ޑޮލަރުގެ މައްސަލަ ޙައްލު ކުރުމަށް ސަރުކާރުން އަޅުއްވަން ނިންމަވާފައިވާ ފިޔަވަޅުތައް ރައީސް ހާމަކުރައްވައިފި

ރާއްޖެއަށް ކުރިމަތިވެފައިވާ ޑޮލަރު ލިބުން ދަތިވުމުގެ މައްސަލަ ޙައްލު ކުރުމަށް ސަރުކާރުން އަޅުއްވަން ނިންމަވާފައިވާ ފިޔަވަޅުތައް ރައީސުލްޖުމުހުރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ. އެ މަނިކުފާނު މި ކަން ހާމަކުރެއްވީ 26 އޮގަސްޓް 2024 ގައި ޕީއެންސީ ކޯލިޝަނުން ބޭއްވި ހަރުގެ ޖަލްސާގައި ވާހަކަފުޅު ދައްކަވަމުންނެވެ.

އެ މަނިކުފާނު ވިދާޅުވީ، އެމް.އެމް.އޭގެ އުސޫލުތަކަށް ގެންނަ ބަދަލުތަކުގެ ސަބަބުން ޑޮލަރުގެ ތާށިކަމަށް ހެޔޮ ބަދަލުތައް އަންނާނެކަމަށެވެ. މި ގޮތުން ޑޮލަރުން ޢާމްދަނީ ލިބޭ ފަރާތްތަކުން ސަރުކާރަށް ދައްކަން ޖެހޭ ޓެކްސްއާއި އިމްޕޯޓް ޑިއުޓީއާއި ޕެންޝަން ފައިސާ، ޑޮލަރުން ދައްކަން ޖެހޭގޮތް ހެދުމުން، ސަރުކާރަށް ޑޮލަރުން ލިބޭ ޢާމަދަނީ އިތުރުވެ، ބޭންކުތަކުން ޑޮލަރު ލިބުން ފަސޭހަވެގެންދާނެ ކަމަށެވެ. އަދި ރާއްޖޭގައި އިންވެސްޓް ކޮށްފައިވާ ބޭރުގެ އެކި ފަރާތްތަކުގެ ފައިސާ، ރާއްޖޭގެ ބެންކުތަކުގައި، ވަކި މުއްދަތެއް ވަންދެން ބެހެއްޓުމަށް ފަހު ނޫނީ ބޭރަށް ނޮފޮނުވޭ ގޮތް ހެއްދެވުމަށް މަސައްކަތް ކުރައްވާނެކަމަށް ރައީސް ވިދާޅުވިއެވެ. މީގެ ސަބަބުން، ބޭންކުތަކުގައި ޑޮލަރު ހުންނަ ނިސްބަތް އިތުރުވުމުން ޢާއްމުންނަށާއި ވިޔަފާރިތަކަށް ޑޮލަރު ލިބުން ފަސޭހަވެ، ޑޮލަރުގެ ބްލެކްމާކެޓް ނައްތާލެވޭނެކަން ރައީސް ހާމަކުރެއްވިއެވެ.

ބޭރުގައި ތިއްބަވާ ފަރާތްތަކުން، ރުފިޔާ އެކައުންޓުން ކާޑްބޭނުން ކޮށްގެން ޑޮލަރު ނެގޭ ލިމިޓް އުވާލުމަށް، 25 އޮގަސްޓް 2024 ވަނަ ދުވަހު ބެންކު އޮފް މޯލްޑިވްސުން އެޅި ފިޔަވަޅާ ބެހޭގޮތުން ވެސް ރައީސްގެ ވާހަކަފުޅުގައި އަލިއަޅުވައިލެއްވިއެވެ. އެ މަނިކުފާނު ވިދާޅުވީ، ބެންކު އޮފް މޯލްޑިވްސްގެ ބޯޑުގައި، މި ވަގުތު ސަރުކާރު އަޣުލަބިއްޔަތު ނެތްކަމަށާއި މި ކަމުގެ ނާޖާއިޒު ފައިދާ ނަގައިގެން އިދިކޮޅު ފަރާތްތަކުން އަޑީގައި ތިބެގެން، ސަރުކާރުން ބެންކާއެކު ވާހަކަދެކެވުނު ގޮތާ ޚިލާފަށް، ބެންކުން ގެންނަން އުޅުނީ ބަޣާވާތެއް ކަމަށެވެ. ފެންނަން ހުރި ހެކިތަކަށް ބިނާކޮށް، މޯލްޑިވްސް ޕޮލިސް ސާވިސް އިން މި ކަން ތަޙުޤީގު ކުރުމުގެ މަސައްކަތް މިހާރު ފަށާފައިވާކަން ރައީސް މުޢިއްޒު ހާމަކުރެއްވިއެވެ.