ދިވެހިރާއްޖޭގެ މާލީ ޙާލަތު ނާޒުކު ފައްތަރަކަށް ހުށަހެޅިފައިވާ މިދަނޑިވަޅުގައި މާލީ އިޞްލާޙުތައް ސަރުކާރާއި ދައުލަތުގެ އެންމެ މަތީ ފަޑިން ފެށިގެން ކުރިއަށްގެންދެވުމަށް ނިންމަވައި، އެކަން ތަންފީޒުކުރެއްވުމަށް އަންނަ އަހަރުގެ ދައުލަތުގެ ބަޖެޓުގެ ޚަރަދުތައް ކުޑަކުރުމަށް މުހިއްމު ފިޔަވަޅުތަކެއް އެޅުއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމެވި ނިންމެވުމަކީ ހަރުދަނާ އަދި އެހާމެ ހިތްވަރުގަދަ ނިންމެވުންތަކެއް ކަމުގައި މި ޕާޓީން ދެކެމެވެ. 

ފާއިތުވެދިޔަ ދެތިން އަހަރު ދައުލަތުގެ ޚަރަދުތައް އިންތިހާއަށް އިތުރުވެ އެކަމުގެ ސަބަބުން ލިބޭ އާމްދަނީއާއި ކުރާ ހޭދައިގެ ފަރަގު ބޮޑުވަމުން ދިޔައިރު، އެކަން އިޞްލާޙުކުރުމަށްޓަކައި ޚަރަދުތައް ކޮންޓްރޯލުކުރުމަށް ދުނިޔޭގެ މާލީ އިދާރާތަކާއި ދިވެހިރާއްޖޭގެ ކްރެޑިޓް ރޭޓިން އެޖެންސީތަކުން ދެމުންދިޔަ ލަފައަށް އެއިރުގެ ސަރުކާރުން ދިނީ ބީރު ކަންފަތެކެވެ. 

ދައުލަތުގެ ޚަރަދުތައް ކުޑަކުރުމަށް ހަރުދަނާ އެއްވެސް ފިޔަވަޅެއް ނިމިދިޔަ ސަރުކާރުން ނޭޅުމުގެ ސަބަބުން 2022 ގައި 9.8 ބިލިއަން ރުފިޔާގައި ހުންނާނެކަމަށް އަންދާޒާކުރި ބަޖެޓު ޑެފިސިޓު އަހަރު ނިމުނުއިރު 11.3 ބިލިއަން ރުފިޔާއަށްވުރެ އިތުރުވިއެވެ. އަދި 2023 ގައި 8.6 ބިލިއަން ރުފިޔާގައި ބަޖެޓު ޑެފިސިޓު ހުންނާނެކަމަށް ލަފާކުރި ނަމަވެސް އަހަރު ނިމުނުއިރު ބަޖެޓު ޑެފިސިޓު ހުރީ 13.5 ބިލިއަން ރުފިޔާއަށްވުރެ އިތުރުވެފައެވެ. ބަޖެޓު ޑެފިސިޓު ބޮޑުވިއިރު ރިކަރަންޓު ޚަރަދުތައް ލިބުނު އާމްދަނީގެ ތެރޭގައި ހިފެހެއްޓިފައިނުވެއެވެ. 

އެވަގުތު ދައުލަތުގެ ޚަރަދުތައް ކުޑަކުރުމަށް އަޅަންޖެހޭ ފިޔަވަޅުތައް ސިޔާސީ ސަބަބުތަކަށްޓަކައި އޮތީ ނޭޅިއެވެ. މިއަދު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެފިޔަވަޅުތައް ފެއްޓެވީ ސީދާ އެމަނިކުފާނާ ހަމައިންނެވެ. އަމިއްލަފުޅު މުސާރައިގެ ދެބައިކުޅަ އެއްބައި ނުނަންގަވަން ނިންމެވީއެވެ. އެއަށްފަހު ސިޔާސީ މުވައްޒަފުންނާއި ދައުލަތުގެ މުއައްސަސާތަކުގެ ވެރިންނާއި މަޖިލީހުގެ މެންބަރުންގެ މުސާރަތައް ކުޑަކުރައްވަން ހުށަހެޅުއްވީއެވެ. 

މިއީ މިވަގުތު ދިވެހި ދައުލަތުގެ އެންމެ އިސްވެރިޔާގެ ހައިސިއްޔަތުން ދިވެހި މާލިއްޔަތުގެ ދެމެހެއްޓެނެވިކަން ޔަޤީންކޮށްދެއްވުމަށް ރައީސް އަޅުއްވަން ނިންމެވި ހަރުދަނާ ފިޔަވަޅުތަކެކެވެ. ސިޔާސީ ގޮތުން އުދަގޫ އެހެންނަމަވެސް ޤައުމުގެ ޙައްޤުގައި ނިންމަވަންޖެހޭ ނިންމެވުމެކެވެ. 

އެހެންކަމުން މި ޤައުމާއި ދިވެހި ދައުލަތުގެ މުސްތަޤުބަލަށްޓަކައި މިއަދު ރައީސް ނިންމެވި ނިންމެވުންތަކަށް މަރުޙަބާ ދަންނަވަމެވެ. އަދި ދިވެހީންގެރާއްޖެ ދިވެހިންނަށް ހޯއްދަވައިދެއްވައި އިޤުތިޞާދީ އަދި މާލީ ގޮތުން ފުދުންތެރި ޤައުމަކަށް ރާއްޖެ ހެއްދެވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރައްވާ މަސައްކަތްޕުޅުގައި މާތްﷲ ބަރަކާތް ލައްވައި، އެމަނިކުފާނަށްހެޔޮ ތައުފީޤު މިންވަރުކުރެއްވުން އެދި ދުޢާ ކުރަމެވެ.

