ފަލަސްޠީނުގެ ރައްޔިތުންނަށް ލިބެންޖެހޭ ޙައްޤުތައް ހޯދައިދިނުމުގައި ރާއްޖެ އަބަދުވެސް ސާބިތުކަމާ އެކު ދެމިއޮންނާނެ ކަމުގެ ޔަގީންކަން ރައީސް ދެއްވައިފި

ފަލަސްތީނުގެ ރައްޔިތުންނަށް ލިބެންޖެހޭ ހައްގުތައް ހޯދައިދިނުމުގައި ރާއްޖެ އަބަދުވެސް ސާބިތުކަމާ އެކު ދެމިއޮންނާނެ ކަމުގެ ޔަގީންކަން ރައީސުލްޖުމުރުރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. އެ މަނިކުފާނު މިފަދައިން ވިދާޅުވީ 29 ނޮވެމްބަރ 2024 ގައި ކުރެއްވި ޕޯސްޓެއްގައެވެ.

ފަލަސްތީނުގެ ރައްޔިތުންނާ އެކު ތިބިކަން ހާމަކުރުމަށް މިއަދު ފާހަގަކުރަމުން އަންނަ، ބައިނަލްއަގުވާމީ ދުވަހާ ގުޅުވައި، ރައީސް ވަނީ ފަލަސްޠީނުގެ ރައްޔިތުންނަށް ލިބެންޖެހޭ ޙައްޤުތައް ހޯދައިދިނުމުގައި ރާއްޖެއިން އަބަދު ވެސް ސާބިތުކަމާއެކު ދެމިއޮންނާނެ ކަމުގެ ޔަގީންކަން ތަކުރާރު ކުރައްވައިފައެވެ.

ފަލަސްޠީނު ރައްޔިތުންނާއެކު އެއްބައިވަންތަކަމުގެ ބައިނަލްއަޤްވާމީ ދުވަސް ފާހަގަކުރާއިރު، ފަލަސްޠީނުގެ އިންސާފަށް ޓަކައި ކުރާ މަސައްކަތަށާއި، އަމާންކަމާއެކު ދިރިއުޅުމުގެ ޙައްޤަށް، ދިވެހިރާއްޖެއިން އަލުން ކަށަވަރުކޮށް ތާއީދުކުރާކަން ރައީސް ހާމަކުރެއްވިއެވެ. އެ މަނިކުފާނު ވިދާޅުވީ ބައިނަލްއަގުވާމީ ގާނޫނުތަކާ ޚިލާފަށް ފަލަސްޠީނު ބިންތަކަށް ވެރިވެގަނެ، އެ ގައުމުގެ ރައްޔިތުންގެ ނަސްލު ނައްތާލުމަށް، އިޒްރޭލުން ހިންގަމުންދާ އަނިޔާވެރި ޖަރީމާތައް ހުއްޓުވަން، މުޅި ދުނިޔޭގެ ހުރިހާ ސިޔާސީ އަދި އިޤުތިޞާދީ ބާރެއް ބޭނުންކުރަން ޖެހޭ ކަމަށެވެ.

ފަލަސްތީނުގެ ރައްޔިތުންނަށް ކުރިމަތިވެފައިވާ ނިކަމެތިކަމާއި ހިތްދަތިކަމަކީ، ކޮންމެ ދިވެއްސަކަށް ވެސް، އަމިއްލައަށް ކުރެވޭ އިހުސާސެއްގެ ގޮތުގައި، އެ މަނިކުފާނު ސިފަކުރެއްވިއެވެ."އިޒްރޭލުގެ، ބައިނަލްއަގުވާމީ ގާނޫނާ ޚިލާފު އިސްތިއުމާރު ނިމުމަކަށް ގެނެސް، ހަނގުރާމައިގެ ނަމުގައި ހިންގާ ޖަރީމާތަކާއި ނަސްލު ނައްތާލުމުގެ އަމަލުތަކުގެ ފަހަތުގައި ތިބި ހުރިހާ މީހުން އިންސާފުގެ ކުރިމައްޗަށް ގެނައުމަށް ޓަކައި، މުޅި ދުނިޔޭގެ ފުރިހަމަ ސިޔާސީ އަދި އިޤުތިޞާދީ ބާރެއްގެ ބޭނުން ހިފަން ރާއްޖޭން ގޮވާލަން،" ރައީސް ވިދާޅުވި އެވެ.

ފަލަސްތީނުގެ މައްސަލަ އަށް ދާއިމީ ހައްލެއް ހޯދުމަށް ޓަކައި، 1967 ވަނަ އަހަރުގެ ކުރިން ކަނޑައަޅާފައިވާ އިމުގެ ތެރޭގައި އފަލަސްޠީނުގެ މުސްތަގިއްލު، މިނިވަން ދައުލަތެއް ގާއިމުކޮށް، އިރުމަތީ ގުދުސަކީ ފަލަޞްޠީނުގެ ވެރިރަށުގެ ގޮތުގައި ކަނޑައެޅުމަށް ރާއްޖެއިން އަބަދު ވެސް ވަކާލާތު ކުރާކަން ފާހަގަކުރައްވައި، އެކަން ރައީސް މުޢިއްޒު، މިއަދު ވެސް ތަކުރާރު ކުރެއްވިއެވެ.

​​ރައީސް ޑރ. މުޙައްމަދު މުޢިއްޒު ފާހަގަވެފައިވަނީ، އެއްވެސް ޖެހިލުމެއް ނެތި ފަލަޞްޠީނުގެ ރައްޔިތުންގެ ޙައްޤުގައި، ވިދާޅުވާންޖެހޭ ކޮންމެ ބަސްފުޅެއް އިއްވަމުންގެންދަވާ، ހަރުދަނާ ޙައްޤު ބަސް ވިދާޅުވާ ލީޑަރެއްގެ ގޮތުގައެވެ.