ޤާނޫނު އަސާސީއަށް އިސްލާޙު ގެނައީ ރައްޔިތުންނަށް ޙަޤީޤީ ބާރުވެރިކަން ދިނުމަށް ރައީސް މުޢިއްޒު-

ގާނޫނުއަސާސީއަށް އިސްލާހުތަކެއް ގެނައުމުން ރައްޔިތުންނަށް ލިބުނު ބާރުވެރިކަން، ރައީސް ޑރ. މުހައްމަދު މުއިއްޒު ސާފުކޮށްދެއްވައިފިއެވެ. "ސިޔާސީ ތަޢައްސަބުން އެއްކިބާވެވަޑައިގެން ވިސްނާވަޑައިގަންނަވައިފި ކޮންމެ ރައްޔިތަކަށް ވެސް ވަރަށް ފަސޭހައިން ފަހުމުވެވަޑައިގަންނަވާނެ، ގާނޫނުއަސާސީ މިހާރުކަން މި އޮތީ ކުރިއަށްވުރެ ރަނގަޅަށް، ރައްޔިތުންގެ ބާރުވެރިވެރިކަން ޔަގީންކުރެވިފައި" ރައީސް މުޢިއްޒު ވިދާޅުވިއެވެ.

20 ނޮވެމްބަރ 2024 ގައި ވަނީ، ޤާނޫނު އަސާސީގެ 5 މާއްދާއެއް މަޖިލިހުން އިސްލާޙުކޮށްފައެވެ. މި ގޮތުން އިސްލާހު ގެނެސްފައިވަނީ، ރާއްޖޭގެ ސަރަހައްދު ބަޔާންކުރާ މާއްދާއަށާއި ބޭރުގެ އެއްވެސް ފަރާތަކަށް ރާއްޖޭގެ ސަރަހައްދުން އެއްވެސް ބައެއް މިލްކުކޮށްދީ އަސްކަރީ ބޭނުމަށް ބިން ދިނުމާ ބެހޭ މާއްދާއާއި، ރައްޔިތުންގެ މަޖިލީހުގެ މެންބަރުންނާ ގުޅޭ މާއްދާއަށާއި ރައްޔިތުންގެ ފެންނަ ނުފެންނަ ވޯޓު ނެގުމާ ބެހޭ ގޮތުން އޮންނަ މާއްދާއަށާއި ރައީސުލްޖުމްހޫރިއްޔާގެ މަސްއޫލިއްޔަތުތައް ބަޔާންކޮށްފައި އޮންނަ މާއްދާއަށެވެ.

8 ޑިސެމްބަރ2024 ގައި އއ. މަތިވެރީގައި ވާހަކަފުޅު ދައްކަވަމުން، ރައީސް މުޢިއްޒުވަނީ، އެ މާއްދާތަކަށް ގެނައި އިސްލާހުތައް ވަރަށް ތަފްސީލުކޮށް ވިދާޅުވެދެއްވާފަ އެވެ. ރައީސް ވިދާޅުވީ ގާނޫނުއަސާސީގައި ރައްޔިތުންގެ ބާރުތަކަކީ ކޮބައިކަން ލިޔެވެން ޖެހޭ ކަމަށެވެ. މަޖިލީހުން އެ އިސްލާހުތައް ފާސްކުރީ އެހެންވެގެން ކަމަށް އެ މަނިކުފާނު ވިދާޅުވިއެވެ.

ޤާނޫނު އަސާސީއަށް ގެނައި އިޞްލާޙުތަކުގެ ތަފުޞީލު ދެއްވަމުން، ރައީސް ވިދާޅުވީ، ރާއްޖޭގެ ސަރަހައްދާ ބެހޭ މާއްދާއަށް ގެނެވުނު އިސްލާހަކީ، ރާއްޖޭގެ އިޤުތިޞާދީ ސަރަހައްދު ބަދަލުކުރެވޭނީ ރައްޔިތުންގެ ފެންނަ ނުފެންނަ ވޯޓެއް ނަގައި އަދި މަޖިލީހުގެ ހަތަރުބައިކުޅަ ތިންބައި މެންބަރުންގެ ވޯޓުންކަމަށެވެ. "ކުރިން ރައްޔިތުންގެ މަޖިލީހުގެ ވޯޓަކުން ކަނޑައަޅަން މި އޮންނަނީ ރާއްޖޭގެ އިޤުތިޞާދީ ސަރަހައްދުގެ ކަނޑުގެ 12 ނޯޓިކަލް ބޭރާ ހަމައަށް އެކަނި. އެހެންނަމަވެސް މިހާރު އަޅުގަނޑުމެން ގާނޫނުއަސާސީގަ މި ލިޔުނީ ޚާއްޞަ އިޤުތިޞާދީ ސަރަހައްދަށް ބަދަލެއް ގެނެވޭނީ ވެސް ރައްޔިތުންގެ މަޖިލީހުގެ ވޯޓަކާ ރައްޔިތުންގެ ފެންނަ ނުފެންނަ ވޯޓެއް ނަގައިގެން ކަން" ރައީސް މުޢިއްޒު ވިދާޅުވިއެވެ.

