ޚަރަދު ކުޑަކުރުމަށް މުހިއްމު ގިނަ ފިޔަވަޅުތަކެއް އަޅުއްވަން ރައީސް ނިންމަވައިފި

ރާއްޖެއަށް މިހާރު ކުރިމަތިވެފައިވާ މާލީ ދަތި ޙާލަތުން އަރައިގަތުމުގެ ގޮތުން އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާ ބަޖެޓުގެ ޚަރަދުތައް ކުޑަކުރުމަށް މުހިއްމު ފިޔަވަޅުތަކެއް އެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވައިފިއެވެ.

އެގޮތުން ރައީސްވަނީ އެމަނިކުފާނުގެ މުސާރައިގެ ދެބައިކުޅަ އެއްބައި ނުނެންގެވުމަށް ނިންމަވާފައެވެ. އަދި ސިޔާސީ މުވައްޒަފުންނާއި ދައުލަތުގެ ކުންފުނިތަކުގެ މުވައްޒަފުންގެ މުސާރައިން 10 އިންސައްތަ އުނިކުރައްވައި ދައުލަތުގެ އެހެނިހެން މުއައްސަސާތަކުގެ ވެރިންގެ މުސާރައިން މިންވަރެއް އުނިކުރަން ހުށަހަޅުއްވަން ރައީސް ނިންމަވާފައިވެއެވެ.

އެގޮތުން ރައްޔިތުންގެ މަޖިލީހުގެ މެންބަރުންނާއި ޝަރުޢީ ދާއިރާގެ އިސްވެރިންގެ މުސާރައިން %10 އުނިކުރުމަށް ހުށަހަޅުއްވާނެ ކަމުގައި ރައީސް އިޢުލާނު ކުރައްވާފައިވެއެވެ. އަދި ކުންފުނިތަކުގެ އިސްވެރިންގެ މުސާރަ 90،000 އަށްވުރެ ބޮޑުނުވާނެ ގޮތަކަށް ކުންފުނިތަކުގެ އޮނިގަނޑުތައް އިޞްލާޙުކުރަން ނިންމަވާފައިވާ ކަމަށްވެސް ރައީސް ވިދާޅުވިއެވެ.

މުސާރައިން އުނިކުރަން ނިންމެވި ނިންމެވުމުން 12،000 އަށްވުރެ ކުޑަ މުސާރަ ލިބޭ މުވައްޒަފުން އިސްތިސްނާވާނެ ކަމުގައި ރައީސްވަނީ ވިދާޅުވެފައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ ދައުލަތުގެ ޚަރަދުތައް ކުޑަކޮށް ދައުލަތަށް ލިބޭ އާމްދަނީ އިތުރުކުރުމަށް މާލީ އިޞްލާޙީ އެޖެންޑާއެއް އިޢުލާނުކުރައްވާފައެވެ. ދައުލަތުގެ މަތީ ފަނޑީގެ ޚަރަދުތަކާއި ކުންފުނިތަކުގެ ޚަރަދުތައް ކުޑަކުރެއްވުމާއެކު، ޓެކުސް ނިޒާމަށް އިޞްލާޙީ ބަދަލުތަކެއް ގެންނަވަން އެމަނިކުފާނުވަނީ ހުށަހަޅުއްވާފައެވެ. އަދި އާސަންދައިގެ ނިޒާމާއި ދައުލަތުން ދޭ ސަބްސިޑީތައް އިޞްލާޙުކުރުމަށް ނިންމަވާފައިވެއެވެ.

ފާއިތުވި ފަސް އަހަރު ދައުލަތުގެ ޚަރަދުތައް އިންތިހާއަށް އިތުރުވަމުންދިޔައިރު ޚަރަދު ކުޑަކުރުމަށް އަޅަންޖެހޭ ފިޔަވަޅުތައް ބައިނަލްއަޤުވާމީ މާލީ އިދާރާތަކުން ތަކުރާރުކޮށް ފާހަގަކުރި ނަމަވެސް އެއިރުގެ ސަރުކާރުން އެފިޔަވަޅުތައް ތަންފީޒުކުރުމަށްވަނީ ނުކުޅެދިފައެވެ.