ދިވެހި ދައުލަތުގެ މާލިއްޔަތުގެ ދެމެހެއްޓެނެވިކަން ކަށަވަރުކުރެއްވުމަށް ރައީސުލްޖުމްހޫރިއްޔާ އެޅުއްވި ހަރުދަނާ ހިތްވަރުގަދަ ފިޔަވަޅުތަކަށް މަރުޙަބާ ދަންނަވަން

މި ޕާޓީއަށް އަގުނުކުރެވޭ ފަދަ ގިނަގުނަ ޚިދުމަތްތަކެއް ކުރައްވާފައިވާ، މި ޕާޓީގެ ހަރަކާތްތަކުގެ އެންމެ ކުރީ ސަފުގައި އަބަދުވެސް މަސައްކަތްކުރެއްވި އަލްފާޟިލް ޢަބްދުލްހާދީ ޤާސިމް، ހއ.ހޯރަފުށީ، ކަސިދާގެ، އިއްޔެގެ ވަގުތެއްގައި ދުނިޔެ ދޫކުރެއްވި ޚަބަރު އެހީ ފުން ހިތާމައާއެކުއެވެ. ޢަބްދުލްހާދީ ޤާސިމަކީ ހއ.ހޯރަފުށީގައި ޕީއެންސީ ފިކުރުގައި މި ޕާޓީގެ އަސާސްތަކާއި ވިސްނުން ކުރިއެރުވުމަށް އެންމެ ހިތްވަރާއެކު މަސައްކަތްކުރާ ޓީމުގެ ހީވާގި މެންބަރެކެވެ. ދެގޮތެއް ނުވެ މި ޕާޓީއަށްޓަކައި ވަރަށް ބުރަކޮށް މަސައްކަތްކޮށްދެއްވި ޚިދުމަތްތެރިއެކެވެ. 

މި ހިތްދަތި ދަނޑިވަޅުގައި މި ޕާޓީގެ ރައީސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒާއި، ޕާޓީގެ ލީޑާޝިޕުގެ ހުރިހާ ބޭފުޅުންގެ ނަންފުޅުގައާއި ޕާޓީގެ ޢާންމު މެންބަރުންގެ ނަމުގައި ޢަބްދުލްހާދީގެ ޢާއިލާއަށް އިޚުލާޞްތެރިކަމާއެކު ތަޢުޒިޔާދަންނަވަމެވެ. 

މަރުޙޫމް ޢަބްދުލްހާދީގެ ފާފަތައް ފުއްސަވައި މާތްﷲގެ ތަނަވަސް ރަޙުމަތްފުޅުގައި ލެއްވުމާއެކު ސުވަރުގޭގެ މަތިވެރި ދަރަޖަތައްމަރުޙޫމަށް މިންވަރުކޮށްދެއްވުން އެދި މާތްﷲގެ ޙަޟްރަތުގައި ދުޢާ ދަންނަވަމެވެ.

މި ޕާޓީއަށް އަގުހުރި ޚިދުމަތްތަކެއް ކުރެއްވި އަލްފާޟިލް ޢަބްދުލްހާދީ ޤާސިމް އަވަހާރަވުމާ ގުޅިގެން ތަޢުޒިޔާ ދަންނަވަން

މި އަހަރުގެ ޖޫން މަހުގައި ވަޒީރުންގެ މަޖިލީހުގެ މަޝްވަރާއާއި ލަފާގެ މަތިން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވާ ގޮތަށް އިމިގްރޭޝަން ޤާނޫނަށް ގެންނަންޖެހޭ ބަދަލުތައް ވީހާވެސް އަވަހަށް ގެނައުމަކީ މި ޕާޓީން ތާއީދުކުރާ ކަމެއްގައި ދަންނަވަމެވެ. 

އަދި މިހާރު ރައްޔިތުންގެ މަޖިލީހުގައި އޮތް އިމިގްރޭޝަންގެ ޤާނޫނު އިޞްލާޙުކުރުމުގެ ބިލު ދިރާސާކުރުމުގެ މަސައްކަތް އަވަހަށް ނިންމައި، ރައްޔިތުންގެ ރޫޙާއި ވިންދާ އެއްގޮތަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވާ ނިންމެވުން ޙަޤީޤަތަކަށް ހެދުމުގެ މަސައްކަތް މަޖިލީހުން ހަލުއިކަމާއެކު ކުރުމަށް މި ޕާޓީން އިލްތިމާސްކުރަމެވެ. 

އިސްރާއީލުން ފަލަސްޠީނުގެ ރައްޔިތުންނާމެދު ޣައްޒާއާއި ހުޅަނގު އައްސޭރީގައި ހިންގަމުންދާ އަނިޔާވެރި ޢަމަލުތަކުގެ ތެރެއަށް ލުބުނާނުގެ ރައްޔިތުންނަށް ކުރިމަތިކުރަމުންދާ ކެކުޅުމާއި ވޭންތައް އިތުރުކޮށްފައިވާ މިދަނޑުވަޅުގައި އެ ޢަމަލުތަކާމެދު ނުރުހުން ފާޅުކުރުމަށް ރާއްޖެއިން އަޅަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވާ މި މުހިއްމު ފިޔަވަޅަށް މި ޕާޓީން ފުރިހަމައަށް ތާއީދުކުރާކަމަށް ދަންނަވަމެވެ.

ރައީސުލްޖުމްހޫރިއްޔާ ނިންމަވާފައިވާ ގޮތަށް އިސްރާއީލު ޕާސްޕޯޓުގައި ރާއްޖެއަށް ނުވަދެވޭ ގޮތަށް ޤާނޫނަށް ގެންނަންޖެހޭ ބަދަލުތައް ގެނައުން އަވަސްކުރަން ތާއީދުކުރަން

ޒުވާނުންނާއި ކުޑަކުދިންގެ މެދުގައި މަސްތުވާތަކެތި ފެތުރުމަށް މިހާރަކަށް އައިސް ބޭނުންކުރަމުންދާ ވޭޕާއި އެއާ ގުޅުންހުރި އެކި ބައިތަކާއި ބާވަތްތަކުގެ ތަކެތި ދިވެހިރާއްޖެއަށް އެތެރެކުރުމާއި ބޭނުންކުރުމާއި އޭގެ ވިޔަފާރިކުރުން މަނާކުރައްވަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމެވީތީ ޕީޕަލްސް ނޭޝަނަލް ކޮންގްރެސް ޕާޓީގެ ނަމުގައި އެމަނިކުފާނަށް ޝުކުރު އަރިސްކުރުމާއެކު މަރުޙަބާ ދަންނަވަމެވެ. 

