ދައުލަތުގެ މިނިވަން މުއައްސަސާތަކަށާއި އިންތިޚާބީ މަޤާމު ތަކުގައި ތިއްބަވާ ބޭފުޅުންނަށް ނުފޫޒު ނުފޯރުވާނެ ކަމަށް ރައީސް ވިދާޅުވެއްޖެ.
ޝެއަރ ކުރުމަށް
ދައުލަތުގެ މިނިވަން މުއައްސަސާތަކަށާއި އިންތިޚާބީ މަޤާމުތަކުގައި ތިއްބަވާ ބޭފުޅުންނަށް ނުފޫޒު ނުފޯރުވާނެ ކަމަށް ކަމަށް، ރައީސުލް ޖުމުހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މި ފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ. އިލެކްޝަންސް ކޮމިޝަނާއި އެންޓީ ކޮރޮޕްޝަން ކޮމިޝަނުގެ ރައީސާއި ނާއިބު ރައީސް އައްޔަން ކުރަން މިހާރު އޮންނަ ގޮތް ބަދަލު ކުރުމަށް، ޤާނޫނަށް ބަދަލުގެންނަން، ރައްޔިތުންގެ މަޖިލިހަށް ހުށަހެޅުމުން، އެކަމާ ބައެއް ފަރާތްތަކުން ދަނީ ފާޑު ކިޔަމުންނެވެ.
ދައުލަތުގެ ބާރުތަކަށާއި މިނިވަން މުއައްސަސާ ތަކަށާއި އިންތިޚާބުކުރެވޭ މަޤާމުތަކަށް ބާރު ނުފޯރުވާނެ ކަމުގެ ޔަޤީންކަން ދެއްވަމުން، ރައީސް މުޢިއްޒުވިދާޅުވީ، މި ފަދަ ތަންތަނަށާއި، އިންތިޚާބީ މަޤާމުތަކުގައި ތިއްބަވާ ބޭފުޅުންނަށް ބާރާއި ނުފޫޒު ފޯރުވުމަކީ، އެ މަނިކުފާނު ދުވަހަކު ވެސް ކުރެއްވި ކަމެއް ނޫން ކަމަށާއި އަދި ކުރައްވާނެ ކަމެއް ވެސް ނޫން ކަމަށެވެ.
އެ މަނިކުފާނު ވިދާޅުވީ، މި ގެންނެވި ބަދަލުގެ ޙަޤީޤީ މަޤުޞަދަކީ، އެ ފަދަ ފަރާތްތަކަށް އިންސާފާއި ޢަދުލުވެރިކަމާއި ހަމަހަމަ ކަމާއެކު، ނުފޫޒުން އެއްކިބާވެ ތިބެ، ހަލުވި ދުވެލީގައި މަސައްކަތް ކުރެވޭނެ މަގު ތަނަވަސް ކުރެއްވުން ކަމަށެވެ. އަދި މި ދެންނެވި މަގަށް ކަންކަން ބައްޓަން ކުރެއްވުމަށް ޓަކައި، ޤާނޫނަށް ގެންނަން ޖެހޭ އިސްޞާލާޙުތައް ގެނައުމަށް ސަރުކާރުން ހުށަހެޅުއްވާނެ ކަމަށް، އެ މަނިކުފާނު ވިދާޅުވިއެވެ.