ރައީސް މުޢިއްޒު މަސްވެރިންނަށް ވެވަޑައިގެންނެވި ވަޢުދުތައް ފުއްދުވުމުގެ ގިނަ ޢަމަލީ މަސައްކަތްތައް ފައްޓަވައިފި

މަސްވެރިންނަށް ވެވަޑައިގެންނެވި ވަޢުދުތައް ފުއްދުވުމުގެ ގިނަ ޢަމަލީ މަސައްކަތްޕުޅުތައް ފައްޓަވައި، ރައީސުލްޖުމުހުރިއްޔާ ޑރ. މުޙައްމަދު މުޢިއްޒަކީ، މަސްވެރިންގެ އަޑު ވެސް އައްސަވާ ބޭފުޅެއްކަން، އެ މަނިކުފާނުގެ ޢަމަލުފުޅުން ދައްކުވައި ދެއްވައިފިއެވެ. އެ މަނިކުފާނު މިކަން ހާމަކުރެއްވީ، ރައްޔިތުންނާ ގާތަށް ވަޑައިގެން ރައްޔިތުންނާ މަޝްވަރާ ހޯއްދެވުމަށް ކުރައްވަން ފައްޓަވާފައިވާ ދަތުރު ފުޅުތަކުގައި، 9 ޑިސެމްބަރ 2024 ގައި، މާލެ އަތޮޅު ގާފަރުގެ ރައްޔިތުންނާ ބައްދަލުކޮށް ދެއްކެވި ވާހަކަފުޅުގައެވެ.

​​​މި ޖަލްސާގައި ވާހަކަފުޅު ދައްކަވަމުން ރައީސް މުޢިއްޒުވަނީ، މަސްވެރިން މިފްކޯއަށް ކިރާފައިވާ މަހަށް ދޭންޖެހި މިހާތަނަށް ނުދެވި ހުރި، 38 މިލިޔަން ރުފިޔާ، މަސްދޯނިފަހަރުގެ ވެރިންގެ އެކައުންޓަށް ޖަމާކޮށް ނިންމިކަން ހާމަކުރައްވާފައެވެ. އެ މަނިކުފާނު ވިދާޅުވީ، އެ މަނިކުފާނު ވަޢުދުވެ ވަޑައިގެންނެވި ގޮތަށް، މާދަމާއިން ފެށިގެން، ބީއެމްއެލް ގައި އެކައުންޓް ހުރި މަސްދޯނި ފަހަރުން، މިފްކޯއަށް ކިރާ މަހަށް، 48 ގަޑިއިރުތެރޭ ފައިސާ ޖަމާކޮށް ދެއްވާނެ ކަން ހާމަ ކުރައްވާފައެވެ. އެހެން ބޭންކްތަކުގައި އެކައުންޓް ހުރި މަސްދޯނިފަހަރުން ކިރާ މަށް ދޭންޖެހޭ ފައިސާ ޖަމާ ކުރުމުގެ އިންތިޒާމު ވެސް ހަމަޖައްސެއްވުމުގެ މަސައްކަތް ކުރައްވާކަން، ރައީސް ހާމަކުރެއްވިއެވެ. އެ މަނިކުފާނު ވިދާޅުވީ މަސްވެރިން ކިރާ މަހަށް، 48 ގަޑިއިރުތެރޭ ފައިސާދިނުމަށް މަގުފަހިކުރުމަށް ޓަކައި، މިފްކޯއާއި ބޭންކް އޮފް މޯލްޑިވްސްއާއި މިނިސްޓްރީ އޮފް ފިނޭންސާއެކު، އެގްރިމެންޓެއް ހައްދަވާފައިވާކަމަށެވެ. މި ކަމަށް ޓަކައި، ބީއެމްއެލްއަށް، އެ މަނިކުފާނު ޝުކުރު އަދާކުރެއްވިއެވެ.

​​​މަސްވެރިކަމުގެ ސިނާޢަތު ފުޅާ ކުރުމަށް ޓަކައި، އެ މަނިކުފާނު ވެ ވަޑައިގެންނެވި ވަޢުދުފުޅުތައް ފުއްދެވުމަށް ރާވާފައިވާ އިތުރު ކަންތައްތައް ރައީސް ވަނީ، މި ޖަލްސާގައި ހާމަކުރައްވާފައެވެ. މި ގޮތުން އެސްޓީއޯއިން ތެޔޮ ވިއްކާ ރޭޓްގައި މަސްވެރިންނަށް ތެޔޮލިބޭނެ އިންތިޒާމު، ރާއްޖޭގެ އެކި ސަރަހައްދުތަކުގައި ގާއިމްކުރައްވަން ނިންމެވިކަން ހާމަކުރެއްވިއެވެ. އަދި ރާއްޖޭގެ އެކި ސަރަޙައްދު ތަކުން މަސްވެރިންނަށް އައިސްލިބޭނެ އިންތިޒާމު، މިހާރަށް ވުރެ ފުޅާކުރުމަށް ޓަކައި އިތުރު އައިސް ޕްލާންޓް ބަހައްޓައި، ކައުންސިލްތަކާ މަޝްވަރާކުރައްވައި، ކައުންސިލްތަކުން ބޭނުންވާނަމަ، އައިސްޕްލާންޓްތައް ހިންގުން، ކައުންސިލްތަކާ ޙަވާލުކުރައްވާނެކަން އެ މަނިކުފާނު ހާމަކުރެއްވިއެވެ. މަސްދޯނިފަހަރުގައި، މަސް ފިނިކުރާ ނިޒާމް ޤާއިމްކުރުމަށް ޓަކައި، މިހާރު ފަށާފައި ލޯނުސްކީމް ފުޅާކުރައްވާނެކަން ވެސް ރައީސް ހާމަކުރެއްވިއެވެ.

އެހެން ސިނާޢަތްތަކެކޭ އެއްފަދައިން މަސްވެރިންނަށް ވެސް، ތަފާތު ފުރުޞަތުތައް ފަހިކޮށްދެއްވުމަށް ޓަކައި، މަސްވެރިންގެ ދަފުތަރެއް އެކުލަވާލުމަށް ބޭނުންވާ ޤަވާއިދު ހަދައި ގެޒެޓް ކުރުމުގެ މަސައްކަތް ކުރައްވަމުންގެންދަވާ ކަން ރައީސް ހާމަކުރެއްވިއެވެ. މިގޮތުން މި ދަފުތަރުގައި ރަޖިސްޓްރީވާ މަސްވެރިންނަށް، ބީއެމްއެލްއާއި އެމްއައިބީ އާއި އަދި އެސްޓީއޯ އިން، ތަފާތު ސްކީމްތަކުގައި ބައިވެރިވުމުގެ ފުރުޞަތު ފަހިވެގެންދާނެކަން ރައީސް މުޢިއްޒު ހާމަކުރެއްވިއެވެ. މިއީ ރާއްޖޭގެ އެންމެ ގަދީމީ ސިނާޢަތްކަމަށްވާ، މަސްވެރިކަމުގެ ސިނާޢަތުގައި މަސައްކަތްކުރައްވާ މަސްވެރިންނަށް، ރާއްޖޭގެ އެއްވެސް ސަރުކާރަކުން މިހާތަނަށް ފަހިކޮށް ދެއްވާފައި ނުވާ ފަދަ މުހިއްމު، މަސްވެރިންނަށް ފައިދާހުރި ފުރުޞަތުތަކެއްކަން ފާހަގަކުރަން ޖެހެއެވެ.