ރައީސްގެ ވައުދު ފުއްދަވައިފި؛ ދަރިވަރުންނަށް 1200 ޑޮލަރާ ހަމައަށް ކާޑުތަކުން ނެގޭނެ

ބޭންކް އޮފް މޯލްޑިވްސްއިން އިޝޫކޮށްފައިވާ ޑެބިޓު ކާޑުތައް ބޭނުންކޮށްގެން ބޭރުގައި ކިޔަވާ ދަރިވަރުންނަށް މުއާމަލާތްކުރެވޭ ލިމިޓު ބޮޑުކުރައްވާނެކަމަށް 2023 ވަނަ އަހަރުގެ ރިޔާސީ އިންތިޚާބުގައި ވެވަޑައިގެންނެވި ވަޢުދު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފުއްދަވައިފިއެވެ.

މިއަދު ބީއެމްއެލްއިން ނެރުނު ބަޔާނެއްގައި ބުނެފައިވަނީ ކޮވިޑް-19ގެ ޢާލަމީ ވަބާގެ ސަބަބުން ކުރިމަތިވި މާލީ ދަތިތަކާއެކު ބޭރުގައި ކިޔަވާ ދަރިވަރުންނަށް ކާޑުތަކުން ކުރެވޭ މުޢާމަލާތްތައް 750 ޑޮލަރުގައި ހިފަހެއްޓުމަށް އެ ބޭންކުން ނިންމި ނިންމުން މުރާޖަޢާކޮށް 1،200 ޑޮލަރާ ހަމައަށް ދަރިވަރުންނަށް ކާޑުތަކުން މުޢާމަލާތްކުރެވޭ ގޮތަށް ނިންމައިފި ކަމަށެވެ.

މި ނިންމުން ބޭންކުން ނިންމާފައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެވަޑައިގެންނެވި ވަޢުދުފުޅާ އެއްގޮތަށް ޓޫރިޒަމް ވިޔަފާރިތަކަށް ބޭރު ފައިސާއިން ލިބޭ އާމްދަނީ ބޭންކުތަކަށް ޖަމާކުރުން ލާޒިމުވާނެ ގޮތަށް މޯލްޑިވްސް މަނިޓަރީ އޮތޯރިޓީން ޤަވާޢިދު އެކުލަވައލާފައިވަނިކޮށެވެ.

އަދި ޓޫރިޒަމް ވިޔަފާރިތަކަށް ބޭރު ފައިސާއިން ލިބޭ އާމްދަނީގެ ތެރެއިން ވަކި މިންވަރެއް ބޭންކުތަކަށް މާރުކުރުންވެސް އެމްއެމްއޭއިންވަނީ ލާޒިމުކޮށްފައެވެ.

އެމްއެމްއޭއިން ގެނައި މިބަދަލުތަކާއެކު ބޭންކުތަކަށް ޖަމާކުރާ ޑޮލަރާއި، ބޭރުފައިސާއިން ޚިދުމަތްތައް ދިނުމަށް ބޭންކުތަކުގައި ހުރި ޑޮލަރު އިތުރުވާނެކަމަށް އެމްއެމްއޭއިން ބުނެފައވެއެވެ. އޭގެ އިތުރަށް ރައީސް ޑރ.މުޙައްމަދު މުޢިއްޒު އިންޑިޔާއަށް ކުރެއްވި ދަތުރުފުޅުގައި އިންޑިޔާގެ ރިޒާވް ބޭންކާއި އެމްއެމްއޭގެ މެދުގައި 400 މިލިއަން ޑޮލަރުގެ ކަރަންސީ ސްވޮޕު އެއްބަސްވުމެއްގައި ސޮއިކުރައްވާފައެވެ.

މި ކަރަންސީ ސްވޮޕުގެ ސަބަބުން ބޭންކުތަކަށް ބޭނުންވާ ބޭރު ފައިސާ ދޫކުރުމުގައި އެމްއެމްއޭއަށް ވަރަށް ބޮޑު ލުޔެއް ލިބިގެންދާނެ ކަމުގައި އެ އިދާރާއިން ބުނެފައިވެއެވެ.