ޤާނޫނު އަސާސީގެ އަސްކަރީ މަރުކަޒުތައް ޤާއިމް ކުރުމާގުޅޭ މާއްދާއަށް، ގެނައި އިސްލާޙުގެ ތަފުޞީލު ދެއްވަމުން ރައީސް މުޢިއްޒު ވިދާޅުވީ، ޤާނޫނުގާނޫނުއަސާސީގައި، ކުރިން އޮންނަނީ އެހެން ގައުމުގެ އަސްކަރީ މަރުކަޒެއް ރާއްޖޭގައި ގާއިމް ކުރެވޭނީ މަޖިލީހުން ފާސްކޮށްގެން ކަމެވެ. ކުރީ ސަރުކާރުތަކުން އެކަމުގެ ނާޖައިޒް ފައިދާ ނަގައި، އެ މަރުކަޒު ނުހަދައި ރާއްޖޭގައި ބޭރު ޤައުމުތަކުގެ ސިފައިން ބޭތިއްބި ކަމަށާއި، އަސްކަރީ މަރުކަޒު ނުހަދާތީ، އެ ކަން މަޖިލީހަށް ހުށަހަޅާފައި ނުވާ ކަމަށް ރައީސް ވިދާޅުވި އެވެ. "މިހާރު ގާނޫނުއަސާސީއަށް ގެނެވުނު އިސްލާހުގެ ނަތީޖާއަކަށް ވާނީ، ބޭރު އެންމެ ސިފައިންގެ މީހެއް ވެސް، އެންމެ އަސްކަރީ ބޫޓަކަށް ވެސް، ރާއްޖޭގަ ތިބެވޭނީ މަޖިލީހުގެ އަޣުލަބިއްޔަތު ހޯދައިގެންނޭ. ކުރީގަ ވެއްޖިއްޔާ މަރުކަޒެއް، މިހާރު އެންމެ މީހަކަށް ވެސް މި ތާނގަ އޮޕަރޭޓް ކުރެވޭނީ މަޖިލީހުގެ ރުހުން ހޯދައިގެން" ރައީސް މުޢިއްޒު ވިދާޅުވިއެވެ.

ޢާއްމުންގެ މެދުގައި އެންމެ ކަންބޮޑުވި މާއްދާއަށް ގެނައި އިސްލާހަށް ބައްލަވައިލައްވަމުން ރައީސް ވިދާޅުވީ، ޕާޓީ ބަދަލުކޮށްފިނަމަ ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް އިސްލާހު ގެނައީ ވެސް ރައްޔިތުންގެ ހައްގުތައް ކަށަވަރު ކޮށްދިނުމަށް ކަމަށެވެ. ރައްޔިތުން އެ މެންބަރަކު ހޮވާ ޕާޓީއެއް ބަދަލުކޮށްލުމަކީ ރައްޔިތުންނަށް ވެވޭ ބޭއިންސާފެއް ކަމަށް ރައީސް ވިދާޅުވި އެވެ.

ކުރިން އޮންނަ ގޮތުން ޤާނޫނު އަސާސީގައި އަސާސީ ހައްޤުތަކާއި މިނިވަންކަމުގެ ބާބަށް ބަދަލު ގެނެވޭނީ ، ރައްޔިތުންގެ ފެންނަ ނުފެންނަ ވޯޓަކުން ކަމަށެވެ. ނަމަވެސް އިސްލާހު ގެނައުމުގެ ކުރިން އެ ވޯޓު ނެގުމާ ނު ނެގުމާމެދު މަޖިލީހަށް ގޮތެއް ނިންމޭނެ އެވެ. ނަމަވެސް އެ މާއްދާއަށް މިހާރު ގެނައި އިސްލާހާއެކު އެ މާއްދާއަށް ބަދަލުގެނެވޭނީ ވެސް ރައްޔިތުންގެ ފެންނަ ނުފެންނަ ވޯޓަކުން ކަމަށް ރައީސް ވިދާޅުވި އެވެ. "އެހެންވީމަ ރައްޔިތުންގެ އަސާސީ ހައްގުތަކާ މިނިވަންކަމާ، ރިޔާސީ ދައުރާ، ރައީސުލްޖުމްހޫރިއްޔާ އިންތިހާބު ކުރާ ގޮތާ، މަޖިލީހުގެ އުމުރާ، މިހެން ހުރި ކަންކަން ބަދަލު ކުރުމަށް، ޕްރޮސީޖާ ބަދަލުކުރުމަށް ވެސް ރައްޔިތުން ގާތު އަހަން ޖެހޭނެ ކަމަށް މި ލިޔުނީ. އެހެންވީމަ މިހާރު ނޫންތޯ ރައްޔިތުންގެ ހައްގުގަ ގާނޫނުއަސާސީ މި ބައްޓަން ކުރެވުނީ،" ރައީސް ވިދާޅުވި އެވެ.