ޑިޖިޓަލައިޒޭޝަނަކީ ތަރައްޤީގެ އެއް ތަނބު ކަމުގައި ރައީސުލް ޖުމުހުރިއްޔާ ވިދާޅުވެއްޖެ

ޑިޖިޓަލައިޒޭޝަނަކީ ޤައުމީ ތަރައްޤީގެ އެއް ތަނބުކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ފަދައިން ވިދާޅުވީ، މިއަދު ކުރިއަށްދިޔަ "ސަމިޓް އޮފް ދަ ފިއުޗަރ ސައިޑް އިވެންޓް: އަ ވިޝަން ފޯ އެން އިންޓެލިޖެންސް ޑްރިވަން ފިއުޗަރ ފޯ މޯލްޑިވްސް" ގައި ވާހަކަފުޅު ދައްކަވަމުންނެވެ. ދަރުމަވަންތަ ހޮސްޕީޓަލުގެ އުޑުވިލާ މާލަމުގައި މިއަދު، 9 ސެޕްޓެމްބަރ 2024 ގައި ބޭއްވި ޖަލްސާގައި ވާހަކަފުޅުދައްކަވަމުން ރައީސުލް ޖުމުހުރިއްޔާ ވިދާޅުވީ، ރާއްޖެއަށް ކުރިމަތިވެފައިވާ ގޮންޖެހުންތަކާއި އެ ގޮންޖެހުންތަކުން އަރައިގަތުމުގައި، ރާއްޖެއިން މިސާލު ދައްކާފައިވާ ކަމަށެވެ. އެއީ އީޖާދީ ވިސްނުންތަކަށް ރާއްޖެ އަހުލުވެރިވެފައިވާ މިންވަރުގެ ސަބަބުން ލިބިފައިވާ ކުރިއެރުމެއްކަމަށް ވެސް އެ މަނިކުފާނު ވިދާޅުވިއެވެ.

ގުދުރަތީ ވަޞީލަތްތައް މެނޭޖުކުރުމާއި ރައްޔިތުންނަށް ފޯރުކޮށްދޭ ޚިދުމަތްތަކުގައި، ޑިޖިޓަލައިޒޭޝަން މުހިއްމު ދައުރެއް އަދާކުރާ ކަމުގައި އެ މަނިކުފާނު ވިދާޅުވިއެވެ. ޑިޖިޓަލައިޒޭޝަންގެ ދައުރަކީ ހަމައެކަނި އިޤްތިޞާދީ ފައިދާ ހޯދުން ނޫންކަމަށާއި އޭގެ ތެރޭގައި ރައްޔިތުންގެ އާންމު ދިރިއުޅުން ފަސޭހަވެގެންދިއުން ވެސް ހިމެނޭ ކަމަށް އެ މަނިކުފާނު ވިދާޅުވިއެވެ. ޑިޖިޓަލް މާހައުލަކަށް ރައްޔިތުން އަހުލުވެރިކުރުވުމުގެ ސަބަބުން، ކުރިމަގުގައި ޑިޖިޓަލް ސެކްޓަރގައި ހަރަކާތްތެރިވާ، ކްރިއޭޓަރުން އުފެދޭނެ މާޙައުލެއް ޤާއިމްވެގެންދިޔުމަކީ ވެސް، ޑިޖިޓަލައިޒޭޝަންގެ ތެރޭގައި ހިމެނޭ ކަމެއްކަމުގައި އެ މަނިކުފާނު ފާހަގަކުރެއްވިއެވެ.

ޑިޖިޓަލް މޯލްޑިވްސް ފަދަ ޕްރޮގްރާމްތަކުގެ ޒަރީޢާއިން، ޒުވާނުންނަށް ބޭނުންވާ އެކި ހުނަރު ދަސްކޮށްދީ، ޑިޖިޓަލް އިޤްތިޞާދެއްގައި ކާމިޔާބު ހޯދުމަށް އެހީތެރިކަން ފޯރުކޮށްދެމުން ދާކަމަށާއި ތަފާތު ކުރުމެއްނެތި، ހަމަ ހަމަކަމާއެކު މި ފުރުޞަތުތައް، ކަނބަލުންނަށް ފޯރުކޮށްދިނުމުގެ މަސައްކަތް ވެސް ކުރައްވަމުން ގެންދަވާކަމަށް ރައީސުލްޖުމްހުރިއްޔާ ވިދާޅުވިއެވެ. ރާއްޖެއަށް ކުރިމަތިވެފައިވާ ތިމާވެށީގެ މައްސަލަތައް ޙައްލުކުރުމުގައި، ޑިޖިޓަލައިޒޭޝަންގެ އެހީ ހޯދުމުގެ މައްޗަށް ވެސް ރައީސުލްޖުމްހޫރިއްޔާ ޑރ. މުޢިއްޒުގެ ވާހަކަފުޅުގައި އަލި އަޅުއްވާލެއްވިއެވެ. އެ ގޮތުން، ތިމާވެށީގެ މައްސަލަތައް ޙައްލުކުރުމުގައި "އަރލީ ވޯނިންގް ސިސްޓަމާއި" "ސްމާޓް" ޓެކްނޮލޮޖީގެ ބޭނުންކޮށްގެން، ވިލުންވެރި އަދި ދެމެހެއްޓެނިވި ކުރިމަގެއް ހޯދުމުގެ މަސައްކަތް މިހާރު ވެސް ކުރައްވަމުންގެންދަވާކަން އެ މަނިކުފާނު ފާހަގަކުރެއްވިއެވެ.

ޑިޖިޓަލައިޒޭޝަންގައި ފައިދާތަކުގެ އިތުރުން އޭގެ ސަބަބުން ގޮންޖެހުންތައް ވެސް ކުރިމަތިވާ ކަމަށާއި މި ގޮންޖެހުންތަކަށް އެކަށީގެންވާ ޙައްލު ހޯދުމަށް، ބައިނަލްއަޤްވާމީ ގުޅުންތައް ގާއިމްކުރުން މުހިންމުކަމަށް ވެސް އެ މަނިކުފާނު ވިދާޅުވިއެވެ. ރާއްޖޭގައި ޑިވެލޮޕްމަންޓް ބޭންކް އުފެއްދެވުމުގެ މަސައްކަތް ފެއްޓެވީ، މަޝްރޫޢުތަކަށް ބޭނުންވާ ފައިސާ، ފަސޭހަކަމާއެކު ހޯއްދެވުމަށްކަމަށް ރައީސުލްޖުމްހޫރިއްޔާ ވިދާޅުވިއެވެ. މިއީ ޑިޖިޓަލް އިނޮވޭޝަނާއި ދެމެހެއްޓެނިވި އިޤްތިޞާދީ އަދި އިޖްތިމާޢީ ތަރައްޤީގެ މަޝްރޫޢުތަކަށް ފައިނޭންސްކުރާ ބެންކަކަށްވާނެ ކަމަށް އެ މަނިކުފާނު ވިދާޅުވިއެވެ.