މުބާރާތް ތަކުގައި ބައިވެރިވިޔަސް އިސްލާމްދީނުގައި އަންގަވާފައިވާ ގޮތަށް ޢަމަލުތައް ބެހެއްޓެވުމަށް ރައީސް އިލްތިމާސް ކުރައްވައިފި

ދިވެހިން އެކި މުބާރާތްތަކުގައި ބައިވެރިވިޔަސް، އިސްލާމްދީނުގައި އަންގަވާފައިވާ ގޮތަށް ޢަމަލުތައް ބެހެއްޓެވުމަށް، ރައީސުލް ޖުމުހުރިއްޔާ ޑރ. މުޙައްމަދު މުޢިއްޒު އިލްތިމާސް ކުރައްވައިފިއެވެ. މިސް ޔުނިވާރސް ހޮވުމުގެ މުބާރާތުގައި، ފުރަތަމަ ފަހަރަށް ދިވެހިރާއްޖެ ތަމްސީލުކުރުމަށް، ނިވާކަން ކުޑަ ގޮތަކަށް ހެދުން އަޅައިގެން، ދިވެހި ޒުވާނަކު ބައިވެރިވުމުން، މުޖުތަމަޢުންދަނީ އެކަމާ ކަންބޮޑުވުން ފާޅުކުރަމުންނެވެ.

​​​މި ކަމާ ކަންބޮޑުވުން ފާޅުކުރައްވައި، 30 އޮކްޓޫބަރ 2024 ގައި، އެކްސްގައި ކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ ''ފިރިހެނަކަށް ވިސްޔަސް، އަންހެނަކަށް ވިޔަސް، މާތް الله ރުހިވޮޑިގެން ނުވާ ގޮތަށް، ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދީނާއި ޤައުމަށް ލިބޭނެ ޙަޤީޤީ ރީތި ނަމެއް، އުފަލެއް، ކާމިޔާބެއް، ނެތް'' ކަމަށެވެ.

​​​ދިވެހިރާއްޖެއަކީ ސައްތައިންސައްތަ މުސްލިމް ޤައުމެއްކަމުން، ދިވެހިން ކުރާ ކޮންމެ ކަމެއް ވެސް ކުރަން ވާނީ، އިސްލާމީ އުޞޫލުތަކާ އެއްގޮތަށްކަން ބަޔާންކުރެއްވުމަށް، ރައީސް ކުރެއްވި ޕޯސްޓުގައި ވަނީ، ކީރިތި ޤުރުއާނުގެ އިސްރާ ސޫރަތުގެ 81 ވަނަ އާޔަތާއި، އެ އާޔަތުގެ މާނައިން ޙުއްޖަތު ދައްކަވާފައެވެ.

ރައީސް މުޢިއްޒަކީ، ދީނުގެ އަޅުކަންތައް އަދާ ކުރެއްވުމުގައި ޢަމަލީ ގޮތުން ނަމޫނާ ދައްކަވަމުންގެންދަވާ އަދި ދިވެހިރާއްޖޭގެ އިސްލާމީ ވަޙުދަތު ނެގެހެއްޓެވުމަށް ވަރަށް ބޮޑަށް އިސްކަން ދެއްވާ ބޭފުޅެކެވެ. ރާއްޖެއް އިސްލާމްވީ ދުވަހުގެ މުނާސަބަތުގައި، ބޭއްވި ޖަލްސާގައި އެ މަނިކުފާނު ކުރެއްވި ތަޤުރީރުގައި ވަނީ، ދިވެހި ޤައުމިއްޔަތުގެ ''މަދަކީ'' އިސްލާމް ދީންކަން ހާމަކުރައްވައި، އިސްލާމީ އުސޫލުތައް ދެމެހެއްޓެވުމަށް އެ މަނިކުފާނު އިސްކަން ދެއްވާ މިންވަރު ބަޔާންކުރައްވާފައެވެ.