ރައްޔިތުންނަށް ގިނަ މަންފާތަކެއް ހޯއްދަވައިދެއްވުމަށް އެކުލަވާލެއްވި ޑޮލަރު މާރުކުރުމުގެ ޤަވާޢިދު ބަދަލުކުނުރައްވާނެ ކަމަށް ރައީސް ވިދާޅުވެއްޖެ.

ރައްޔިތުންނަށް ގިނަ މަންފާތަކެއް ހޯއްދަވައިދެއްވުމަށް އެކުލަވައިލެއްވި، ޑޮލަރު މާރުކުރުމުގެ ޤަވާޢިދު ބަދަލުކުނުރައްވާނެ ކަމަށް ރައީސުލްޖުމުހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިފަދައިން ވިދާޅުވީ، ސަރުކާރަށް އެއް އަހަރު ފުރުން ފާހަގަކުރުމަށް، ސޯޝަލް ސެންޓަރުގައި 17 ނޮވެމްބަރ 2024 ގައި ބޭއްވި ޖަލްސާގައި ވާހަކަ ފުޅު ދައްކަވަމުންނެވެ.

ފަތުރުވެރިކަމުގެ ވިޔަފާރިތަކަށް ބޭރު ފައިސާއިން ލިބޭ އާމްދަނީގެ ތެރެއިން ކުޑަ މިންވަރެއް، ރާއްޖޭގެ ބޭންކުތަކަށް މާރުކުރުން ލާޒިމުކުރާ ގަވާޢިދާއި މެދު، އެ ސިނާޢަތުގައި މަސައްކަތް ކުރައްވާ ބައެއް ފަހަރާތްތަކުގެ ހިތްހަމަ ނުޖެހުން އޮތް ނަމަވެސް، އެ ޤަވާޢިދު ބަދަލު ނުކުރައްވާނެކަން ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވީ، ރާއްޖޭގެ އިޤުތިޞާދު މިހާރު އޮތް ޙާލަތުން އަރަގައިތުމަށް، އެ ޤަވާޢިދަށް ޢަމަލުރުމުން، ރައްޔިތުންނަށް ލިބޭނެ ގިނަ ގުނަ ފައިދާތަކުގެ ސަބަބުންނެވެ.

ރައީސް މުޢިއްޒު ވިދާޅުވީ މިހާރު ސަރުކާރު ހިއްސާވާ ވަރަށް ގިނަ ކުންފުނިތަކުން، ޑޮލަރު ގަންނަންޖެ ހެނީ ކަޅު ބާޒާރުގައި، ބޮޑު އަގުގައި ކަމަށާއި އެ ކަމުގެ ސަބަބުން ދައުލަތަށް ބޮޑު ބުރައެއް އުފުލަންޖެހިފައިވާ ކަމަށެވެ. އަދި ޑޮލަރު މާރުކުރުމުގެ ގަވާއިދަށް، ޖަނަވަރީ އެކަކުން ފެށިގެން އަމަލުކުރަން ފެށުމާއެކު، ރަސްމީ ރޭޓުގައި އެސްއޯއީތަކަށް ޑޮލަރު ގަނެވޭނެ އިންތިޒާމު ހަމަޖެހިގެންދާނެ ކަމަށް، އެ މަނިކުފާނު ވިދާޅުވިއެވެ.

މި ގަވާޢިދަށް ޢަމަލުކުރަން ފެށުމުން ސީދާ ރައްޔިތުންނަށް ލިބޭނެ ފައިދާ ހާމަކުރައްވަމުން ރައީސް ވިދާޅުވީ، ގަވާޢިދު ރަނގަޅަށް ތަންފީޒުކުރެވޭނަމަ 2026 ފުރަތަމަ ކްއާޓާރގައި، މިހާރު ރާއްޖެއިން ބޭރަށް ފުރާ ކޮންމެ ދިވެއްސަކަށް އެއާޕޯޓުން ދޫކުރަމުންދާ 500 ޑޮލަރު 1،000 ޑޮލަރަށް އިތުރުކުރެވޭނެ ކަމަށެވެ. އަންނަ ޖަނަވަރީން ފެށިގެން ދެމެހެއްޓެނެވި ގޮތަކަށް ޑޮލަރު މާރުކުރުމުގެ ކަންކަން ކުރެވޭނަމަ، 2026 ވަނަ އަހަރުގެ ފުރަތަމަ ކުއާޓާއަށް އަންނައިރު، ކްރެޑިޓު ކާޑުތަކުގެ ލިމިޓު 750 ޑޮލަރުން 1،400 ޑޮލަރަށް އިތުރުކުރެއްވޭނެ ކަމުގައި ރައީސް މުއިއްޒު ވިދާޅުވި އެވެ. ރައީސް މުޢިއްޒު އިތުރަށް ވިދާޅުވީ ޑޮލަރު މާރުކުރުމުގެ ކަންކަން، ޖަނަވަރީން ފެށިގެން ރަނގަޅަށް ކުރިއަށްދާނަމަ، ހަ މަސް ދުވަހުގެ މުއްދަތެއްގެ ތެރޭގައި، ރާއްޖެއިން ބޭރުން މުދާ އިމްޕޯޓު ކުރުމަށް، މިހާރު ބޭންކުތަކުން ޑޮލަރު ދޫކުރާ މިންވަރު އިތުރުކޮށްދެއްވާނެ ކަމަށެވެ.

ސަރުކާރަށް އެއް އަހަރު ފުރުމުގެ މުނާސަބަތުގައި ބޭއްވި ޖަލްސާގައި ރައީސްވަނީ، 1970ގެ އަހަރުތަކުން ފެށިގެން، އަމިއްލަ ގޮތުން، ފަތުރުވެރިކަމުގެ ވިޔަފާރި ފައްޓަވައި، އެ ދާއިރާ ކުރިއަށްގެންދެވި ބޭފުޅުންނަށް ޝުކުރު އަދާކުރައްވާފައެވެ. އަދި އެ ބޭފުޅުން ކިބައިން އެ މަނިކުފާނު އެދިވަޑައިގަންނެވީ، ޤައުމަށާއި ރައްޔިތުންނަށް ހެވެއް ނެދޭ، ސިޔާސީ ލީޑަރުން، އެ ބޭފުޅުންގެ ނާޖައިޒު ފައިދާ ނެގުމަށް ފުރުސަތު ނުދެއްވުމަށް ކަމަށެވެ.