ޚަރަދު ކުޑަކުރުމަށް އަޅާ ފިޔަވަޅުތަކުން ރައްޔިތުންނަށް އެއްވެސް އުނިކަމެއް ނާންނާނެ: މަޖިލީހުގެ ނައިބު ރައީސް

ދަޢުލަތުގެ ޚަރަދުތައް ކުޑަކުރުމަށް ސަރުކާރުން އަޅާ އެއްވެސް ފިޔަވަޅެއްގެ ސަބަބުން ރައްޔިތުންގެ ދިރިއުޅުމުގެ ފެންވަރަށް އެއްވެސް އުނިކަމެއް ނާންނާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެއެވެ.

ރައީސް ޑރ.މުޙައްމަދު މުޢިއްޒުގެ އިސްލާހީ އެޖެންޑާގައި ހިމެނޭ ބައެއް ކަންކަމުގެ މައްޗަށް އަލިއަޅުވާލައްވާ ކޮންގްރެސް ޕާޓީގެ ހަރުގެ ޖަލްސާގައި ރޭ ވާހަކަ ދައްކަވަމުން ނާޒިމް ވަނީ ރާއްޖޭގެ އިޤްތިޞާދީ ޙާލަތު އިސްލާހު ކުރުމަށް އެންމެ އިސްކަން ދޭން ޖެހޭ ކަމަކީ އާމްދަނީ އިތުރު ކުރުމާއި ޚަރަދު ކުޑަކުރުންކަން ފާހަގަކުރައްވާފައެވެ.

މިމޭރުމުން ވާހަކަ ދައްކަވަމުން ނާޒިމް ވިދާޅުވީ ޚަރަދު ކުޑަކުރުމަށް ސަރުކާރުން އަޅާ އެއްވެސް ފިޔަވަޅެއްގެ ސަބަބުން އާންމު ރައްޔިތުންގެ ދިރިއުޅުމުގެ ފެންވަރަށް އެއްވެސް އުނިކަމެއް ނާންނާނެ ކަމުގެ ޔަޤީން ކަން އެބަ އޮތް ކަމަށެވެ. އަދި ރައްޔިތުންނަށް މިހާރު ލިބެމުންދާ ޚިދުމަތްތައް ފުރިހަމަކަމާއެކު ލިބެމުންދާނެ ކަން ވެސް ނާޒިމް ފާހަގަކުރެއްވިއެވެ.

"އެންމެ ބޮޑަށް ބޭނުންވެފައިވާ ފަރާތްތަކަށް އެއްވެސް ކަހަލަ އުނިކަމެއް ނެތި ޚިދުމަތްތައް ލިބެމުންދާނެ ގޮތަކަށް ބަޖެޓުގެ ކަންތައްތައް ވެސް ނިމިގެންދާނެ. ސަރުކާރުން ހިންގަމުންދާ މަޝްރޫއުތައް ތަރުތީބު ކުރުމަށް ފަހު އެންމެ އަވަހަށް ނިންމަން ޖެހޭ މަޝްރޫއުތަކަށް އިސްކަންދީގެން ނިންމަމުންދާނެ" ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވިއެވެ.

ނާޒިމް ވަނީ ޚަރަދު ކުޑަކުރުމުގެ ފިޔަވަޅުތައް އެޅި ނަމަވެސް އާސަންދަ ފަދަ ޚިދުމަތްތަކުގެ ބޭނުން އެންމެ ބޮޑަށް ޖެހިފައިވާ ރައްޔިތުންނަށް އެކަންކަން ފުރިހަމަވެގެންދާނެ ކަމުގެ ޔަޤީންކަން ވެސް ދެއްވާފައެވެ.

ނާޒިމް ވިދާޅުވީ ޤައުމު ހަމަ މަގަކަށް އެޅުމަށް މިހޭދަވާ ވަގުތުގައި ރައްޔިތުންގެ އެއްބާރުލާއެކު މި މަސައްކަތް ކުރެވިއްޖެނަމަ ކުރިއަށް އޮތީ ހިތްހަމަޖެހޭ، ލުއި ދުވަސްތަކެއް ކަމަށެވެ.