ރައީސް ޑރ. މުޢިއްޒު ވަރުގެ ސާދާ ސީދާ ކޫލް ޕްރެޒިޑެންޓެއް އަޅުގަނޑުމެން ނުދެކެން: މިނިސްޓަރ އާދަމް ޝަރީފް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރުގެ ސާދާ ސީދާ އަދި އެހާ ކޫލް ޕްރެޒިޑެންޓެއް ދެކިވަޑައި ނުގަންނަވާކަމަށް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް މިނިސްޓަރ އާދަމް ޝަރީފް ވިދާޅުވެއްޖެއެވެ.

ޕީއެންސީ އިން ރޭ ބޭއްވި ޖަގަހަ ޖަލްސާގައި މިނިސްޓަރ އާދަމް ޝަރީފް ވަނީ ރައީސް މުޢިއްޒުގެ ސިޔާސަތަށާއި ހިތްވަރަށް ގޮން ޖަހާކަމުގައި ވަނީނަމަ ފުރިހަމަ ހެއްކާއި ޤަރީނާއާއި އެކު އެ ކަން ސާބިތުކޮށްދެއްވުމަށް އެދިވަޑައިގެންފައެވެ.

"އެމަނިކުފާނުގެ ހިތްވަރަށް، އެމަނިކުފާނުގެ ސިޔާސަތުތަކަށް، އަޅުގަނޑުމެން ގޮންޖަހާ ކަމަށް ވެއްޖެއްޔާ ހެއްކާއި ސާބިތާއި އެކީގައި، ފުރިހަމަ ހުއްޖަތާއިއެކީގައި، މައްސަލަ ސާބިތު ކޮށްދެއްވާށޭ، ވެރިކަމުގައި ހުންނެވީތީވެ ކަންބޮޑުވެ ވަޑާއިގެންނަވައިގެން އުޅުއްވާ ކަމުގައި ވެއްޖެއްޔާ އެއީ ހަޖަމުގެ މައްސަލައެއް،" އާދަމް ޝަރީފް ވިދާޅުވިއެވެ.

ރައީސް މުޢިއްޒު އަކީ މަޝްވަރާއަށް އިސްކަން ދެއްވާ ބޭފުޅެއް ކަންފާހަގަކުރައްވާ އާދަމް ޝަރީފް ވިދާޅުވީ އަމިއްލަ ޒާތުފުޅަށް ނިންމެވޭވަރުގެ ކަންކަން ވެސް ވަޒީރުންގެ މަޖިލީހާއި ޕާޓީގެ ލީޑާޝިޕާއި އަދި އާންމު މެންބަރުންނާ ވެސް މަޝްވަރާ ކުރުމަށް ފަހު ނޫނީ ރައީސް ނުނިންމަވާ ކަމަށެވެ.

"ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވަރުގެ ސާދާ ސީދާ އަދި އެހާ ކޫލް ޕްރެޒިޑެންޓެއް އަޅުގަނޑުމެން ނުދެކެން. އަޅުގަނޑުމެންނަށް ވަރަށް ފަސޭހަ ރައީސާކު މަސައްކަތް ކުރަން،" އާދަމް ޝަރީފް ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ ރައީސް މުޢިއްޒު ފަދަ އިސްލާމް ދީނަށް ލޯބި ކުރައްވާ ވެރިއަކު މިހާތަނަށް ރާއްޖެ ދެކެފައި ނެތް ކަމަށެވެ.