ޤައުމީ ތަރައްޤީގެ 20 އަހަރުގެ މާސްޓަރޕްލޭން އެކުލަވާލުމުގެ މަސައްކަތުގައި ރައްޔިތުން ބައިވެރިވުމަށް ރައީސް އިލްތިމާސްކުރައްވައިފި

ސިޔާސީ ފިކުރު އެއްކިބާކޮށް، ޤައުމާއި ރައްޔިތުންނަށް އަދި އަންނަން އޮތް ޖީލުތަކަށް ފައިދާވާނޭ ގޮތަށް، ޤައުމީ ތަރައްޤީގެ، 20 އަހަރުގެ މާސްޓަރޕްލޭން ތަންފީޒުކުރުމުގައި ރައްޔިތުން އެއްބާރުލުން ދެއްވުމަށް، ރައީސުލްޖުމުހުރިއްޔާ ޑރ. މުޙައްމަދު މުޢިއްޒު އިލްތިމާސް ކުރައްވައިފިއެވެ. އެ މަނިކުފާނު މިކަމަށް އިލްތިމާސް ކުރެއްވީ، މިއަދު ޤައުމީ ތަރައްޤީގެ 20 އަހަރުގެ މާސްޓަރޕްލޭން އިފުތިތާޙު ކުރުމަށް ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.

​​​މިއަދު އިފުތިތާޙު ކުރި 20 އަހަރުގެ މާސްޓަރޕްލޭންގައި، ޒަމާނީ ޓެކްނޮލޮޖީއާއި ޑިޖިޓަލް އިޤްތިޞާދަށް އިސްކަންދީގެން، ރައްޔިތުންނަށް ކުރިމަތިވެފައިވާ މައިގަނޑު ގޮންޖެހުންތައް ޙައްލުކުރުމުގެ ވިސްނުން އިސްކުރުމަށް ވެސް ރައީސުލްޖުމްހޫރިއްޔާ އިލްތިމާސް ކުރެއްވިއެވެ. ރައީސް މުޢިއްޒު ވިދާޅުވީ، މި ޕްލޭން ރާވައި، ފުރިހަމައަށް ތަންފީޒުކުރެވިއްޖެނަމަ، 2040 ވަނަ އަހަރުގެ ކުރިން، ރާއްޖެއަކީ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ގިންތިކުރެވިގެންދާނެކަމަށެވެ.

އެއް އަހަރު ދުވަހުގެތެރޭގައި، އެއްކޮށް މަސައްކަތް ނިންމާލުމަށް އަމާޒު ހިފާފައިވާ ޤައުމީ ތަރައްޤީގެ 20 އަހަރުގެ މާސްޓަރޕްލޭން އެކުލަވާލުގެ މަސައްކަތުގެ ޕެނަލް ޑިސްކަޝަންގައި، މުޖުތަމަޢުގައި ހިމެނޭ، ހުރިހާ ފަންތިއެއްގެ ހުރިހާ ގިންތިއެއްގެ ބޭފުޅުން ބައިވެލައްވައެވެ. އޭގެތެރޭގައި، ބެލެނިވެރިންނާއި، މުދައްރިސުންނާއި، ދަރިވަރުންނާއި، އެކި މުއްއްސަސާތަކާއި، ސިވިލް ސޮސައިޓީއާއި، ޚާއްޞަ އެހީއަށް ބޭނުންވާ ފަރާތްތަކާއި، އަދި އެކި ދާއިރާތަކުގެ ބައިވެރިން ހިމެނެއެވެ. މި ޕްލޭނަށް ޤާނޫނީ ބާރު ދިނުމަށް ޓަކައި، ގާނޫނުއަސާސީއަށް، މާއްދާއެއް އިތުރުކުރުމަށް ވެސް ސަރުކާރުން ވަނީ ނިންމަވާފައެވެ.