ކޮންގްރެސް ޕާޓީއަށް އަލަށް 2000 އަށް ވުރެ ގިނަ މެމްބަރުން ގުޅިވަޑައިގެންފި

ކޮންގްރެސް ޕާޓީއަށް އަލަށް 2000 އަށް ވުރެ ގިނަ މެމްބަރުން ގުޅިވަޑައިގެންފިއެވެ. 26 އޯގަސްޓް 2024 ވީ ހޯމަދުވަހުގެ ރޭ ކޮންގްރެސް ހައުސްގައި ބޭއްވުނު ޖަގަހަ ޖަލްސާގައި ޕާޓީއާއި އަލަށް ގުޅިވަޑައިގެންނެވި މެމްބަރުންގެ ފޯމުތަކާއި ޙަވާލުވެވަޑާއިގެންނެވީ، ޕްރޮގްރެސިވް ކޮންގްރެސް ކޯލިޝަންގެ ލީޑަރ އަދި ޕީއެންސީގެ ރައީސް، ރައީސުލްޖުމްހޫރިއްޔާ ޑރ، މުޙައްމަދު މުއިއްޒުއެވެ.

މިރަސްމިއްޔާތުގައި ޕްރޮގްރެސިވް ކޮންގްރެސް ކޯލިޝަންގެ ލީޑަރ އަދި ޕީއެންސީގެ ރައީސް، ރައީސުލްޖުމްހޫރިއްޔާއަށް ޕާޓީއާއި އަލަށް ގުޅިވަޑައިގެންނެވި 2053 މެމްބަރުންގެ ފޯމުވަނީ ހަވާލުކޮށްފައެވެ.

އެގޮތުން ޕާޓީގެ ލީޑަރޝިޕްގެ ފަރާތުން ކޮންގްރެސް ޕާޓީގެ ނާއިބް ރައީސް، ވަޒީރު އާދަމް ޝަރީފު ޢުމަރު އިސްވެ ހުންނަވައިގެން ޕާޓީއަށް އަލަށް ގުޅިވަޑައިގެންނެވި 743 މެމްބަރުންގެ ފޯމާއި، ކެލާ ދާއިރާއިން 300 މެމްބަރުންނާއި، ބާރަށު ދާއިރާއިން 300 މެމްބަރުންނާއި، ގައްދޫ ދާއިރާއިން 200 މެމްބަރުންނާއި، ⁠ގަމު ދާއިރާއިން 410 މެމްބަރުންގެ އިތުރުން މައްޗަންގޯޅި މެދު ދާއިރާއިން 100 މެމްބަރުން ވަނީ އަލަށް ޕާޓީއާއި ގުޅިވަޑައިގެންފައެވެ.

މިޖަލްސާއިގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ މިއަހަރުގެ ނިޔަލަށް ކޮންގްރެސް ޕާޓީއަށް 75،000 މެމްބަރުން އިތުރު ކުރުމަށް މަސައްކަތް ކުރައްވާނެކަމަށް ވިދާޅުވެފައެވެ.