ރައްޔިތުންގެ ފުދުންތެރިކަމަށް ޓަކައި ކައުންސިލްތަކުން އުފައްދާ ކުންފުނިތަކަށް ސަރުކާރުން އެއްބާރުލުން ދެއްވާނެ ކަމަށް ރައީސް ވިދާޅުވެއްޖެ

ރައްޔިތުންގެ ފުދުންތެރިކަމަށް ޓަކައި، ކައުންސިލްތަކުން އުފައްދާ ކުންފުނިތަކަށް ސަރުކާރުން އެއްބާރުލުން ދެއްވާނެ ކަމަށް ރައީސުލްޖުމުހިރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ފަދައިން ވިދާޅުވީ، 8 ޑިސެމްބަރ 2024 ގައި އއ. ތޮއްޑޫ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައެވެ. އެ މަނިކުފާނުވަނީ ތޮއްޑޫ ކައުންސިލުން އުފައްދަވާފައިވާ ކުންފުންޏަކީ، ކައުންސިލަކުން އުފެއްދި ފުރަތަމަ ކުންފުނިކަން ފާހަގަކޮށް، އެ ކުންފުނި ކުރިޔަށް ގެންދިއުމަށް ސަރުކާރުން ކޮށްދެއްވެން ހުރި ހުރިހާ ކަމެއް ކޮށްދެއްވާނެ ކަމަށް ވިދާޅުވެފައެވެ. މި ގޮތަށް ކަންތައް ކުރުމުގެ ބޭނުމަކީ، މި ކުންފުނީގެ މަސައްކަތުން ހޯދާ ކާމީޔާބީން، ރައްޔިތުންނަށް މަންފާކުރާނެތީކަން ފާހަގަ ކުރެއްވިއެވެ. ރައީސް ވިދާޅުވީ، ރައްޔިތުންގެ ލާބައާއި މަންފާއަށް ޓަކައި ކުރައްވާ މަސައްކަތްޕުޅުގައި، އެ މަނިކުފާނު ސިޔާސީ ވިސްނުމެއް ނު ގެންގުޅުއްވާނެ ކަމަށާއި، މިހާތަނަށް ގެންގުޅެފައި ނުވާނެ ކަމަށެވެ.

​​​ރައީސްގެ ވާހަކަފުޅުގައި ތޮއްޑޫއަކީ ލޯކަލް ޓޫރިޒަމް ފުޅާ ދާއިރާއެއްގައި ކުރިޔަށް ދާ ރަށަކަށް ވުމުން، ރަށުގެ ރައްޔިތުން އެދިވަޑައިގަންނަވާ ކޮންސެޕްޓަކަށް މަގުތަކުގައި ތާރު ނައަޅައި، ގާ އަތުރައިގެން އެ ރަށުގެ މަގުތައް ހެދުމުގެ މަސައްކަތް 2025 ވަނަ އަހަރު ފެށޭނެކަމަށް ވިދާޅުވިއެވެ. ރައީސްގެ ވާހަކަފުޅުގައި މިހާރު ތޮއްޑޫގައި ހުރި ޞިއްޙީމަރުކަޒު، ރަށުގެ ރައްޔިތުންނަށް ޚިދުމަތްދިނުމަށް އެކަށީގެންނުވާތީ، އެ މަނިކުފާނު ވަޢުދުވެ ވަޑައިގެންނެވި ގޮތަށް 2025 ވަނަ އަހަރު ތޮއްޑޫގެ ޞިއްޙީ މަރުކަޒު ބޮޑުކޮށް، ވަޞީލަތްތައް ޤާއިމްކޮށް، ރައްޔިތުން ބޭނުންވާ ޚިދުމަތްތައް ދެވޭނެ ފުރިހަމަ ތަނަކަށް ހައްދަވާނެ ކަމަށް ވިދާޅުވިއެވެ. ރައިސް ވިދާޅުވީ ތޮއްޑޫ ސްކޫލަކީ އޭލެވެލް ފެންވަރަށް ކިޔަވައިދޭ ސްކޫލަކަށް ހައްދަވައި ސްކޫލް އެއްދަންފަޅިއަށް ބަދަލުކުރުމަކީ އެ މަނިކުފާނުގެ ވަޢުދުފުޅެއްކަމަށާއި، އެހެންކަމުން މި ކަމަށް ބޭނުންވާ އިތުރު ކުލާސްރޫމްތައް، ސްކޫލް ގޯތިތެރޭގައި އޮތް ހުސްބިމުގައި 2025 ވަނަ އަހަރު ޤާއިމްކޮށް ދެއްވާނެ ކަމަށް ވިދާޅުވިއެވެ. ތޮއްޑޫގައި ޑޮލަރ އޭޓީއެމްއެއް ބަހައްޓައި އަދި ރާއްޖޭގެ މީހުން ދިރިއުޅޭ ހުރިހާ ރަށެއްގައި، ރުފިޔާ އޭޓީއެމް، 2025 ވަނަ އަހަރު ޤާއިމްކޮށް ދެއްވާނެ ކަމަށް ރައީސް ވިދާޅުވިއެވެ.

