މަސްތުވާތަކެތީ ވަބާއިންނާއި ގޭންގު ކުށްތަކުން ދިވެހި ޤައުމު ސަލާމަތްކުރެއްވުމަށް ޓަކައި ޤާނޫނުތަކަށް ބަދަލު ގެންނަވާނެކަމަށް ރައީސް ވިދާޅުވެއްޖެ

މަސްތުވާތަކެތީގެ ވަބާއިންނާއި، ގޭންގު ކުށްތަކުން، ދިވެހި ޤައުމު ސަލާމަތްކުރެއްވުމަށް ޓަކައި، ދައުލަތުގެ އިދާރާތަކުން ކުރައްވަމުންގެންދަވާ މަސައްކަތަށް، މިހާރު ކުރިމަތިވެފައިހުރި ގޮންޖެހުންތައް ނައްތާލެއްވުމަށް، ޤާނޫނުތަކަށް ބަދަލު ގެންނަވާނެކަމަށް، ރައީސުލްޖުމުހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ފަދައިން ވިދާޅުވީ، 26 ނޮވެމްބަރ 2024 ގައި އެކްސްގައި ކުރެއްވި ޕޯސްޓެއްގައެވެ.

ރައީސް ވިދާޅުވީ، މަސްތުވާތަކެތީ ވަބާއިން ދިވެހި ޤައުމު ސަލާމަތްކުރެއްވުމަށް ދައުލަތުގެ އިދާރާތަކުން ކުރައްވަމުންގެންދަވާ މަސައްކަތަށް، މިހާރު ކުރިމަތިވެފައިވާ އެންމެ ބޮޑު ގޮންޖެހުމަކީ، މިހާރު ޢަމަލުކުރަމުންދާ، މަސްތުވާތަކެތީގެ ޤާނޫނުގައި ހުރި ބައެއް އުނިކަންކަން ކަމަށެވެ. ''މަސްތުވާ ތަކެތީގެ މައްސަލަތައް ތަޙުޤީޤުކޮށް ދަޢުވާ ކުރުމުގައި ހުރި ގޮންޖެހުންތައް ނައްތާލެއްވުމަށް ޓަކައި، ދައުލަތުގެ ކަމާ ގުޅޭ އިދާރާތަކުގެ މަޝްވަރާއާއެކު، މަސްތުވާ ތަކެތީގެ ޤާނޫނު ރިވިއު ކުރުމަށް ފަހު، އެ ޤާނޫނަށް ގެންނަން ޖެހޭ އިސްލާޙުތައް، މި ހަފުތާތެރޭ ސަރުކާރުގެ ފަރާތުން، ރައްޔިތުންގެ މަޖިލީހަށް ހުށަހަޅާނެ'' ރައީސް ކުރެއްވި ޕޯސްޓްގައި ވިދާޅުވެފައިވެއެވެ.

​​​ރައީސް އިތުރަށް ވިދާޅުވި ގޮތުގައި، މަސްތުވާ ތަކެތީގެ މައްސަލަތަކާ ވަރަށް ބޮޑަށް ގުޅިފައިވާ ގޭންގު ކުށްތަކުގެ މައްސަލައިން، ދިވެހި ޤައުމު ރައްކާތެރިކޮށް ސަލާމަތް ކުރުމަށް ޓަކައި، މިހާރު ޢަމަލު ކުރެވެމުންއަންނަ ގޭންގު ކުށްތައް މަނާކުރުމުގެ ޤާނޫނުގެ ބަދަލުގައި، ސަރުކާރުން އެކުލަވާލަމުންދާ، ގޭންގު ކުށްތައް ހުއްޓުވުމުގެ އާ ޤާނޫނު، ކުރިޔަށް އޮތް ދެ ހަފުތާތެރޭގައި ސަރުކާރުން ރައްޔިތުންގެ މަޖިލިހަށް ފޮނުވާނެއެވެ.

​​​މި ސަރުކާރަށް އެއް އަހަރު ފުރިގެންދާއިރު، މަގުމަތީގައި ހިންގާ މާރާމާރީ ހުއްޓުވުމަށް އެޅި ފިޔަވަޅުތަކުގެ ހެޔޮ ނިތީޖާ ދަނީ ފެންނަމުންނެވެ. އަދި މަސްތުވާ ތަކެތީގެ ވަބާއިން ދިވެހި މުޖުތަމަޢު ސަލާމަތް ކުރުމަށް ޓަކައި ދައުލަތުގެ މުއައްސަސާތަކުން ގުޅިގެން ކުރަމުންދާ މަސައްކަތުގެތެރެއިން، ވޭތުވެ ދިޔަ ހަފުތާގައި ވެސް ވަނީ، ކަނޑު މަގުން ރާއްޖެއަށް އެތެރެކުރަން އުޅުނު 400 ކިލޯއަށް ވުރެ ގިނަ މަސްތުވާތަކެތި އަތުލައިގެންފައެވެ.

​​​ދިވެހި ޤައުމުގައި ސުލްޙަ މަސަލަސްކަން ޤާއިމްކޮށް، ރައްޔިތުންގެ ސަލާމަތާއި ރައްކާތެރިކަމަށް ޓަކައި، މި ސަރުކާރުން ކުރައްވާ މަސައްކަތްޕުޅުތަކާއި އަޅުއްވަމުން ގެންދަވާ ފިވަޔަޅުތަކަށް، ރައްޔިތުންގެ ފަރާތުން ލިބެމުންދާ ފުރިހަމަ އެއްބާރު ލެއްވުމަށް، ރައީސް މުޢިއްޒު ވަނީ، ދިވެހި ރައްޔިތުންނަށް ވަރަށް ބޮޑަށް ޝުކުރުދަންވާފައެވެ.