މެނިފެސްޓޯގައި ހިމަނުއްވާފައިވާ އާބަން ރީޖަންގެ މަޝްރޫޢުތައް ފުރިހަމަވެގެންދާނެ ކަމަށް ރައީސް ވިދާޅުވެއްޖެ.

މެނިފެސްޓޯގައި ހިމަނުއްވާފައިވާ، އާބަން ރީޖަންގެ މަޝްރޫޢުތައް ފުރިހަމަވެގެންދާނެ ކަމަށް ރައީސުލް ޖުމުހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިފަދައިން ވިދާޅުވީ، 9 ނޮވެމްބަރ 2024 ގައި އެކްސްގައި ކުރެއްވި ޕޯސްޓެއްގައެވެ.

​​​އެ ޕޯސްޓްގައި ރައީސް ވިދާޅުވީ، އެ މަނިކުފާނުގެ މެނިފެސްޓޯގައި ސާފުކޮށް ބަޔާންކޮށް އަދި ތަފާތު ޖަލްސާތަކުގައި އެ މަނިކުފާނު ވިދާޅުވެފައިވާ ފަދައިން، އާބަން ރީޖަންތަކާއި އާބަން ސެންޓަރުތައް، ސަރުކާރުން ޤާއިމް ކުރާނެއެވެ. މި ގޮތުން އުތުރުގައި 3 އާބަން ރީޖަނާއި ދެކުނުގައި 4 އާބަން ރީޖަން ގާއިމްކުރުމުގެ އިތުރުން، 7 އާބަން ސެންޓަރ ޤާއިމް ކުރުމަށް ސަރުކާރުން ނިންމާފައިވާކަމަށް ރައީސް ވިދާޅުވިއެވެ.

​​ރައީސް ވިދާޅުވީ، ދެމެހެއްޓެނިވި ސަރަޙައްދީ ސިޔާސަތުގެ ދަށުން، މި ޤާއިމްކުރެވޭ އާބަން ރީޖަންތަކާއި އާބަން ސެންޓަރުތަކަކީ، އެ ތަންތަނުގައި ދިރިއުޅޭ ރައްޔިތުންނަށް، އެންމެ މަތީ ފެންވަރުގެ ޚިދުމަތްތައް ލިބިދޭ ގޮތަށް ތަރައްޤީކުރެވޭ އާބަން ރީޖަންތަކެވެ.

މި އާބަން ރީޖަންތަކާއި އާބަންސެންޓަރުތައް ޤާއިމްކުރާނީ، މިހާރު އެކަށައެޅުމުގެ މަސައްކަތް ފައްޓަވާފައިވާ، ކުރިޔަށް އޮތް 20 އަހަރު ދުވަހުގެ ރާއްޖޭގެ ތަރައްޤީގެ މާސްޓަރ ޕްލޭންގައި ހިމަނުއްވައިގެންކަމަށް، ރައީސް ވިދާޅުވިއެވެ. ރައީސް ވިދާޅުވީ، މި އާބަން ރީޖަންތަކާއި އާބަންސެންޓަރުތައް ޤާއިމްކުރުމުގެ މައްސައްކަތް ކުރައްވާނީ، ރާއްޖޭގެ ހުރިހާ ރައްޔިތުން ޚިޔާލާއި، ކަމާ ގުޅޭ ފަންނީ ބޭފުޅުންގެ ލަފަޔާ މަޝްވަރާއާ އެކުއެވެ.

​​​މި ހިނގާ ނޮވެމްބަރ 17ގައި ރައީސް މުޢިޒުގެ ވެރިކަމަށް އެއް އަހަރު ފުރިގެންދާއިރު، އެ މަނިކުފާނު ގެންދަވަނީ ރާއްޖޭގެ ތަރައްޤީއަށް، ޚާއްޞަކޮށް ރާއްޖޭގެ ރައްޔިތުންނަށް ކުރިމަތިވެފައިވާ ބޯހިޔާ ވަހިކަމުގެ މައްސަލަތަކަށް ދާއިމީ ހައްލު ގެނައުމަށް ވަރަށް ގިނަ މަސައްކަތްޕުޅުތަކެއް ކުރައްވަމުންކަން ފާހަގަކުރެވެއެވެ. މި ގޮތުން، މާލެއާއި އަތޮޅުތެރޭގެ ރައްޔިތުންނަށް ގެދޮރު އެޅުމަށް، މި ހަފުތާގައި ރައީސް އިފުތިތާޙުކޮށްދެއްވި، ޚަރަދު ކުޑަ، ލުއިފަސޭހަ، ''ހިޔާވަހި ލޯނު'' ފާހަގަކުރެވެއެވެ.