ދުނިޔޭގެ އެކި ކަންކޮޅުތަކުގައި ހެދިފައިވާ ގިނަ ދިރާސާތަކުން ސާބިތުވާ ގޮތުގައި ވޭޕަކީ ދުންފަތުގެ އެހެނިހެން ބާވަތްތަކަށްވުރެ ނުރައްކާތެރި ގެއްލުން ބޮޑު އެއްޗެހިތަކެކެވެ. އޭގެ ސަބަބުން ޒުވާނުންގެ ފުއްޕާމޭގައި ފެން އުފެދި ލިބޭ ގެއްލުންތަކުގައި ގިނަ އަދަދެއްގެ ޒުވާނުންގެ ފުރާނައަށް ނުރައްކާވާކަމީ މިހާރު ރެކޯޑުކުރެވި ސާބިތުވެފައިވާ ޙަޤީޤަތެކެވެ. 

ވޭޕުގެ ޞިއްޙީ ނުރައްކާތަކުގެ އިތުރަށް ވޭޕު ޒުވާނުންނާއި ފުރާވަރުގެ ކުދިންގެ މެދުގައި ފެތުރެމުންދާއިރު ވޭޕުގެ އެކި ބައިތައް ބޭނުންކޮށްގެން މަސްތުވާތަކެތި ކުޑަކުދިންނާއި، ޒުވާނުންގެ މެދުގައި ފަތުރަމުންދާކަން ކަމާ ބެހޭ އިދާރާތަކުގެ ސަމާލުކަމަށް އައިސްފައިވެއެވެ. އެ ޙަޤީޤަތްތަކުގެ އަލީގައި މާހިރުންނާއި މަދަނީ ޖަމްޢިއްޔާތަކާއި ޞިއްޙީ ދާއިރާގެ މާހިރުން ވޭޕު މަނާކުރުމަށް ގޮވައިލައްވަމުންދާތާ އަހަރުތަކެއްވެފައިވާއިރު މިހާތަނަށް މިކަމުގައި ފާއިތުވި ސަރުކާރުތަކަށް އޮތީ ފިޔަވަޅެއް ނޭޅިއެވެ. 

އެހެންކަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެތަކެތި ރާއްޖެ އެތެރެކުރުމާއި، ބޭނުންކުރުމާއި، ވިއްކުމާއި، އެތަކެތީގެ ވިޔަފާރިކުރުމާއި ހިލޭ ބެހުން މަނާކުރެއްވުމަށް ނިންމެވުމަކީ ދިވެހި ކުޑަކުދިންނާއި ޒުވާނުންގެ ޙައްޤުގައި ނިންމެވި ވަރަށް ހަރުދަނާ ނިންމެވުމެކެވެ. އެއީ އަންނާން އޮތް ދިވެހި ޖީލުތައް ޙިމާޔަތްކުރެއްވުމަށް އެޅުއްވި ހަރުދަނާ ފިޔަވަޅެއްކަމުގައި މި ޕާޓީން ޤަބޫލުކުރަމެވެ. އަދި ރައީސްގެ އެ ނިންމެވުމަށް ފުރިހަމައަށް ތާއީދުކުރާ ޙާލު ޤައުމުގެ މުސްތަޤުބަލަށްޓަކައި އެމަނިކުފާނު ނިންމެވި ނިންމެވުން ތަންފީޒުކުރުމުގައި އެންމެހާ އިދާރާތަކާއި ވިޔަފާރިތަކާއި ޢާންމު ފަރުދުން އެއްބާރުލުން ދިނުމަށް އިލްތިމާސްކުރަމެވެ.

ކުޑަކުދިންނާއި ޒުވާނުންނަށް އެތައް ގެއްލުމެއް ލިބޭ ވޭޕުގެ ބާވަތްތައް މަނާކުރައްވަން ނިންމެވީތީ ރައީސަށް ޝުކުރު ދަންނަވަން

The People's National Congress (Congress Party) extends its warmest congratulations to His Excellency President Xi Jimping, the Communist Party of China (CPC), and the people of China on the anniversary of the founding of the People's Republic of China.

The Congress Party is proud of the enduring relationship it shares with the CPC, built on mutual respect, collaboration, and a shared vision for the prosperity of our people. Over the years, this partnership has been a beacon of trust and cooperation, further strengthening the close ties between the Maldives and China.

We also express our sincere gratitude for the significant support and assistance extended by the government of China to the Maldives. Under President Xi Jinping's leadership, China's contributions to the development of our nation in infrastructure, healthcare, education, and beyond have played an instrumental role in improving the quality of life for the Maldivian people.

On this momentous day, the Congress Party offers its heartfelt wishes for continued peace, prosperity, and success to the Chinese people.

As we celebrate this important occasion together, the Congress Party reaffirms its commitment to strengthening the bond between our nations and furthering the shared goals of development, stability, and mutual progress.

People's National Congress (PNC) Congratulatory Statement on the Occasion of the Founding of the People's Republic of China

އދގެ ސަލާމަތީ މަޖިލީހުގައި ރޭ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވި ތަޤުރީރުގައި ފާހަގަކުރައްވާފައިވާ ކަންކަމަކީ ދުނިޔެއަށް އަންނަމުންދާ ބޮޑެތި ބަދަލުތަކަށް ރިޢާޔަތްކުރައްވައި، ގިނަ ދައުލަތްތައް ބައިވެރިވާ ބައިނަލްއަޤުވާމީ ނިޒާމަށް މިހާރުން މިހާރަށް ގެންނަންޖެހިފައިވާ ބޮޑެތި ބަދަލުތަކަށް އަލިއަޅުއްވައިލައްވައި، ދުނިޔޭގެ ޞުލްޙައާއި އަމާންކަން ކަށަވަރުކޮށް ބައިނަލްއަޤުވާމީ ނިޒާމަކީ ހަމަހަމަކަމާއި ޢަދުލުވެރިކަން ޤާއިމުވެފައިވާ ނިޒާމެއްކަން ކަށަވަރުކުރަން އަޅަންޖެހިފައިވާ އިޞްލާޙީ ފިޔަވަޅުތައް ފާހަގަކުރައްވާފައިވާ ވަރަށްވެސް ފުރިހަމަ އެހާމެ ތާރީޚީ ތަޤުރީރެކެވެ.

