ވަޢުދުވެ ވަޑައިގެންނެވި ގޮތަށް ހާމަކަން ބޮޑު ގޮތެއްގައި ސަރުކާރު ހިންގެވުމަށް މިހާރަށް ވުރެ ބޮޑަށް މީޑިޔާއަށް މިނިވަންކަން ދެއްވާނެ ކަމަށް ރައީސް ވިދާޅުވެއްޖެ.

ވަޢުދުވެ ވަޑައިގެންނެވި ގޮތަށް، ހާމަކަން ބޮޑު ގޮތެއްގައި ސަރުކާރު ހިންގެވުމަށް، މިހާރަށް ވުރެ ބޮޑަށް މީޑިޔާއަށް މިނިވަންކަން ދެއްވާނެ ކަމަށް ރައީސުލް ޖުމުހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ފަދައިން ވިދާޅުވީ، ސަރުކާރަށް އެއް އަހަރު ފުރުން ފާހަގަކުރުމަށް 17 ނޮވެމްބަރ 2024 ވަނަ ދުވަހުގެ ރޭ ސޯޝަލް ސެންޓަރުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ފާއިތުވި އަހަރަކީ މިހާތަނަށް ސަރުކާރަކުން އެންމެ ގިނަ މައުލޫމާތު ހާމަކުރި އެއް އަހަރަށްވާނެ ކަމަށެވެ.

​​​ގިނަ ބައެއްގެ ފާޑުކިޔުން އެ ބިލަކަށް އަމާޒުވެފައިވާ، މީޑިޔާގެ ކޮންޓްރޯލް ސަރުކާރަށް ލިބޭގޮތަށް ފަރުމާކޮށް، އަމިއްލަ މެމްބަރަކު މަޖިލިހަށް ހުށަހެޅި ބިލަށް އިޝާރާތްކޮށް ރައީސް މުޢިއްޒު ވިދާޅުވީ، އެބިލަށް އެ މަނިކުފާނު ތާއީދު ނުކުރައްވާ ކަމަށެވެ. ދެ ފުށް ފެންނަ، ހާމަކަން ބޮޑު ގޮތަކަށް ސަރުކާރު ހިންގެވުމަށް އެ މަނިކުފާނު އިސްކަން ދެއްވާކަމާއި އެ ކަން ސާބިތުކޮށް ދެއްވުމަށް ބައެއް ހެކިތައް އެ މަނިކުފާނު ދެއްކެވިއެވެ. މި ގޮތުން ކެބިނެޓްގެ ނިންމުންތައް ހާމަކުރުމަށާއި ސަރުކާރުގެ މަސައްކަތާ ގުޅޭ މަޢުލޫމާތު ހާމަކުރެއްވުމަށް ވެބްސައިޓްތައް ހައްދަވާފައިވާކަން ހާމަކުރެއްވިއެވެ.

ރައީސް ވިދާޅުވީ އެ މަނިކުފާނާ ސުވާލުކުރުމަށް ގާއިމުކުރި ޕޯޓަލް މެދުވެރިކޮށް، އެ މަނިކުފާނާ ކުރި، 819 ސުވާލުތަކުގެ ތެރެއިން، 773 ސުވާލަށް ޖަވާބުދެއްވާފައިވާ ކަމަށެވެ. އަދި ސަރުކަރުގެ ވުޒާރާތަކުން ނޫސްވެރިންގެ 73 ބައްދަލުވުން ބާއްވާފައިވާ ކަމަށާއި، 791 ފަހަރު ވަޒީރުން މީޑިޔާތަކަށް ވަޑައިގެން އެކި ކަންކަމުގައި މަޢުލޫމާތު ދެއްވާފައިވާ ކަމަށް ރައީސް ވިދާޅުވިއެވެ.

"އަޅުގަނޑުމެން މިދަނީ މަޢުލޫމާތު ހާމަކުރަމުން. އަޅުގަނޑުމެންނަކީ ދެފުށް ފެންނަ ސަރުކާރެއް ހިންގާނެ ބައެއް. ހިންގަމުން މި ދަނީ އެ ގޮތަށް. ކުރިއަށް އޮތް ތާނގައި ވެސް ހިންގާނީ އެ ގޮތަށް" ރައީސް ވިދާޅުވިއެވެ. މައުލޫމާތު ހޯދައި ލިބިގަތުމުގެ ހައްޤުގެ ޤާނޫނުގެ ދަށުން، ރައީސުލްޖުމްހޫރިއްޔާގެ އޮފީހަށް ހުށަހަޅާފައިވާ އާރްޓީއައިތަކުގެ ތެރެއިން 91 އިންސައްތަ އާރްޓީއައިތަކަށް ޖަވާބުދީފައިވާކަން ރައީސް ހާމަކުރެއްވިއެވެ.