ސްރީ ލަންކާގެ އާ ރައީސް ޑިސަނަޔަކެއަށް ރައީސް މަރުހަބާ ވިދާޅުވެއްޖެ

ސްރީ ލަންކާގެ އާ ރައީސް އަނޫރާ ކުމާރާ ޑިސަނަޔަކެ އެ ގައުމުގެ ރިޔާސީ އިންތިޚާބުގައި ހޯއްދެވި ކާމިޔާބީއާ ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ.

އިންތިޚާބުގައި ޑިސަނަޔަކެއަށް ލިބިވަޑައިގެންނެވި ބޮޑު ކާމިޔާބީއާ ގުޅިގެން އެކްސްގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެފައިވަނީ ޑިސަނަޔަކެއަށް އިންތިޚާބުގައި ލިބިވަޑައިގެންނެވި ކާމިޔާބާ ގުޅިގެން ހިތްޕުޅުގެ އުމުގުން މަރުޙަބާ ވިދާޅުވާ ކަމަށެވެ.

ޑިސަނަޔަކެއަށް މަރުޙަބާ ވިދާޅުވުމާއެކު ރައީސް ފާހަގަކުރައްވާފައިވަނީ ލަންކާއާއި ދިވެހިރާއްޖޭގެ މެދުގައި އޮތް ތާރީޚީ ގުޅުން އިތުރަށް ބަދަހިކުރައްވައި ވަރުގަދަކުރެއްވުމަށް އެމަނިކުފާނު ބޭނުންފުޅުވާ ކަމަށެވެ.

ލަންކާއަކީ ދިވެހިރާއްޖޭގެ އެންމެ އެވޭލާ ޒަމާނުއްސުރެ ގާތް ގުޅުމެއް އޮންނަ ޤައުމެކެވެ. ތާރީޚީ ގޮތުންނާއި ބަހަވީ ގޮތުން ދިވެހިރާއްޖެއާ އެންމެ ގުޅުން ބޮޑު ޤައުމަކީވެސް ލަންކާއެވެ.

1965 ވަނަ އަހަރު ރާއްޖެއަށް ފުރިހަމަ މިނިވަންކަން ލިބުމާއެކު އެންމެ ފުރަތަމަ ޑިމޮކްރެޓިކް ގުޅުން ޤާއިމުކުރި އެއް ޤައުމަކީވެސް ލަންކާއެވެ.