ކުދި ޖަޒީރާ ދައުލަތްތަކުގެ އިޤުތިޞާދު ސިންދަފާތުކުރުމަކީ މިހާރު ޒަރޫރަތެއް: ރައީސް

ކުދި ޖަޒީރާ ދައުލަތްތަކުގެ އިޤުތިޞާދު ސިންދަފާތުކުރުމަކީ މިހާރު ހަމައެކަނި ލަނޑުދަނޑިއެއް ނޫންކަމަށާއި އެއީ އެފަދަ ޤައުމުތަކަށް ބަދަލުވަމުންދާ ބައިނަލްއަޤުވާމީ އިޤުތިޞާދެއްގައި ސަލާމަތުން ދެމިތިބުމަށް ކޮންމެހެން ޟަރޫރީ ކަމެއް ކަމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެ އެވެ.

އދގެ އާންމު މަޖިލީހުގެ ޖަލްސާގެ ހަވާސާގައި ކުރިއަށް ގެންދިޔަ "ބިލްޑިން ރެޒިލިއެންޓް ފިއުޗާސް: ގްލޯބަލް ސިޑްސް ޑެޓް ސަސްޓެއިނަބިލިޓީ ސަޕޯޓް ސާވިސް" ހަރަކާތުގައި ރައީސް މިއަދު ދެއްކެވި ވާހަކަފުޅުގައި ފާހަގަކުރައްވާފައިވަނީ ދަރަނި އަދާކުރުމުގައި އަދި ދަރަނީގެ ދެމެހެއްޓެނެވިކަން ކަށަވަރުކުރުމުގައި ކުދި ޖަޒީރާ ޤައުމުތަކަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ.

އެންމެ ދެތިން ސިނާއަތަށް ބަރޯސާވުމުގެ ސަބަބުން ކުދި ޖަޒީރާ ގައުމުތަކުގެ އިގުތިސާދު ވަރަށް ބޮޑަށް ނާޒުކު ފައްތަރެއްގައި އޮންނަކަން ފާހަގަކުރައްވައި އެކަމުގެ މިސާލެއްގެ ގޮތުގައި ކޮވިޑް-19ގެ އާލަމީ ވަބާގެ ސަބަބުން ރާއްޖެއާއި ކުދި ޖަަޒީރާ ގައުމުތަކުގެ އިގުތިސާދަށް އައި ހީނަރުކަން ރައީސް ފާހަގަކުރެއްވިއެވެ. 

ކުދި ޖަޒީރާ ގައުމުތަކަށް އިގުތިސާދު ސިންދަފާތުކުރުމަކީ ހަމައެކަނި ލަނޑުދަނޑިއެއް ނޫންކަމަށާއި، އަވަސް އަވަހަށް ބަދަލުވަމުންދާ ބައިނަލްއަގުވާމީ އިގުތިސާދެއްގައި ސަލާމަތުން ދެމިތިބުމަށް އެއީ ޒަރޫރީ ކަމެއްގެ ގޮތުގައި ރައީސް ސިފަކުރެއްވިއެވެ.

އަދި ކުދި ޖަޒީރާ ޤައުމުތަކުގެ ތަރައްޤީގެ މިލްކުވެރިކަން އެ ޤައުމުތަކުގެ އަތް މައްޗަށް ގެނެސް، ހަރުދަނާ މުއައްސަސާތައް ބިނާކޮށް ހިންގުމުގެ ނިޒާމުތައް ހަރުދަނާކޮށް، އިންސާނީ ވަސީލަތްތައް އިހުނަށްވުރެ ތަރައްޤީކޮށް، މައްސަލަތަކަށް އަމިއްލައަށް އުފަންކުރާ ކުދި ޖަޒީރާ ޤައުމަތަކަށް ޚާއްޞަ ވަރުގަދަ ސިފަތައް ރިވެލިވާ ޙައްލުތަކެއް ތަންފީޒުކުރުން މުހިއްމު ކަމުގައި ރައީސް ވިދާޅުވިއެވެ.

އިތުރަށް އެމަނިކުފާނު ފާހަގަކުރެއްވީ ދަރަންޏަށް ލުއި ދިނުމާއި މޫސުމީ ބަދަލުތަކުން ސަލާމަތްވުމަށް މާލީ އެހީތެރިކަން ދިނުމާ ދެމެދު ގުޅުވައިލަން ޖެހޭ ކަމަށެވެ. އަދި ކުދި ޖަޒީރާ ދައުލަތްތަކުން ވަކާލާތުކުރަންވަނީ މާނަހުރި ގޮތެއްގައި ދަރަނި އަދާކުރުމުގައި ލުއި ގޮތްތަކެއް ހަމަޖެއްސުމަށްކަމަށާއި، އެގޮތުން އިންޓަރެސްޓު ރޭޓުތައް ކުޑަކުރުމާއި، ދަރަނި އަދާކުރުމުގެ މުހުލަތު ދިގުކުރުން ފަދަ ކަންކަމަށް ކުދި ޖަޒީރާ ޤައުމުތަކުން ވަކާލާތުކުރަންޖެހޭ ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވި ގޮތުގައި ދަރަނީގެ މައްސަލައަށް ޙައްލެއް ހޯދުމުގައި ބައިނަލްއަޤުވާމީ މާލީ އިދާރާތަކާއި، ގިނަ ދައުލަތް އެކުލެވޭ މުއައްސަސާތަކާ ގުޅިގެން މަސައްކަތްކޮށް، އީޖާދަށް ހިތްވަރުދީ އިޤުތިޞާދީ އާ ފުރުޞަތުތައް އުފައްދައިދޭނެ އިންވެސްޓުމެންޓު ހޯދުމަށް މަގުފަހިކުރެވޭނެ ކަމަށެވެ.

އެގޮތުން ބްލޫ އަދި ގްރީން ބޮންޑާއި، ޑެޓް ފޯ ނޭޗާ ސްވޮޕްސްއާއި ލުއި ލޯނުތަކަކީ މިހާރު ހަމައެކަނި ކުރާ އުންމީދުތަކެއް ނޫންކމަށާއި، އެއީ ކުދި ޖަޒީރާ ދައުލަތްތަކުން ވިލުންތެރި އިޤުތިޞާދުތަކެއް ބިނާކުރުމަށް ކުރާ މަސައްކަތްތަކުގައި މުހިއްމު ބައިތަކެއް ކަމުގައި ރައީސް ވިދާޅުވިއެވެ.