ފަލަސްޠީނު ޙައްޤުގައި މަސައްކަތްކުރުމުގައި ރާއްޖެ އަބަދުވެސް ދެމިއޮންނާނެ: ރައީސް
ޝެއަރ ކުރުމަށް
ފަލަސްޠީނުގެ ޙައްޤުގައި މަސައްކަތްކުރުމުގައި ދިވެހިރާއްޖެ އަބަދުވެސް ދެމިއޮންނާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެ ޤައުމުގެ ރައީސް މަޙްމޫދު ޢައްބާސްއަށް ދެއްވައިފިއެވެ.
ރައީސުލްޖުމްހޫރިއްޔާ އެ ޔަޤީންކަން ދެއްވީ އދ.ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ރައީސް މަޙްމޫދު ޢައްބާސްއާ ބައްދަލުކުރައްވައި ދެއްކެވި ވާހަކަފުޅުގައެވެ. އެ ބައްދަލުވުމަށްފަހު ނޫސްވެރިންނާ ވާހަކަދައްކަވަމުން ރައީސް ވިދާޅުވީ ދިވެހިން އަބަދުވެސް ދެމިތިބޭނީ ފަލަސްޠީނުގެ ރައްޔިތުންނާއެކު ކަމަށެވެ.
"ދިވެހިން އެންމެ ފުރިހަމަ މާނާގައި އަބަދުވެސް ތިބޭނީ ފަލަސްޠީނުގެ ރައްޔިތުންނާއެކު. ފަލަސްޠީނާއި ފަލަސްޠީނު ރައްޔިތުންގެ ޤަޟިއްޔާއަކީ ކޮންމެ ދިވެއްސެއްގެ ފުރިހަމަ ތާއީދު އޮތް ޤަޟިއްޔާއެއް" ރައީސް ވިދާޅުވިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިތުރަށް ވިދާޅުވެފައވަނީ އެ ބައްދަލުވުމުގައި ފަލަސްޠީނުގެ މިނިވަން ދައުލަތެއް ޤާއިމުކުރުމަށް ކުރަމުންދާ މަސައްކަތްތަކާމެދު މަޝްވަރާކުރެއްވި ކަމަށެވެ. އަދި ފަލަސްޠީނު ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާއި، އެމީހުންނަށް ދެމުންދާ އަނިޔާތަކާ ގުޅޭ ގޮތުން ދެ ލީޑަރުން މަޝްވަރާކުރެއްވި ކަމަށް ރައީސް ވިދާޅުވިއެވެ.
އަދި ރައީސް ވިދާޅުވީ ފަލަސްޠީނުގެ މިނިވަން ދައުލަތެއް ޤާއިމުކުރުމުގެ ޙައްޤު އެ ޤައުމުގެ ރައްޔިތުންނަށް ލިބިފައިވާކަން ދިވެހިރާއްޖެއިން ޤަބޫލުކުރާކަމަށް ރައީސް މަޙްމޫދު ޢައްބާސް އަރިހުގައި ދެންނެވި ކަމަށެވެ.
އިތުރަށް އެމަނިކުފާނު ވިދާޅުވީ އެހާރާއި މިހާރުވެސް ދިވެހިން ތިބީ ފަލަސްޠީނު ރައްޔިތުންނާއެކު، އެ ޤައުމުގެ ޙައްޤުގައި ކުރެވެން ހުރި ކޮންމެ ކަމެއް ކުރުމުގެ މަތީގައި ކަމަށެވެ. އަދި ކުރިއަށް އޮތް ތަނުގައިވެސް ފަލަސްޠީނުގެ ޙައްޤުގައި ދިވެހިރާއްޖެއަށް ކުރެވެން ހުރި ހުރިހާ ކަމެއް ކުރާނެ ކަމުގެ ޔަޤީންކަން އެމަނިކުފާނު ދެއްވިއެވެ.