ރައްޔިތުންނަށް އެއްވެސް ބުރައެއް އުފުލަން ނުޖެހޭ ގޮތަށް އާސަންދަ އިސްލާޙު ކުރައްވާނެކަމަށް ރައީސް ވިދާޅުވެއްޖެ

ބޭސް ވިއްކާ ފަރާތްތަކުން އާސަންދައިގެ ތެރެއިން މިހާރު ނަގަމުންދާ ނުޙައްޤު، ނާޖާއިޒު ފައިދާތައް ހުއްޓުވައި، ރައްޔިތުންނަށް އެއްވެސް ބުރައެއް އުފުލަން ނުޖެހޭ ގޮތަށް، އާސަންދަ އިސްލާޙު ކުރައްވާނެކަމަށް، ރައީސުލްޖުމުހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ފަދައިން ވިދާޅުވީ، ސަރުކާރަށް އެއް އަހަރު ފުރުން ފާހަގަކުރުމަށް، 17 ނޮވެމްބަރ 2024 ގައި ސޯޝަލް ސެންޓަރުގައި ބޭއްވި ޖަލްސާގައި، އާސަންދަ ނިޒާމަށް ގެންނަން ނިންމަވާފައިވާ އިޞަލާޙުތަކާ ގުޅޭގޮތުން ވާހަކަފުޅު ދައްކަވަމުންވެ. ރައީސް ވިދާޅުވީ އާސަންދަ އިސްލާހުގެ މައިގަނޑު އަމާޒަކީ ބޮޑު އަގުގައި ބޭސް ވިއްކައިގެން ރައްޔިތުންގެ ފައިސާއިން ބަޔަކު ހޯދަމުން އައި ނާޖައިޒު މަންފާ ހޯދުން ހުއްޓުވުން ކަމަށެވެ.

"އެއްގޮތަކަށް ވެސް ރައްޔިތުން ތިކުރައްވާ ބޭސްފަރުވާއަށް، އެއްވެސް ކަހަލަ ބަދަލެއް ނާންނާނެ. ރައްޔިތުންގެ އަތުން، އަންނަ އަހަރުގެ ބަޖެޓުގައި ވެސް، ކުރިއަށް އޮތް އަހަރުތަކުގައި ވެސް، އަޅުގަނޑުމެން މިހާރަކު ނުނަގާ ފައިސާއެއް ނުނަގާނެ. ރައްޔިތުން ދައްކަންޖެހޭ އެއްޗެއް ނޯންނާނެ." އާސަންދައަށް ގެންނަ އިޞްލާޙީ ބަދަލުގެ ސަބަބުން، އެއްވެސް ރައްޔިތަކު އެއްވެސް ބުރައެއް އުފުއްލަވަން ނުޖެހޭ ކަމުގެ ޔަޤީންކަން ދެއްވަމުން ރައީސް މުޢިއްޒު ވިދާޅުވިއެވެ.

​​ރައީސް ވިދާޅުވީ އާސަންދަ އިސްލާޙުކުރުމަށް މި ކުރާ މައިގަނޑު ކަމަކީ، ރައްޔިތުންގެ އެކި ބޭނުންތަކަށް ޚަރަދުކުރަން ހުރި ފައިސާ، އެތައް ގުނައެއްގެ ފައިދާ ލާފަ ބޭސް ވިއްކައި، ނިޒާމުގެ ތެރެއިން ނާޖާއިޒު ގޮތުގައި މިހާރު ޚަރަދު ކުރަމުންދާ ދިއުން ހުއްޓުވުން ކަމަށެވެ. އެ މަނިކުފާނު ވިދާޅުވީ އާސަންދަ އިސްލާޙު ކުރާ ވާހަކަ އެ މަނިކުފާނު ދައްކަވަނީ، އާސަންދަ ވަރަށް ބޮޑަށް ބޮއްސުންލާފައި ވާތީ ކަމަށެވެ. ރައީސް ވިދާޅުވީ، އަސަންދަ އިސްލާޙުކުރުމުގެ މައްސަލަ ޙައްލުކުމަށް އަޅާ މައިގަނޑު ފިޔަވަޅަކީ، ބަލްކް ޕްރޮކިއުމެންޓު މެދުވެރިކޮށް، އެންމެ ތަރައްގީވެފައިވާ ގައުމުތަކުގައި ހުންނަ ބޭސް، ރާއްޖެއަށް ގެނެސް، ހެޔޮ އަގުގައި ލިބޭނެ އިންތިޒާމު ހަމަޖެއްސެވުން ކަމަށެވެ. ބޭހުގެ އިތުރަށް، ޞިއްޙީ ޚިދުމަތަށް ބޭނުންވާ މެޝިންތަކާއި ކޮންސިއުމަބަލްސް ވެސް، ބަލްކް ޕްރޮކިއުމެންޓަށް ބަދަލުކޮށް، އެންމެ ފެންވަރު ރަނގަޅު ތަކެތި ހޯދައިދެވޭނެ ކަމަށް ވެސް ރައީސް ވިދާޅުވި އެވެ.

​​މިހާރު ބޮއްސުންލާފައިވާ އާސަންދަ ނިޒާމުގެ ތެރޭގައި ބޭހުގެ އަގުހުރި ގޮތުގެ މިސާލު ދަކަވަމުން ރައީސް ވިދާޅުވީ، އެންމެ ވިޔަފާރިއަކުން ވިއްކާ އެންމެ އިންޖެކްޝަނަކަށް، އަހަރެއްގެ މައްޗަށް ދައުލަތުން، 33 މިލިއަން ރުފިޔާ ޚަރަދުކުރަންޖެހޭ ކަމަށެވެ. އިތުރުތަފްޞީލް ދެއްވަމުން، އެ މަނިކުފާނު ވިދާޅުވީ ޒަޚަމްތައް އިންފެކްޓު ވިޔަނުދިނުމަށް ބޭނުންކުރާ ބޭހެއް، 400 ރުފިޔާއަށް މިހާރު ވިއްކާއިރު، ބަލްކް ޕްރޮކިއުމެންޓުގެ ތެރެއިން، 10 ރުފިޔާއަށް އެ ބޭސް ލިބޭނެ ކަމަށާއި، ހަކުރު ބައްޔަށް ބޭނުންކުރާ އިންސިއުލިންއެއް މިހާރު 600 ރުފިޔާއަށް ވިއްކާއިރު، އެ އިންސިއުލިން ބަލްކު ޕްރޮކިއުމެންޓުގެ ތެރެއިން 80 ރުފިޔާއަށް ލިބޭނެ ކަމަށެވެ. ރާއްޖޭގެ ބޭހުގެ އަގު އުޅެނީ މުޅި ދުނިޔެއަށް ބަލާއިރު ވެސް 15 ގުނަ އަގު ބޮޑުކޮށް ކަމުގައި ރައީސް ވިދާޅުވި އެވެ.