އދ.ގެ ޢާންމު މަޖިލީހުގެ ޖަލްސާގައި ބައިވެރިވެވަޑައިގަތުމަށް ކުރެއްވި ދަތުރުފުޅު ނިންމަވައިލެއްވުމަށްފަހު ރައީސް ރާއްޖެ ވަޑައިގެންފި

އދ.ގެ ޢާންމު މަޖިލީހުގެ 79 ވަނަ ސެޝަނުގައި ބައިވެރިވެވަޑައިގަތުމަށް އެމެރިކާގެ ނިއުޔޯކަށް ކުރެއްވި ދަތުރުފުޅު ނިންމަވައިލެއްވުމަށްފަހު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިއަދު ހެނދުނު ރާއްޖެއަށް ވަޑައިގެންފިއެވެ.

އެމެރިކާއަށް ކުރެއްވި މި ދަތުރުފުޅުގައި ރައީސްވަނީ އދގެ އާންމު މަޖިލީހުގައި ތަޤުރީރުކުރައްވާފައެވެ. އެ ތަޤުރީރުގައި އެމަނިކުފާނު ރާއްޖޭގެ ކުރިމަގާމެދު ގެންގުޅުއްވާ ތަޞައްވުރާއި، ދިވެހިރާއްޖޭގެ ކުރިމަގު ބައްޓަންކުރެއްވުމަށް ތަންފީޒުކުރައްވަން ނިންމަވާފައިވާ ބައެއް ސިޔާސަތުތައް ހުށަހެޅުއްވިއެވެ. އަދި ދުނިޔޭގެ މަސްރަހުގައި ހިނގަމުންދާ މުހިއްމު ބައެއް ކަންކަމުގައި ރާއްޖެއިން ދެކޭ ގޮތް ހާމަކުރެއްވިއެވެ.

އޭގެ އިތުރަށް އެމަނިކުފާނުވަނީ އދގެ އެންމެ ބާރުގަދަ ގުނަވަންކަމަށްވާ ސަލާމަތީ މަޖިލީހުގައި ތަޤުރީރުކުރައްވާފައެވެ. މިއަދީ ދިވެހިރާއްޖޭގެ ރައީސަކު އދގެ އަލާމަތީ މަޖިލީހުގައި ތަޤުރީރުކުރެއްވި ފުރަތަމަ ފަހަރެވެ. އެ ތަޤުރީރުގައި ސަލާމަތީ މަޖިލިސް އިސްލާހުކުރުމަށް ގޮވައިލައްވައި، ވީޓޯގެ އިމްތިޔާޒު އުވައިލުމަށް ބާރުއެޅުއްވިއެވެ.

އދ.ގެ ޢާންމު މަޖިލީހުގެ ބައްދަލުވުމުގެ ހަވާސާގައި ހިނގި ބައެއް ޙަރަކާތްތަކުގައި ކޯ-ޗެއާގެ ހައިސިއްޔަތުން ރިޔާސަތު ބެލެހެއްޓެވުމާއެކު، ތަރައްޤީވަމުން އަންނަ ކުދި ޖަޒީރާ ޤައުމުތަކުން ބޭއްވި އެކި ބައްދަލުވުންތަކުގައި ބައިވެރިވެވަޑައިގެން އެމަނިކުފާނުވަނީ ރާއްޖެ ފަދަ ކުދި ޖަޒީރާ ޤައުމުތަކުގެ ޙައްޤުގައި ވަކާލާތުކުރައްވާފައެވެ.

އޭގެ އިތުރަށް އެމެރިކާގެ ނިއު ޔޯކް ސަރަހައްދުގައި ދިރިއުޅޭ ދިވެހިންނާ ރައީސް ބައްދަލުކުރެއްވިއެވެ. އަދި އެ ޤައުމުގެ އެންމެ މަޝްހޫރު އެއް ޔުނިވަސިޓީކަމަށްވާ ޕްރިންސްޓަން ޔުނިވަސިޓީއަށް ޒިޔާރަތްކުރައްވައި އެތަނުގައި ތަޤުރީރުކުރެއްވިއެވެ. އަދި ނިއު ޔޯކުގައި ހުންނަ ގޫގުލްގެ އޮފީހަކަށް ޒިޔާރަތްކުރައްވައި އެ ކުންފުނީގެ އޮފިޝަލުންނާ ބައްދަލުކުރެއްވިއެވެ.

އަދި އާންމު މަޖިލީހުގެ ޖަލްސާގެ ހަވާސާގައި އެމަނިކުފާނުވަނީ ދުނިޔޭގެ އެކި ޤައުމުތަކުގެ ލީޑަރުންނާއި ބައިނަލްއަޤުވާމީ ޖަމްޢިއްޔާ ޖަމާޢަތްތަކުގެ މަންދޫބުންނާ ބައްދަލުކުރައްވާފައެވެ.