ޤައުމުގެ އިޤުތިޞާދަށް މައްސަލަތައް ކުރިވި ސަބަބުތަކާއި އިޤުތިޞާދު ރަނގަޅު ކުރަން ކުރަމުންދާ މަސައްކަތް ޕީއެންސީން ހާމަކޮށްފި

ދިވެހިރާއްޖޭގެ އިޤުތިޞާދަށް މިހާރު ކުރިމަތިވެފައިވާ މައްސަލަތައް ކުރިމަތިވި ސަބަބުތަކާއި އިޤުތިޞާދު ރަނގަޅު ކުރުމަށް ސަރުކާރުން ކުރައްވަމުން ގެންދަވާ މަސައްކަތް، ޕީއެން.ސީން ހާމަކޮށްފިއެވެ. މި ކަން ހާމަކުރީ މިއަދު 28 އޮގަސްޓް 2024ގައި ޕީއެންސީން ބޭއްވި ނޫސް ކޮންފަރެންސެއްގައެވެ. މި ނޫސް ކޮންފަރެންސްގައި މަޢުލޫމާތު ދެއްވަމުން، އިކޮނޮމިކް މިނިސްޓަރ މުޙައްމަދު ސައީދު ވިދާޅުވީ، ނިމިދިޔަ އެމް.ޑީ.ޕީ ސަރުކާރުގެ ޢަމަލުތައް ހުރިގޮތުން، ރާއްޖޭގެ އިޤުތިޞާދު އަނދަވަޅަކަށް ވެއްޓެމުންދާ ތަން، އެ ބޭފުޅުންނަށް ފެނިވަޑައިގަންނަވާތީ، ފައިސާ ޗާޕުނުކުރުމަށާއި ޤައުމުގެ ފުދުންތެރިކަމާ ނުބައްދަލު ޢަދަދަކަށް ލޯނު ނުނެގުމަށް މަޖިލިސްތެރެއިން އެ ބޭފުޅުންނަށް އޭރު ކުރެވެން ހުރި ހުރިހާ މަސައްކަތެއް ކުރެއްވި ކަމަށެވެ. އަދި އެމް.އެމް.އޭ އާއި ބީ.އެމް.އެލް ގެ ވެރިންނާ 2 ފަހަރެއްގެ މަތިން ބައްދަލުކުރައްވައި، އެ ކަންބޮޑުވުންތައް ޙިއްސާކުރެއްވި ކަން ސައީދު ފާހަގަ ކުރެއްވިއެވެ.

ސައީދު ވިދާޅުވީ ސަރުކާރުގެ އެކި ބޭނުންތަކަށް 12 މިލިޔަން ޑޮލަރު ދުވާލަކަށް ޚަރަދުވާއިރު، ސަރުކާރަށް ޢާމްދަނީ ގޮތުގައި ލިބެނީ 4 މިލިޔަން ޑޮލަރުކަމަށެވެ. އެހެންކަމުން ފައިސާ ޗާޕްކޮށްފިނަމަ އިޤުތިޞާދު އަނދަވަޅަކަށް ވެއްޓޭނެތީ، އައިއެމްއެފުން ވެސް، ފައިސާ ޗާޕް ނުކުރުމަށް ލަފާދިން ނަމަވެސް އެއިން އެއްވެސް ލަފަޔަކަށް ބަލައި ނުލައި 8 ބިލިޔަން ރުފިޔާ ޗާޕްކޮށް، 3 ބިލިޔަން ޑޮލަރުގެ ލޯނު ނެގިކަމަށާއި، އާމުދަނީ ލިބޭ ކަމަކަށް އަދި މިއިން އެއްމެ ޑޮލަރެއް ވެސް ޚަރަދު ކޮށްފައިނުވާކަމަށާއި މީގެ ނަތީޖާއަކީ 120 ބިލިޔަން ރުފިޔާއިން ދައުލަތް ދަރަނިވެރިވުން ކަން ސައީދު ފާހަގަކުރެއްވިއެވެ.

އެމް.ޑީ.ޕީ ހަލާކުކޮށްލި އިޤުތިޞާދު ހަމަމަގަށް އެޅުވުމުގެ މަސައްކަތް، ރައީސް މުޢިއްޒު ކުރައްވާނީ، ދިވެހި ރައްޔިތުންނަށް އޭގެ ބުރަ އުފުލަން ނުޖެހޭ ގޮތަށްކަން ސަޢީދު ފާހަގަކުރެއްވިއެވެ. މި ގޮތުން ޑޮލަރުން އާމްދަނީ ލިބޭފަރާތްތަކުން ދައުލަތަށް ދައްކަންޖެހޭ ޓެކްސްއާއި ކަސްޓަމް ޑިއުޓީއާއި ޕެންޝަން ފައިސާ، ޑޮލަރުން ދެއްކުމަށް ޓަކައި އެފަރަތްތަކާ މަޝްވަރާކޮށް، ޤާނޫނަށް ގެންނަން ޖެހޭ ބަދަލު ގެނައުމުގެ މަސައްކަތް ކުރައްވަމުންދާކަމަށް ސައީދު ވިދާޅުވި އެވެ. މީގެ ސަބަބުން 40 މިލިޔަނާ 80 މިލިޔަނާ ދެމެދުގެ ޢަދަދެއް، ޑޮލަރުން ލިބޭ އާމްދަނީއަށް އިތުރުވެގެންދާނެ ކަން މިނިސްޓަރު ފާހަގަ ކުރެއްވިއެވެ.

ޤައުމުގެ އިޤުތިޞާދު ރަނގަޅު ކުރުމަށް ޓަކައި 12 ސެޕްޓެމްބަރ 2024 ގައި ބަންކަރިންގެ ޚިދުމަތް ފެށިގެންދާނެ ކަމަށާއި އޭގެ ސަބަބުން ޚިދުމަތް ފަށާ ފުރުތަމަ އަހަރުވެސް ގައުމީ އުފެއްދުންތެރިކަމަށް 400 މިލިއަން ޑޮލަރު އިތުރުވާނެކަމުގައި އޭނާ ވިދާޅުވިއެވެ. އިޤުތިޞާދު ރަނގަޅު ކުރުމަށް ފިޝަރީޒު މިނިސްޓްރީން ކުރައްވަމުންގެންދަވާ މަސައްކަތް، ފިޝަރީޒު މިނިސްޓަރ މުހައްމަދު ޝިޔާމް އަޙުމަދު ހާމަކުރެއްވިއެވެ. މި ގޮތުން މެރިކަލްޗަރ އާއި ލޭނުގެ މަސައްކަތް ފެށުމަށް ރާވާފައިވާ ކަމަށާއި ވަރަށް ގިނަ ދިރާސާތަކަށް ފަހު 2025 ފެބުރުއަރީ މަހު، ލޭނު އެޅުމަށް ހުއްދަ ދެއްވާނެކަން ޝިޔާމް ހާމަކުރެއްވިއެވެ. މީގެ ސަބަބުން މިހާރު މަސްވެރިކަމުން އަހަރެއްގެ މަޗަށް ލިބެމުން އަންނަ 92 މިލިޔަން ޑޮލަރު 120 މިލިޔަން ޑޮލަރަށް އިތުރުވެގެންދާނެކަން މިނިސްޓަރ ފާހަގަ ކުރެއްވިއެވެ.

ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ.މުހައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން ދައުލަތުގެ މާލީ ހާލަތު ރަނގަޅުކޮށް އިޤްތިސާދު އިތުރަށް ފުޅާކުރުމަށް ގިނަގުނަ މަސައްކަތްތަކެއް އަންނަނީ ކުރައްވަމުންނެވެ.