މި ތަޤުރީރަކީ އދގެ މެންބަރު ދައުލަތެއްގެ ގޮތުގައި ދިވެހިރާއްޖެ މިހޭދަކުރި ދިގު ތާރީޚުގައި މި ޤައުމުގެ ރައީސުލްޖުމްހޫރިއްޔާއަކު ސަލާމަތީ މަޖިލީހުގައި ދެއްވި ފުރަތަމަ ތަޤުރީރުކަން ފާހަގަކޮށް، މި ޕާޓީގެ ޢާންމު މެންބަރުންނާއި ލީޑާޝިޕުގެ ނަމުގައި ރައީސަށް މަރުޙަބާ ދެންނެވުމާއެކު، ދުނިޔޭގެ އެންމެ ބާރުގަދަ މަޖިލީހުގައި ދިވެހިރާއްޖޭގެ އަޑު އިއްވެވުމަށް ނިންމެވީތީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ޝުކުރު ދަންނަވަމެވެ.

އދގެ މެންބަރު ދައުލަތްތަކުގެ ފަސް ބައިކުޅަ އެއްބަޔަކީ ދިވެހިރާއްޖެ ފަދަ ތަރައްޤީވަމުން އަންނަ ކުދި ޖަޒީރާ ޤައުމުތައްކަން ފާހަގަކުރައްވައި، އެ ޤައުމުތަކަށް އދގެ ސަލާމަތީ މަޖިލީހުން ދާއިމީ ޖާގައެއް ޙައްޤުވާކަން ރައީސް ފާހަގަކުރެއްވުމަކީ، ބައިނަލްއަޤުވާމީ ނިޒާމަކީ މިހާރަށްވުރެ ޢަދުލުވެރި ޑިމޮކްރެޓިކް އަދި  ހަމަހަމަކަމާއެކު ބައިނަލްއަޤުވާމީ މުޖުތަމަޢު ތަމްސީލުވަނިވި ނިޒާމަކަށް ހެއްދެވުމަށް ހުށަހެޅުއްވި މުހިއްމު ކަމެއްކަން ފާހަގަކުރަމެވެ.

 މުޅި ދުނިޔެއަށް ފެންނާނެހެން އިސްރާއީލުން ފަލަސްޠީނާއި ލުބުނާނުގެ ރައްޔިތުންނާމެދު ހިންގަމުންދާ އަނިޔާވެރި ޓެރަރިޒަމުގެ ޢަމަލުތައް ހުއްޓުވުމަށް ދުނިޔެ ރޮއެ އާދޭސްކުރާއިރު، އެ ޢަމަލުތައް ހުއްޓުވުމުގައި އދ. ފެއިލުވާ ސަބަބަކީ ސަލާމަތީ މަޖިލީހުގައި މަދު ދައުލަތްތަކަކަށް ލިބިފައިވާ ވީޓޯގެ އިމްތިޔާޒުކަން ފާހަގަކުރައްވަމުން، އެ އިމްތިޔާޒު އުވައިލުމަށް ރައީސް ގޮވައިލެއްވި ގޮވައިލެއްވުމަކީ، ދުނިޔޭގެ މިއަދުގެ އިޙުސާސް އަދި ޚާއްޞަކޮށް އިސްލާމީ އުންމަތުގެ އިޙުސާސާއި ދިވެހީންގެ ހިތްތަކުގެ ހިމަނާރުގައި ޖަހަމުންދާ ވިންދުގެ އަޑެވެ.

އިސްރާއީލުން ހިންގަމުންދާ ޖަރީމާތައް ތަފުސީލުކޮށް އެހާމެ ފުރިހަމަކޮށް ސިފަކޮށްދެއްވަމުން، އެ އަޑު  ސަލާމަތީ މަޖިލީހުގައި އެމަނިކުފާނު އިއްވަވައިދެއްވިކަމީ ދިވެހިރާއްޖެއަށް ލިބުނު ފަޚުރެއް އަދި ދިވެހި ދައުލަތުގެ ޢިއްޒަތާއި ޝަރަފު ދުނިޔޭގައި އުފުލިގެންދިޔަ ކަމެކެވެ.

މޫސުމީ ބަދަލުތަކާއި ޤުދުރަތީ ވަސީލަތްތައް މަދުވުމާއި ޓެކްނޮލޮޖީއަށް އަންނަމުންދާ ހަލުއި ކުރިއެރުމާއެކު، ދުނިޔޭގެ ސަލާމަތީ މަސްރަޙަށް އަންނަމުންދާ ބޮޑެތި ބަދަލުތައް ފާހަގަކުރައްވައި، އެކަމުގެ ސަބަބުން އުފެދެމުންދާ މުޅިން އައު ސަލާމަތީ ގޮންޖެހުންތަކާ ކުރިމަތިލުމަށް ސަލާމަތީ މަޖިލީހުގެ ވިސްނުމަށް ގެންނަންވީ ބަދަލުތައް ފާހަގަކުރައްވަމުން، މިހާރަށް ޑިމޮކްރެޓިކް ގުނަވަނަކަށް އެ މަޖިލިސް ހަދައި، ދުނިޔޭގެ ރައްޔިތުންގެ އަޑުއަހައި، އެ އަޑަށް އިޙުތިރާމުކުރާ ތަނަކަށް ސަލާމަތީ މަޖިލިސް ހެދުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރެއްވި އިލްތިމާސުން، ދިވެހިރާއްޖެއަކީ ދުނިޔޭގެ އާޖުފާޖު އެނގޭ، ބައިނަލްއަޤުވާމީ މަސްރަޙަށް އަންނަ ބޮޑެތި ބަދަލުތަކަށް ހޭލާ އޮތް، އައު ގޮންޖެހުންތަކާއި ހިރާސްތައް ގިރާކުރުމަށް ބޭނުންވާ އީޖާދީ ޙައްލުތައް ހުށަހެޅުމުގެ ޤާބިލުކަން ލިބިފައިވާ ދައުލަތެއްކަން މުޅި ދުނިޔެއަށް ސާބިތުކޮށްދެއްވިއެވެ.

އެހެންކަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އދގެ ސަލާމަތީ މަޖިލީހުގައި ދެއްވި ތާރީޚީ ތަޤުރީރަކީ ދިވެހިރާއްޖޭގެ ޤަދަރު އުފުލައި ދެއްވައި، ދިވެހިންގެ އަޑަކީ އޭގައި އަގެއްހުރި އަޑެއްކަން ސާބިތުކޮށްދެއްވައި، ދުނިޔެއާއި ބައިނަލްއަޤުވާމީ މަސްރަޙާމެދު ދިވެހިންގެ އަމިއްލަ ވިސްނުންތަކަކާއި ފިކުރުތަކެއް ގެންގުޅޭކަން މުޅި ދުނިޔެއަށް އެމަނިކުފާނު ހާމަކޮށްދެއްވި ތަޤުރީރެކެވެ. 

ސަލާމަތީ މަޖިލީހުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވި ތަޤުރީރުގައި ދުނިޔެއަށް ދެއްވީ މުހިއްމު މެސެޖުތަކެއް

މިރޭ ކުރިއަށްދާ އދ.ގެ އާންމު މަޖިލީހުގެ 79 ވަނަ ޖަލްސާގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވި ފުރިހަމަ ތަޤުރީރާމެދު މި ޕާޓީން ފަޚުރުވެރިވަމެވެ. އެ ތަޤުރީރަކީ ދިވެހިރާއްޖެއާމެދު އެމަނިކުފާނު ދެކެވަޑައިގަންނަވާ ހުވަފެންފުޅާއި، ގެންގުޅުއްވާ ވަށާޖެހޭ ތަޞައްވުރާއި، ދުނިޔޭގެ މަސްރަޙުގައި ހިނގަމުންދާ ބޮޑެތި ކަންކަމާއި، މިހާރުން މިހާރަށް ގެންނަންޖެހިފައި ހުރި ނިޒާމީ ބޮޑެތި އިޞްލާޙުތަކަށް އަލިއަޅުވައިލައްވާފައިވާ ވަރަށް ޝާމިލު ތަޤުރީރެކެވެ.

ދިވެހިރާއްޖޭގެ މިނިވަންކަމަށް 75 އަހަރު ފުރޭ ތާރީޚީ މުނާސަބާ އިހުތިފާލުކުރާ 2040 ވަނަ އަހަރު އަންނަންވާއިރަށް ރާއްޖެއަކީ ތަރައްޤީވެފައިވާ ޤައުމުތަކުގެ ސަފުން ޖާގަ ކަށަވަރުވެފައިވާ ޤައުމެއްކަމަށް ހެއްދެވުމަށް ރާއްޖޭގެ މުއައްސަސާތައް ހަރުދަނާކުރައްވައި، ޑިޖިޓަލް ކުރިއެރުން ކަށަވަރުކޮށްދެއްވައި، ޒަމާނީ ޓެކްނޮލޮޖީގެ ފަހިކަން ދިވެހިންނަށް ލިބޭނެ ސިޔާސަތުތަކެއް ބައްޓަންކުރައްވާނެކަން ރައީސް މިރޭ އިއުލާނުކުރެއްވުމަކީ މިއަދުގެ ޒުވާނުންނާއި އަންނާން އޮތް ޖީލުތަކަށް އެމަނިކުފާނު ދެއްވި އުފާވެރި ޚަބަރެކެވެ. 

ދިވެހިރާއްޖޭގެ އިޤުތިޞާދަކީ ވިލުންތެރި އިޤުތިޞާދަކަށް ބަދަލުކުރެއްވުމަށް އައު ޞިނާޢަތްތައް ތަޢާރަފުކުރެއްވުމަށް މާލީ ޚިދުމަތްތަކުގެ ދާއިރާ ފުޅާކުރެއްވުމަށް ޑިވެލޮޕްމެންޓު ބޭންކު ޤާއިމުކުރައްވުމާއެކު، އެންމެންނަށް ހަމަހަމަކަމާއެކު ފުރުޞަތު ލިބޭ އިޤުތިޞާދެއް ބިނާކުރައްވަން ގެންގުޅުއްވާ ސިޔާސަތުތަކާއި، ހުރިހާ ދިވެހިންނަށް ގެދޮރުވެރިކަން ފޯރުކޮށްދީ ސިޔާސަތު އެކުލަވައިލުމުގައި ޒުވާނުންގެ ޝާމިލުވުން ކަށަވަރުކޮށްދެއްވުމަށް އަޅުއްވާފައިވާ ފިޔަވަޅުތައް މުޅި ދުނިޔެއަށް އިޢުލާނުކުރެއްވުމަކީ އެ ސިޔާސަތުތަކަށް ދިވެހި ރައްޔިތުންގެ އިތުބާރު އިތުރުވި ކަމެއް ކަމުގައި ފާހަގަކުރަމެވެ. 

ފަތުރުވެރިކަން އިތުރަށް ފުޅާކުރެއްވުމާއެކު އީޖާދީ ވިސްނުންތަކާއި އުފެއްދުންތެރިކަމުގެ މައްޗަށް ބިނާވެފައިވާ އައު ޞިނާޢަތްތައް ތަޢާރަފުކުރައްވާނެކަން އެމަނިކުފާނު އިޢުލާނު ކުރެއްވިއެވެ. 

އެއާއެކު ދުނިޔޭގެ ޙާލަތަށް އަލިއަޅުވައިލައްވައި 2015 ވަނަ އަހަރު އެކުލަވައިލި ދެމެހެއްޓެނެވި ތަރައްޤީގެ އަމާޒުތައް ޙާޞިލުކުރުމުގައި، ދުނިޔެ ނާކާމިޔާބުވަމުންދާކަން ފާހަގަކުރައްވަމުން އެ ގޮތުގައި ކަންކުރަން ހުސް ވައުދުވުމުގެ މަތީގައި ދެމިތިބެވެން ނެތްކަން އެމަނިކުފާނު ފާހަގަކުރައްވައި ޢަމަލީ ގޮތުން ނަތީޖާ ނެރުމަށް މުޅި ދުނިޔެއަށް އިލްތިމާސް ކުރެއްވިއެވެ. 

