ރައީސްގެ ފަހަތްޕުޅުގައި ބޮޑު ޓީމެއް އޮތީ އެމަނިކުފާނުގެ ޚުލްގުފުޅު ހެޔޮކަމާއި ހިތްތިރިކަމުން: މެންބަރު ސަލީމު

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ފަހަތްޕުޅުގައި ބޮޑު ޓީމެއް އޮތީ އެމަނިކުފާނުގެ ޚުލްގުފުޅު ހެޔޮކަމާއި ހިތްތިރިކަމުން ކަމަށް އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވެއްޖެއެވެ.

ސަލީމް މިފަދައިން ވިދާޅުވީ ރޭ ކުރިއަށްދިޔަ ޕީއެންސީ ޖަގަހަ ޖަލްސާގައި ވާހަކަފުޅު ދައްކަވަމުންނެވެ.

ސަލީމް ވިދާޅުވީ ރައީސް މުޢިއްޒުއަކީ ޤައުމު ދެކެ ލޯބިވާ އިޚުލާސްތެރި ވެރިއެއް ކަމަށާއި، އެމަނިކުފާނުގެ ފަހަތްޕުޅުގައި ބޮޑު ޓީމެއް އޮތުމުގެ ސިއްރަކީވެސް އެއީ ކަމަށެވެ.

"އެމަނިކުފާނުގެ ޚުލްގުފުޅުގެ ރަނގަޅުކަމާއި، އެމަނިކުފާނުގެ ހިތްތިރިކަމާއި، އެމަނިކުފާނުގެ އަޚުލާގުގެ ރަނގަޅު ކަމާއި، މިއީ އެމަނިކުފާނުގެ އަރިހުގައި ހަޤީގަތުގައި އަޅުގަނޑުމެންގެ މިއޮތް ބޮޑު ޓީމް އޮތުމުގެ އަސްލަކީ،". ސަލީމު ވިދާޅުވިއެވެ.

މީގެ އިތުރުން ސަލީމް ވިދާޅުވީ ރައްޔިތުންގެ ވިސްނުން އެމަނިކުފާނަށް އެނގޭ މިންވަރު ނިމިދިޔަ މަޖިލިސް އިންތިޚާބުންވެސް ފެނިގެން ގޮސްފައިވާ ކަމަށެވެ. އެގޮތުން ސަރުކާރަށް މެޖޯރިޓީ ނުލިބޭނެ ކަމަށް އެންމެން ބުނަމުން ދިޔައިރުވެސް ރައީސް ވިދާޅުވަމުން ދިޔައީ އެންމެ މަދުވެގެން 65 ގޮނޑި އެމަނިކުފާނަށް ލިބޭނެ ކަމަށާއި މަޖިލީހުގެ މެޖޯރިޓީ ރައްޔިތުން ސަރުކާރަށް ދޭނެކަމުގެ ޔަޤީންކަން އެމަނިކުފާނަށް އޮތް ކަމަށް ސަލީމް ވިދާޅުވިއެވެ.

ރައީސް މުޢިއްޒުއަކީ ޤައުމުދެކެ، ރައްޔިތުން ދެކެ ލޯބިވާ ވެރިޔެއް ކަމަށް ސަލީމް ވަނީ ވިދާޅުވެފައެވެ. އެމަނިކުފާނަކީ ދީނަށް ލޯބިކުރާ އިޚުލާސްތެރިއެއް ވެރިއެއްކަން ފާހަގަކުރައްވަމުން ސަލީމް ވިދާޅުވީ ދީންދެކެ ލޯބިނުވާ ބޭފުޅަކު ޤައުމު ދެކެވެސް ލޯބި ނުވާނެ ކަމަށެވެ.

"މީހެއްގެ މޮޅު ކަމަކީ އެމީހެއްގެ ހުންނަ ތަޤުވާވެރިކަން،". ސަލީމް ވިދާޅުވިއެވެ.