ޙަޤީޤަތް އޮޅުވާލުމަށް ފަތުރަމުންދާ ދޮގު ޚަބަރުތަކަށް ސަމާލުވުމަށް ރައީސް އިލްތިމާސް ކުރައްވައިފި

ޙަޤީޤަތާ ޚިލާފަށް ފަތުރަމުންދާ ދޮގު ޚަބަރުތަކަށް ސަމާލުވުމަށް ރައީސުލް ޖުމުހުރިއްޔާ ޑރ. މުޙައްމަދު މުޢިޒު އިލްތިމާސް ކުރައްވައިފިއެވެ. އެ މަނިކުފާނު މި ފަދައިން އިލްތިމާސް ކުރެއްވީ 26 އޮގަސްޓް 2024 ގައި ޕީއެންސީ ކޯލިޝަނުން ބޭއްވި ހަރުގެ ޖަލްސާގައި ދެއްކެވި ވާހަކަފުޅުގައެވެ.

ރައީސް މުޢިއްޒު ވިދާޅުވީ ދޮގު ޚަބަރުތައް ލިޔެ ފަތުރާ މީހުން އެ ފަދަ ޚަބަރުތައް ފަތުރަނީ، ކުޑަ ތެދު ވާހަކައެއްގެ މައްޗަށް ބިނާކޮށް ކަމަށާއި، އޭގެ ބޭނުމަކީ މީހުންނަށް ޙަޤީޤަތް އޮޅުވާލުން ކަމަށެވެ. މި ގޮތުން އެ މަނިކުފާނާ ބެހޭގޮތުން ފަތުރަމުންދާ ބައެއް ދޮގު ޚަބަރުތައް އުފައްދާފައި ހުރިގޮތުގެ މިސާލު ދެއްކެވިއެވެ. އެ މަނިކުފާނަކީ ލާދީނީ ފިކުރުގެ ބޭފުޅެއްކަން ދެއްކުމަށް، ޑޭވިޑް ހާޑިން ހަމް އާއެކު، ގިނަ ބަޔަކު ނެގި ފޮޓޯގައި އެ މަނިކުފާނު ފެންނަން ހުރުމުން، އެ ކަން ބޮޑުކޮށްގެން ދައްކާ ކަމަށާއި، ނަމަވެސް އެ މަނިކުފާނާއި އަދި މި އަދު ކެބިނެޓްގައި ތިއްބެވި ބައެއް ބޭފުޅުން، އިނގިރޭސި ވިލާތުގައި ކިޔަވާވިދާޅުވާން އުޅުއްވި ދުވަސްރުގެ އެ ފޮޓޯ އަކީ، ހާޑިންހަމާއި ބައެއް ދިވެހިން ގުޅިގެން، އިސްލާމްދީނާ ދެކޮޅަށް ވާހަކަ ދައްކާތީ އެ ކަމާ ދެކޮޅު ހެދުމަށް ދިޔަ ދިއުމެއްގައި ނަގާފައިވާ ފޮޓޯއެއް ކަން ހާމަކުރެއްވިއެވެ. ދޮގު ހެދުމާއި ދޮގު ޚަބަރުތައް ފެތުރުމުގެ ނުރައްކާތެރިކަން ހުރިމިންވަރު، ކީރިތި ޤުރުއާނުން ދަލީލު ދަކަވަމުން އެ މަނިކުފާނު ހާމަ ކުރެއްވިއެވެ.

ރައީސް މުޢިޒު ވިދާޅުވީ އެ މަނިކުފާނު ވެރިކަން ކުރަނީ الله ގެ ވަޖުހުފުޅު އަދައިގެންކަމަށެވެ. މި ގޮތުން އިސްލާމީ ގައުމެއްގައި ވެރިކަން ކުރުމުގެ ރީތި ނަމޫނާ، ވޭތުވެ ދިޔަ 9 މަސް ދުވަހު އެ މަނިކުފާނު ދައްކަވައި ދެއްވާފައިވާނެ ކަމަށް ވިދާޅުވިއެވެ. ރައީސް ވިދާޅުވީ ދުނިޔެއާއި އާޚިރަތުގައި ވެސް، ޖަވާބުދާރީ ވާންޖެހޭކަން އެނގިވަޑައިގަންނަވާތީ، ކޮންމެ ދުވަހަކު ވެސް އެ މަނިކުފާނު އަމިއްލަފުޅަށް، އެ މަނިކުފާނުގެ ޒިންމާ އަދާކުރެވުނު މިންވަރު ބައްލަވަމުން ގެންދަވާކަމަށެވެ.