މުޅި އިސްލާމީ އުންމަތް އެކަމެއްގެ ގިލަންވެރިކަން އިހުސާސްކުރަމުންދާ ފަލަސްޠީނު މައްސަލާގައި ސާފު ޞަރީޙަކޮށް އިސްރާއީލުން ހިންގަމުންދަނީ ޓެރަރިޒަމުގެ ޢަމަލުތަކެއްކަން ފާހަގަކުރައްވައި، އެ ޖަރީމާތައް ތަފުސީލުކޮށް ބަޔާންކޮށްދެއްވުމާއެކު، ބައިނަލްއަޤުވާމީ ޤާނޫނުތަކާއި އދގެ މުޢާހަދާތަކާ ޚިލާފު އެ ޢަމަލުތަކާމެދު އިސްރާއީލު ޖަވާބުދާރީ ކުރުމަށް ބައިނަލްއަޤުވާމީ މުޖުތަމަޢަށް ހަރު އަޑުން ގޮވައިލެއްވުމަކީ ކޮންމެ ދިވެހި ދަރިއަކުމެ އެމަނިކުފާނާމެދު ފަޚުރުވެރިވާނެ ފަދަ ހިތްވަރުގަދަ ޢަމަލު ފުޅެކެވެ. 

މިރޭ އެމަނިކުފާނު ދެއްވި ތަޤުރީރަކީ ދިވެހިރާއްޖެއަކީ ކުޑަ ނަމަވެސް ބައިނަލްއަޤުވާމީ މަސްރަޙުގައި ހަމައިސްކޮޅަށް ދެމިލައި، ޙައްޤު ބަސްބުނެ ރާއްޖޭގެ އުންމީދުތަކާއި ހުވަފެންތައް އެހެނިހެން ދައުލަތްތަކުގެ ކުރިމަތީ ހާމަކުރަން ކެރޭ، އެކަންކަމަށް ގަދައަޅައި މަސައްކަތްކުރާ ދައުލަތެއްކަން ސާބިތުކޮށްދެއްވި ތަޤުރީރެކެވެ. 

އެމަނިކުފާނުގެ ތަޤުރީރާމެދު ކޮންގްރެސް ޕާޓީގެ ލީޑާޝިޕާއި ޕާޓީގެ ޢާންމު މެންބަރުން ފަޚުވެރިވެއެވެ. އަދި ޕާޓީގެ އެންމެހައި މެންބަރުންގެ ނަމުގައި އެމަނިކުފާނަށް މަރުޙަބާ ދަންނަވައި، އެންމެ ފުރިހަމަ މާނާގައި ދިވެހިންގެ މަޞްލަޙަތުތަކާއި ދިވެހިންގެ އިޙުސާސްތައް ބައިނަލްއަޤުވާމީ މަސްރަޙުގެ އެންމެ އުހުގައި ތަމްސީލުކޮށްދެއްވިކަމަށްޓަކައި ޝުކުރު އަދާކުރަމެވެ. 

އދ.ގެ އާންމު މަޖިލީހުގެ 79 ވަނަ ޖަލްސާގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވި ފުރިހަމަ ތަޤުރީރާމެދު ފަޚުރުވެރިވާ ޙާލު އެމަނިކުފާނަށް މަރުޙަބާ ދަންނަވަން

ބައިނަލްއަޤުވަމީ ފެންވަރުގައި ފާހަގަކުރާ ޑިމޮކްރަސީ ދުވަހުގެ މުނާސަބަތުގައި، ދިވެހިރާއްޖޭގެ ޑިމޮކްރެސީއާއި ދައުލަތުގެ ހިންގުން ހަރުދަނާކުރައްވައި، އިސްލާމީ ގިއުގަނޑުގެ ތެރޭގައި، ދިވެހިވަންތަ އުޞޫލުތަކުގެ މަތީގައި ދިވެހި ދައުލަތް ޒަމާނީ ކުރިއަރާފައިވާ ދައުލަތެއްގެ ގޮތުގައި ބައްޓަންކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅު ފާހަގަކޮށް ކޮންގްރެސް ޕާޓީން ޝުކުރު ދަންނަވަމެވެ.

އެއް ޕާޓީއަށްވުރެ ގިނަ ޕާޓީ ބައިވެރިވާ ސިޔާސީ ނިޒާމު ރާއްޖެއަށް ތަޢާރަފުކުރެވުނުތާ 16 އަހަރަށްވުރެ ގިނަ ދުވަސް ފާއިތުވެގެން ގޮސްފައިވާއިރު، ދުސްތޫރީ ގޮތުންނާއި އިދާރީ ގޮތުން ގެންނަންޖެހޭ މުހިއްމު ބޮޑެތި ބަދަލުތަކެއް ހުރިކަން ފާހަގަކުރެވިފައިވީ ނަމަވެސް އެފަދަ އިޞްލާޙުތައް ގެނައުމުގެ މަސައްކަތް އޮތީ ނުކުރެވިއެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ޙަވާލުވެވަޑައިގެން ގެންނަންޖެހިފައި ހުރި މުހިއްމު އިޞްލާޙުތައް ގެންނެވުމުގެ މަސައްކަތް ފައްޓަވާފައިވެއެވެ.

އެގޮތުން އަހަރުން އަހަރަށް ރައްޔިތުންގެ މަޖިލީހުގެ މެންބަރުންގެ އަދަދު އިތުރުވާ ގޮތަށް އޮތް އޮތުން ބަދަލުކުރެއްވުމާއި، ބޮޑެތި އިންތިޚާބުތައް ވަކިވަކިން އޮތުމުގެ ބަދަލުގައި އިންތިޚާބުތައް އެއް ތާރީޚެއްގައި ބާއްވާގޮތަށް ނިޒާމު ބަދަލުކުރެއްވުން ފަދަ ދައުލަތުގެ ހިންގުން ހަރުދަނާކުރަން ކުރަންޖެހިފައި ހުރި މުހިއްމު މަސައްކަތްތައް ކުރައްވަން އެމަނިކުފާނު ނިންމަވާފައިވެއެވެ. އެކަންކަމަކީ ދުރުރާސްތާގައި ރާއްޖޭގެ ޑިމޮކްރަސީ އިތުރަށް ހަރުދަނާވެ، ދައުލަތުގެ ހިންގުން އިޞްލާޙުވާނެ ކަންތައްތަކެއް ކަމުގައި މި ޕާޓީން ޤަބޫލުކުރަމެވެ.

