ޕީއެންސީގެ ދާއިރާތަކުގެ އާންމު އިންތިޚާބު – ރާއްޖޭގައި ސިޔާސީ ޕާޓީއަކުން އިންތިޒާމްކުރާ އެތެރޭގެ އެންމެ ބޮޑު އިންތިޚާބު

ރާއްޖޭގެ ވެރިކަންކުރާ ޕާޓީ، ޕީއެންސީގެ ދާއިރާތަކުގެ އިނތިޚާބުގެ އެންމެ ފަހުގެ ތައްޔާރީތައް ނިމި، 23 ނޮވެމްބަރ 2024 ވާ ހޮނިހިރު ދުވަހު، އިންތިޚާބު ވޯޓްލުން ކުރިޔަށް ގެންދިއުމަށް ތައްޔާރު ވެއްޖެއެވެ. މާލެ އާއި އަތޮޅުތެރޭގެ، 88 ރަށެއްގައި ވޯޓުލުން ކުރިޔަށް ގެންދާ މި އިންތިޚާބުގައި، މާލޭގައި ބަހައްޓާ 56 ވޯޓް ފޮށްޓާއެކު ޖުމުލަ 144 ވޯޓް ފޮށި ބެހެއްޓުމަށް ވަނީ ހަމަޖެހިފައެވެ.

​​​1984 މަޤާމަށް މީހުން އިންތިޚާބު ކުރުމަށް ހަމަޖެހިފައިވާ މި އިންތިޚާބުގައި 648 ކެންޑިޑޭޓުން ވާދަކުރައްވައެވެ. އަނެއް 1300 މަޤާމަށް، އެންމެ ކެންޑިޑޭޓަކު ކުރިމަތިލައްވާފައިވާތީ، އެ 1300 މަޤާމަށް ވަނީ، އިންތިޚާބަކާ ނުލައި މީހުން ހޮވިފައެވެ. މާލެ އާއި އަތޮޅުތެރޭގައި އިންތިޚާބު އޮންނަ 88 ރަށުގައި ވޯޓް ލުމުގެ ޙައްޤު ލިބިފައިވާ، 33500 މެމްބަރުން އެބަތިއްބެވެ.

​​​މި އިންތިޚާބުގެ ވޯޓްލުން ފަށާނީ، 23 ނޮވެމްބަރ 2024 ވަނަ ދުވަހުގެ ހެނދުނު 10.00 ގައެވެ. ވޯޓުލުން ނިމި ވޯޓް ފޮށިތައް ބަންދުކުރާނީ،އެ ދުވަހުގެ މެންދުރު ފަހު 14.00 ގައެވެ. ދަރުބާރުގޭގައި ޖުމުލަ 56 ވޯޓް ފޮށި ބައްހައްޓާގޮތަށް ހަމަޖެހިފައިއެވެ. އެހެންކަމުން، މާލޭގެ ދާއިރާ ތަކުގެ މަޤާމުތަކަށް އިންތިޚާބު ކުރާ ބޭފުޅުންނަށް ވޯޓްލުމަށް ދަރުބާރުގެއަށް ވަޑައިގަންނަވާ ބޭފުޅުން، ބޮޑުތަކުރުފާނު މަގުން، ދަރުބާރުގެއަށް ވަދެވަޑައިގަތުމަށާއި އަތޮޅު ތެރޭގެ ރަށްރަށުން އިންތިޚާބަށް ކުރިމަތި ލެއްވި ބޭފުޅުންނަށް ވޯޓް ދެއްވުމަށް ދަރުބާރުގެއަށް ވަޑައިގަންނަވާ ބޭފުޅުން، އަމީނީ މަގުން ދަރުބާރުގެއަށް ވަދެ ވަޑައިގަތުމަށް، ޕާޓީ އޮފީހުން އެދިލައްވައެވެ. މި އިންތިޚާބުގައި ވޯޓްލެވޭނީ އަތޮޅުތެރޭގެ ރަށްރަށާއި މާލޭގައި ބަހައްޓާފައިވާ ވޯޓް ފޮށިތަކަށް އެކަންޏެވެ.