​​​ނިމިގެންމިދާ 2024 ވަނަ އަހަރު، ރަށް ރަށުގެ ރައްޔިތުން ބޭނުންވި ތަރައްޤީގެ މަޝްރޫޢުތައް ނު ހިންގުނު ސަބަބު، ރައީސް ވިދާޅުވެ ދެއްވިއެވެ. އެ މަނިކުފާނު ވިދާޅުވީ، ނިމިގެން މިދާ އަހަރުގެ ބަޖެޓަކީ، އެމްޑީޕީ ސަރުކާރުން އެކުލަވާލި ބަޖެޓެއް ކަމަށާއި އެ މަނިކުފާނު، ރައީސްކަމަށް އިންތިޚާބުވެ ވަޑައިގެންގަތުމަށް ފަހު، ބޭނުންވި ބަދަލުތައް ބަޖެޓަށް ގެންނެވުމަށް އެދި ވަޑައިގަތުމުން ވެސް، އެ ބަދަލުތައް ބަޖެޓަށް ނުގެންނެވި ކަމަށެވެ. އެ މަނިކުފާނު ވިދާޅުވީ، ތާވަލް ކުރެވިގެން ވަކި ތަރުތީބެއްގެ ތެރެއިން، 2025 ވަނަ އަހަރު މުޅި ރާއްޖޭގައި، އެ މަނިކުފާނުގެ ވަޢުދުފުޅުތައް ފުއްދުމުގެ މަޝްރޫޢުތައް ހިންގަވާނެ ކަމަށެވެ.

​​​ރައީސް މުޢިއްޒު ވިދާޅުވީ އެ މަނިކުފާނުގެ މައިގަނޑު ސިޔާސަތަކީ، ކައުންސިލްތަކުން އެ މަނިކުފާނާ ބައްދަލުކުރަން އައުމުގެ ބަދަލުގައި، އެ މަނިކުފާނު ސީދާ ވަޑައިގެން، ކައުންސިލްތަކާ ބައްދަލުކުރެއްވުން ކަމަށެވެ. މިގޮތުން މިހާތަނަށް 170 ކައުންސިލާ ބައްކުރިވިފައިވާ ކަމަށާއި، މިހާރު އެ މަނިކުފާނު ފައްޓަވާފައިވާ މި ދަތުރުފުޅުގައި، ބާކީ ހުރި ކައުންސިލްތަކާ ބައްދަލު ކުރައްވާނެކަމަށް ރައީސް ވިދާޅުވިއެވެ. މި ޖަލްސާގައި ވާހަކަފުޅު ދައްކަވަމުން އެ މަނިކުފާނު ވަނީ، ރާއްޖޭގެ ހުރިހާ ޑަބްލިޔު ޑީސީތަކުން، އެ މަނިކުފާނު އަރިހު އެދިލެއްވި ކަންކަން ކޮށްދެއްވުމަށް، ޤާނޫނަށް ބަދަލު ގެންނަވާނެކަމަށް ވިދާޅުވެފައެވެ.