ޤާނޫނުއަސާސީގެ ދެވަނަ މާއްދާގައި ބަޔާންކޮށްފައިވަނީ ދިވެހިރާއްޖެއަކީ ފުރިހަމަ މިނިވަންކަން ލިބިގެންވާ، އިސްލާމީ އުޞޫލުތަކުގެ މައްޗަށް ބިނާކުރެވިފައިވާ، އަމިއްލަ ވެރިކަންކުރާ، ދީމިޤްރާޠީ، ޖުމްހޫރީ އަދި ޔުނިޓަރީ ދައުލަތެއް ކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ޙަވާލުވެވަޑައިގެންނެވި ފަހުން، ޤާނޫނުއަސާސީގައި ބަޔާންކޮށްފައިވާ ދިވެހި ދައުލތުގެ ޞިފަތައް ވަރުގަދަކުރައްވައި ހަރުދަނާކުރެއްވުމަށް ގިނަގުނަ ފިޔަވޅުތަކެއް އަޅުއްވަމުންދާކަން މި ޕާޓީން ފާހަގަކުރަމެވެ.

އެގޮތުން ރާއްޖޭގެ މިނިވަންކަން ކަށަވަރުކުރެއްވުމަށް ރާއްޖޭގައި ބޭރުގެ އެއްވެސް ޤައުމެއްގެ ސިފައިން ނުތިބޭކަން ކަށަވަރުކޮށްދެއްވިއެވެ. ރާއްޖޭގެ ކަންކަން ނިންމަނީ ދިވެހިންގެ އަމިއްލަ ވިސްނުމާއި ފިކުރާ އެއްގޮތަށް، ދިވެހިރާއްޖޭގެ އަމިއްލަ މަޞްލަޙަތުތައް އިސްކޮށްގެންކަން ޔަޤީންކޮށްދެއްވުމަށް "މޯލްޑިވްސް ފަސްޓު" ސިޔާސަތު ތަޢާރަފުކުރައްވައި ހިންގަވަން ފެއްޓެވިއެވެ. ޑިމޮކްރަސީ ހަރުދަނާކުރެއްވުމަށް މުއައްސަސާތަކުގެ މިނިވަންކަން ކަށަވަރުކޮށްދެއްވައި، ޖުޑީޝަރީގެ މައްޗަށް ސިޔާސީ ނުފޫޒު ފޯރުވުން ނިމުމަކަށް ގެންނެވިއެވެ. ލާމަރުކަޒީ ނިޒާމު ހަރުދަނާކުރައްވައި ލޯކަލް ކައުންސިލުތަކަށް އާމުދަނީ ހޯދައި އަމިއްލަ ފައިމައްޗަށް ތެދުވެވޭނެ މަގުތައް ފަހިކުރެއްވިއެވެ.

މިހުރިހާ ކަމެއް ކުރައްވަމުން ގެންދަވާއިރު ސިޔާސީ ނިޒާމުގައި ޒަމާނުއްސުރެ އޮތް ބަދަލުހިފުމާއި، ޒާތީ ރުޅިވެރިކަމާއި، ނަފުރަތާއި ޙަސަދަވެރިކަމުގެ ނުބައި ދަމިލަ ފިލުއްވައި، އެފަދަ ކަންކަން ނިމުމަކަށް ގެންނެވުމަށް އެމަނިކުފާނު ގެންދަވަނީ ސިޔާސީ ކަންކަމުގައި ދިވެހިންނަށް ރިވެތި ނަމޫނާ ދައްކަވައިދެއްވަމުންނެވެ. ވާދަވެރިންގެ އަނބުރަށް އަރައިގަތުމާއި، ރުޅިވެރިކަމާއި ނަފުރަތުގެ ހުޅު ރޯކުރުން ނިމުމަކަށް ގެންނެވުމަށް މަޑުމައިތިރިކަމާއެކު ޤައުމީ މައްސަލަތަކާމެދު ތެދު ބަހުން ވާހަކަދެއްކެވުމުގެ ފުރިހަމަ ނަމޫނާ ދައްކަވަމުން ގެންދަވަނީ، އިސްލާމީ އަޚުލާޤީ ގިއުގަނޑުގެ ތެރޭގައި ޑިމޮކްރެޓިކް މާޙައުލެއް ބިނާކުރާނެ ގޮތް ޢަމަލުފުޅުންނާއި ބަސްފުޅުން ތަމްސީލުކޮށްދެއްވަމުންނެވެ. ދައުލަތުގެ މުއައްސަސާތައް ނާޖާއިޒު ގޮތުގައި ބޭނުންކޮށްގެން ސިޔާސީ ވާދަވެރިން ކަސްތަޅުއަޅުވައި ޤައިދުކުރުމުގެ ސަޤާފަތް އެމަނިކުފާނުގެ ވެރިކަމުގައި ނިމުމަކަށް ގެންނަވައި، ޑިމޮކްރެޓިކް ނިޒާމުގެ ތެރެއިން މިނިވަންކަމާއެކު ވާދަކުރުމުގެ ފުރުޞަތު ހުރިހާ ސިޔާސީ ޕާޓީތަކަށާއި ލީޑަރުންނަށް ފަހިކޮށްދެއްވިއެވެ. އަނިޔާވެރިކަމާއި ޚުދުމުޚުތާރުކަން އިސްނުކުރައްވައި ވާދަވެރި މާޙައުލެއް ދަމަހައްޓަވަމުން ހަމަޖެހުމާއި ޞުލްޙަވެރިކަމާއެކު ވެރިކަންކުރެއްވޭނެކަން އެމަނިކުފާނު ގެންދަވަނީ ކޮންމެ ދުވަހަކުމެ ސާބިތުކޮށްދެއްވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތުގައި ދައުލަތުގެ ހިންގުމަށް ގެންނަވަން ފައްޓަވާފައިވާ އިޞްލާޙީ ބަދަލުތަކާއި، ހިފަހައްޓަވަމުންގެންދަވާ އަޚުލާޤީ މިންގަނޑުތަކާއި، ގެންގުޅުއްވާ ހަރުދަނާ އިޤުތިޞާދީ އިޖުތިމާޢީ ސިޔާސަތުތަކާއެކު މާތްﷲގެ ތަނަވަސް ރަޙުމަތްފުޅުން ދިވެހިރާއްޖޭގެ ތާރީޚުގައި ފެށިގެންދާނީ ޑިމޮކްރެސީގެ މުޅިން އާ ބާބެއްކަމާމެދު މި ޕާޓީން ޝައްކެއް ނުކުރަމެވެ.

