯޅަ އަހަރުން ދަށުގެ ކުޑަކުދިންނަށް ސޯޝަލް މީޑިޔާ ބައެއް އެޕުތައް މަނާކުރަން ގަސްތުކުރަން: ރައީސް