އިސްލާމީ ދިވެހިވަންތަ ސިފަތަކުގެ މަތީގައި ދިވެހިރާއްޖޭގެ ޑިމޮކްރެސީ ހަރުދަނާކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރައްވަމުންގެންދަވާ މިންނަތް މަސައްކަތްޕުޅުގައި މާތްﷲ ބަރަކާތް ލައްވައި އެކަލާނގެ ތައުފީޤާއި މަދަދު މިންވަރުކުރެއްވުން އެދި ދުޢާކުރަމެވެ.

ނޫސްބަޔާން

Press Release on Democracy Day

އިސްލާމީ ދިވެހިވަންތަ ސިފަތަކުގެ މަތީގައި ޑިމޮކްރެސީ ހަރުދަނާކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރައްވާ މަސައްކަތްޕުޅަށް މަރުޙަބާ ދަންނަވަން 

Press Release on World Democracy Day

މިނިސްޓަރ އޮފް އިސްލާމިކް އެފެއަރޒް ޑރ. މުޙައްމަދު ޝަހީމް ޢަލީ ސަޢީދުގެ އަބުރުފުޅު  ނަގާލުމުގެ ބޭނުމުގައި ސޯޝަލް މީޑިއާގެ އިތުރުން ބައެއް މީޑިއާތަކުން ހަޤީޤަތާއި ޚިލާފު ދޮގު ވާހަކަތައް ދައްކަމުން ގެންދަތީ އެކަން އެންމެ ހަރުކަށި އިބާރާތުން ކުށްވެރިކުރަމެވެ. 

ޑރ. ޝަހީމަކީ މުޅި އިސްލާމީ ދުނިޔޭގަައިވެސް ނަން ހިންގާ މަޝްހޫރު އަދި އިސްލާމީ ދައުލަތްތަކުން އެމަނިކުފާނުގެ ޚިދުމަތުގެ އަގު ވަޒަންކުރަމުން ގެންދާ ޚުލުޤުފުޅު ހެޔޮ ދީނީ ލީޑަރެކެވެ. އަދި އެމަނިކުފާނު އިސްލާމިކް މިނިސްޓަރުގެ މަޤާމުގައި ހުންނަވައިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދީނީ ސިޔާސަތުތައް ކުރިއެރުވުމުގައި ސާބިތުކަމާއެކު ކުރައްވަމުން ގެންދަވާ މަސައްކަތްޕުޅަށް މިކޯލިޝަން ފަޙުރުވެރިވަމެވެ. ޑރ. މުޙައްމަދު މުޢިއްޒުގެ މެނިފެސްޓޯގައި އިސްލާމިކް މިނިސްޓްރީއާ ގުޅުންހުރި އެންމެހާ ކަންކަން ކުރެއްވުމުގައ ޑރ. ޝަހީމް އެ ގެންދަވަނީ ކާމިޔާބު ހޯއްދަވަމުންކަންވެސް ފާހަގަ ކުރަމެވެ. 

ކީރިތި ޤުރުއާން ހިތު ދަސް ދީނީ ލީޑަރު ޑރ. މުޙައްމަދު ޝަހީމް ޢަލީ ސަޢީދަކީ ފުރައްސާރަކޮށް ޙަޤީޤަތާއި ޚިލާފު ދޮގު އިލްޒާމުތަކުން ފަސްޖެހިވަޑައިގަންނަވާނެ ބޭފުޅެއް ނޫނެވެ. އެއީ ދީނީ ޢިލްމު ދެނެވަޑައިގެން ހުންނެވި ޢަޒުމް ވަރުގަދަ ސިޔާސީ ލީޑަރެކެވެ. އެހެންކަމުން އެމަނިކުފާނުގެ އަބުރުފުޅު ކަތިލުމުގެ ބޭނުމުގައި ބަޔަކު ކުރަމުން ގެންދާ ހަޑި މުޑުދާރު ނާތަހުޒީބު ކަންކަން މިހާރުން މިހާރަށް ހުއްޓާލުމަށް މި ކޯލިޝަނުން ގޮވާލަމެވެ. 

Press Release Document

އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދަށް ފުރައްސާރަކޮށް ފަތުރަމުން ގެންދާ ޙަޤީޤަތާއި ޚިލާފު ދޮގު ވާހަކަތައް އެންމެ ހަރުކަށި އިބާރާތުން ކުށްވެރިކުރުން

ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ލޮބުވެތި މަންމާފުޅު އަލްމަރްޙޫމާ މުއުމިނާ ޙުސައިންފުޅު އަވަހާރަވި ޚަބަރު މިކޯލިޝަންގެ އެންމެހާ މެންބަރުން އެހީ ވަރަށްވެސް ފުން ހިތާމައާއި އަސަރާއެކުއެެވެ. މާތްالله މަރްހޫމާގެ ފުރާނައަށް ރަޙުމަތް ލައްވާ ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކުރައްވާށި. އާމީން

އަލްމަރްޙޫމާ މުއުމިނާ ޙުސައިންފުޅު އަވަހާރަވުމުގެ ހިތާމައިގައި މި ކޯލިޝަންގެ އެންމެހައި މެންބަރުން ބައިވެރިވެ, ޢާއިލާއަށް މިކޯލިޝަންގެ ލީޑަރު, ޕީއެންސީގެ ރައީސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި މިކޯލިޝަންގެ ލީޑާރޝިޕާއި, ސެނެޓަރުންނާއި, ޕާލަމަންޓްރީ ގުރޫޕްގެ މެންބަރުންނާއި, ދާއިރާ ރައީސުންނާއި, ސްޓިއަރިންގ ކޮމިޓީތަކާއި އަދި މިކޯލިޝަންއަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވަމެވެ. އަދި މާތްالله މަރުޙޫމާގެ ޢާއިލާއަށް ކެތްތެރިކަމާއި ސާބިތުކަން މިންވަރު ކުރެއްވުން އެދި ދުޢާ ކުރަމެވެ. 

Press Releases

-

-

-

-

People's National Congress (PNC) Congratulatory Statement on the Occasion of the Founding of the People's Republic of China

-

-

Press Release on World Democracy Day

-

PNC extends condolences following the passing of the former President Solih's mother